Read Mongondow YESAYA 50 Bible Online

YESAYA 50 - Mongondow bible

YESAYA 50

¹Ki TUHAN in noguman kon Israel, “Ei umat-Ku, kainimu kamai Akuoi in mopoguntunbí kon inimu naonda bo buḷoi ḷoḷaki mopoguntun kon i buḷoinea bobay? Aka natua, yo kon onda in surat gogaatannea? Kainimu kamai Akuoi in mopotaḷui kon inimu, naonda bo guyanga ḷoḷaki nopotaḷui kon i adínea kon intau inta mamangoi moigum kon boḻi? Deeman! Iko in dinakop bo iḷumbú, popisí in dosa bo aid moraatmu tontaní!

²Nongonu sin nongkon umat-Ku diábí tobatúmai in intau in notubag, kon tungkuḷ in Akuoi namangoi nogoiní kon i monia? Degá mosia in tongá kibio-biómai sin kai monia kamai Akuoi in diá mokopoḷuat bo moposaḷamat kon i monia? Totuubí, podudui in parenta-Ku dagat nobaḻí noingkag, ongkag mita binaḻí-Ku padang gurun, nodapot in toyá mita minatoi bo nobódon in ḷandig.

³Ḷangit binaḻí-Ku irumondí komintan, kinoḷoban-Ku intua naonda bo kaeng pinatoian.”

⁴Ki TUHAN Inta Totok in moḷantud in notundú kon inakó nosingog, sinbá tosingogonku in mokoropot kon intau inta noḷungkoyó. Pomuḷoi in doḷo-doḷom pomuká-Nea in ibog in ginaku sin mokidongog kon totundú-Nea kon inakó.

⁵Ki TUHAN in nobogoi kon inakó in pomomangaḻe; akuoi in diábí nomarontak andeka nonoḻikud kon i-Nia.

⁶Inogoiku in ḻikudku kon intau inta nomongkug kon inakó; bo putongiku kon intau inta norabut kon kumiku. Akuoi in diábí nopoḷagui in pogotku kon tungkuḷ in akuoi siningkuḻe bo dinuyáan.

⁷Sin ki TUHAN Allah in notuḷung kon inakó, dá akuoi in diá pinokopo oyámai. Akuoi in noginrigon kon ginaku sinbá mokoigon; kinotaauanku kon akuoi in diábí pokopooyáanmai.

⁸Sin ki Allah in nodiug, Sia in noponiata kon akuoi in diá kotaḷá. Ki ine in moibog mobobayowan takinku? Igai mayá simindog moyotakin. Ki ine in moḷawang kon inakó? Potabádon mangoi dimiug kon inakó.

⁹Totuu, ki TUHAN Inta Totok in moḷantud in moduḷu kon inakó, ki ine in mokobaḻí moguman kon akuoi in kotaḷá? Komintan intau inta moponapud kon inakó in moyopúbí naonda bo yumbit in ketek kinaan in anoi.

¹⁰Ei moiko inta mohoromat kon i TUHAN, bo inta nokidongog kon tosingogon in mogogundoi-Nea, daḷan inta binayáan monimu degá nosindip, bo diá in sindar inta nonindar kon inimu; táe popirisayadon kon i TUHAN; kadaidon kon i Allahmu.

¹¹Ei moiko inta moibog mopobodito kon intau ibanea, moiko in yopúonbí in tomayámu tontaní. Ki TUHANbí in mopobaḻí intua. Moiko in rorigaanbí totok.