Read Mongondow YESAYA 49 Bible Online

YESAYA 49 - Mongondow bible

YESAYA 49

¹Indongogaidon in Akuoi, ei butá mita inta moyayú tondudut kopira in tosingogonku mita. Ki TUHAN in nogoiní kon inakó kon dodai in Akuoi diápa pinononggadí, Sia in nomiḻídon kon inakó pinangkoipamai kon akuoi in bonupa in sian.

²Binaḻí-Nea in tosingogonku mita ná koḷanit in pitow, ḻima-Nea tontaní[69] in pinoḷukad-Nea kon inakó. Binaḻí-Nea in akuoi naonda bo piot inta inatá, bo sinagúnea kon bonu in potoḷónea sinbá kosadi-sadiadon pakéon.

³Guman-Nea kon inakó, “Ikobí in mogogundoi-Ku; Akuoi in poḷantudonbí popisí in iko.”

⁴Táe akuoi in noguman, “Ḷopíku in diábí in baragunanea, kinodaitku in ropotku takin diá in mangaḻenea!” Tongá noyakinbí in akuoi kon ki TUHAN in mobelabí kon hakku, ki Allah in motuḻíbí kon inakó podudui in aidku.

⁵Kon tungkuḷ in diápa pinononggadí, akuoi inoiní i TUHAN nobaḻí mogogundoi-Nea sin mosipun kon umat in Israel, sinbá mosia in mobui mamangoi kon i-Nia. Ki TUHAN in nopobaḻí kon inakó ihoromat, ki Allah in nobaḻí ropotku.

⁶Ki TUHAN in noguman kon inakó, “Oaidan inta moḷobe-ḷoben in mogoḷat mako kon inimu, ei mogogundoi-Ku; iko in diábí tongá mopobui in ki agat in buí i Yakub bo mopoguḻit kon koḷoḷoben in suku mita in Israel, táe baḻíon-Ku doman bayag in bangusa mita, sinbá sinangkub in dunia posaḷamaton.”

⁷Ki Allah mokudus Mopoposaḷamat in Israel in noguman kon intau inta totok in siningkuḻe, bo inta kinodoí in bangusa mita bo inta nobaḻí ata in pongawasa mita, “Datu mita in mokoontongbí kon onu in aidan-Ku; mosia in simindogbí mohoromat kon i-Nakó. Pongawasa mita in mokoontongbí doman kon tua, bo tumungkud mosumba.” Tua in mobaḻí popisí in ki TUHAN ain nomiḻí kon mogogundoi-Nea; Ki Allah mokudus in Israel in mosatia kon dandi-Nea.

⁸Ki TUHAN in noguman kon umat-Nea, “Kon tungkuḷ in Akuoi in moibog, Akuoi in motubagbí; kon singgai Akuoi moposaḷamat, Akuoi motuḷung kon i monimu. Moiko in oḻiungan-Ku bo ḷukadan-Ku, bo baḻíon-Ku dodandian kon bangusa mita. Tompiaan-Ku bui in butá inta noingongowdon mobaḻí butá tonsilai inta pogutunan.

⁹Intau inta pinonjara pinoki poḷuaian-Ku; inta kon tampat mosindip diaan-Ku mayá in mobayag. Nodapot in inta kon tombuḷud inta noḷogat mosia in diábí kodaitan, kon kinoouput in daḷan oyúonbí in kaanon.

¹⁰Mosia in diábí morogang andeka gogoyon, bo diábí kotugatan in patú in mata in singgai kon padang gurun. Sin Akuoi, in motabi kon i monia, in modiabí kon i monia, bo modia kon i monia mayá in bokaká mita.

¹¹Akuoi in momiabí kon daḷan mongin buḷud, bayongan in daḷan moḷoben-Ku in tondodaion-Kubí.

¹²Nongkon moyayú umat-Ku in moroangoi, nongkon dotá in utuan, toyopan bo Sinim[70] kon toḷatan.”

¹³Podondongdon ei ḷangit, porogiowdon ei butá, ei buḷud mita. Porogiowdon takin pia in gina! Sin ki TUHAN in mamangoi moḻipoi kon umat-Nea, Sia in monotabi kon umat-Nea inta dinorot.

¹⁴Táe intau in Yerusalem noguman, “Ki TUHAN in nonaḷámaidon kon i naton, Ki TUHAN naton ain nokoḻiong kon i naton.”

¹⁵Ki TUHAN in notubag, kai-Nia, “Degá iná tobatú mokoḻiong kon i adínea, bo diá motabi kon i adínea inoyod? Umpaka in sia mokoḻiong, Akuoi in diábí mokoḻiong kon inimu!

¹⁶Yerusalem, Akuoi in umuranbí mokotorop kon inimu; tangoimu in kinurig-Ku kon paḷad in ḻima-Ku.

¹⁷Intau mita inta moposindog kon inimu in ḷagidon mamangoi, bo inta ain norimumud kon inimu in mayádon.

¹⁸Indoiaidon bo bobuidon in kon ḻibumumai, rayatmu in nosipundon bo mamangoi kon inimu. Podoyon kon tangoi-Ku, Allah inta nobiag, Akuoi in moguman, Totuu, mopiabí in ginamu sin intau inta nogutun kon inimu, naonda bo nonikaan bobay mopia in ginanea popisí in ḷambánea.

¹⁹Butámu inta noḷogat bo noingongow, tanaa in noiḻiudon sisí kon intau mita inta moibog mogutun kon tua. Bo intau mita inta moibog moyopú kon inimu, ain minayá iyumayú kon inimu.

²⁰Adí mita inta pinononggadí kon pinoḷumbúan in mogumanbí kon inimu, ‘Butá tanaa in mosisídon totok kon inakó, ogoiaidon in tampat sinbá akuoi motaaudon mogutun kon naa.’

²¹Dá iko in mosingogdon kon bonu in gina, ‘Ki ine in nopononggadí in mongoadí mita tatua kon inakó? Akuoi naa in kinobuḻiandon in adíku mita, bo diádon motaau mononggadí bui? Akuoi in inakut pinobayá in pinoḷumbúan bo pinotondí bo sinaḷáan aku-akuoi mita. Dá nongkon onda in adí mita tatua, bo ki ine in nomiag kon i monia nodapot in noitoidon?’ ”

²²Ki TUHAN Inta Totok in moḷantud in noguman kon umat-Nea, “Akuoi in mobogoibí i tomponuot kon bangusa mita bo mosia in mopobuibí kon i adímu mita; ki adímu mita ḷoḷaki in koyotanbí bo adímu mita bobay in tokopotaanon.

²³Datu mita in naondadon bo ki amámu, bo bokí mita in nobaḻí ki inámu. Mosia in tumungkudbí mohoromat kon inimu bo tumonsiup kon inimu. Dá kotaauanmudon kon Akuoi in ki TUHAN; intau inta inumandoḷ kon i-Nakó in diábí pokuyangon in gina.”

²⁴Moiko in moḻibó, “Umpaka yo inta nouḻí kon parang in agowon kon ḻima in pahlawan, andeka inta dinakop agowon nongkon ḻima in intau moromú?”

²⁵Ki TUHAN in notubag, “Tuata in mobaḻí. Intau mita inta dinakop in pahlawan mita in agowonbí bui. Inta inagow in intau moraat in agowonbí bui. Sin Akuoibí tontaní in monayow kon musungmu; Akuoi in moposaḷamatbí kon i adímu mita.

²⁶Baḻíon-Kubí in musungmu moḷoḷangu in dugú, dá mosia in mosiḻimodandon. Dá bayongan in intau in monotaaudon, kon Akuoi, ki TUHAN, Mopoposaḷamatmu; Inta Totok in moropot, ki Allah i Yakub, in Mototobutmu.”