Read Mongondow YESAYA 48 Bible Online

YESAYA 48 - Mongondow bible

YESAYA 48

¹Indongogai, ei buí i Yakub, buí in Yohuda inta nomaké in tangoi in Israel, kainimu in inakumu in Allah in Israel, bo nongibot pinodoyon kon tangoi TUHAN. Táe tosingogonmu mita tua in diábí totuu.

²Umpaka natua, iko in mongaku doman takin pia in gina kon iko in intau in kotá motusi; bo iko in inumandoḷ kon i Allah in Israel inta sinangoi ki TUHAN inta Totok in mokawasa.

³Ki TUHAN in noguman, “Indongogaidon ei Israel! Onu inta nobaḻí koḻipod, noonggotdon in pinotaau-Ku; Onu inta pinoguman-Ku, daḻídon aidan-Ku bo baḻíon-Ku moniata.

⁴Kinotaauan-Ku kon iko in motogat in gina, motontogat in uḷu naonda bo pamandot.

⁵Dá nongkon koḻipodpamai aindon sinoḻindap-Ku; kon dodai in diápa nobaḻí aindon pinotaau-Ku, sinbá iko in diá mosingog, kon tua in aidbí in patong mita in berhalamu.

⁶Bayongan in toḻindap-Ku inta dinongogmu ain nobaḻí; musti akuonmu kon tosingogon-Ku tua in totuubí. Tanaa Akuoi in mopotaau in soaḷ mita inta mobagu, rahasia mita inta diápa kinotaauanmu.

⁷Bain tanaa bo inaidan-Ku, bo deemanbí koḻipod; diápabí kon dodai in onda iko in nokodongog kon tua, sinbá iko in diá mokopoguman, kon iko in nonotaau kon bayongan yagi-yagi.

⁸Kinotaauan-Ku kon iko in diábí motaau pirisayaan, nongkon dungkuḷpabímai kinotaauandon in iko kon moraat. Tuamai in diá kinotaauan, diá tobatúmai in tosingogon in modapot kon bongoḷanmu.

⁹Sinagú-Ku in torú-Ku sinbá tangoi-Ku in popotaau. Pinondam-Ku intua kon inimu sinbá iko in diá yopúon.

¹⁰Sinungkuḷan-Ku in iko kon bonu in tuḷú in roriga, naonda bo saḷaka sinubá kon bonu in tuḷú.

¹¹Tua in inaidan-Ku pinodoyon kon i-Nakó tontaní, sin Akuoi in diábí mopomayá mako in tangoi-Ku poraaton magí-mako; kamuliaan-Ku in diábí silaion-Ku kon i ineka.”

¹²Ki TUHAN in noguman, “Indongogaidon Israel umat inta inoiní-Ku, Akuoi in umuranbí ki Allahmu. Akuoibí inta muna-munamai, bo Akuoi doman inta imbuitnea.

¹³Ḻima-Ku nopoukat in dodoyonan butá bo nosongká kon toḷungayá. Aka oiníon-Ku in tangoinea, mosia in ḷagibí mamangoi.

¹⁴Poyosipundon in moiko komintan bo indongogaidon! Kon sigad in dewa mita diábí in nonoḻindap kon intau inta piniḻí-Ku in monubu kon Babel; Sia in mopobayábí kon onu inta koibog-Ku.

¹⁵Akuoibí in inta noguman kon tua bo inta nogoiní kon inia, inta nokapit kon inia nodapot in sia nokodapot kon inta pinoki aid.

¹⁶Angoidon diug kon i-Nakó bo indongogaidon, nongkon dungkuḷpabímai diábí bunion-Ku in tosingogon-Ku; onu in siningog-Ku umuranbí pototuu-Ku.” Tanaa in ki TUHAN Allah nopotabá kon inakó bo nobogoi kon inakó in kawasa-Nea tontaní.

¹⁷Guman i Allah mokudus in Israel, Mopoposaḷamatmu, “Akuoibí in ki TUHAN Allahmu, inta notundú kon inimu onu in baraguna kon inimu, bo nodia kon inimu mongin daḷan inta musti bayáanmu.

¹⁸Aka kuma bo iko noindoimai kon parenta-Ku mita, dá kobiaganmu motompia in naonda bo ongkag inta diá moingka-ingkag, bo kamujuranmu in naonda bo bokoḷ kon dagat inta diá mogoga-gogai.

¹⁹Buímu in naonda bo kobayong in bungaion; Akuoi in mojamin kon mosia in diábí kon dodai in onda in yopúon.”

²⁰Bayádon bo poḷaguidon nongkon Babel, Potaaudon magí-mako in habar tanaa. Potaaudon takin yogiow sanang in gina: “Ki TUHAN in noposaḷamatdon kon Israel, mogogundoi-Nea!

²¹Kon tungkuḷ in Sia nodia kon i monia nongin butá inta diá in tonsiungnea, mosia in diábí irumogang. Ki TUHAN in nomotak kon buḷud batu bo nopoiḻig in tubig, nongkon batu pinotampurangnea in tubig kon i monia.

²²Diábí in kasaḷamatan kon intau moraat,” natuata in guman i TUHAN.