Read Mongondow YESAYA 53 Bible Online

YESAYA 53 - Mongondow bible

YESAYA 53

¹Bangusa tatua in notubag, “Ki ine in mopirisaya kon onu inta ain dinongog nami? Kon i ine in pinoponiataan in kawasa i TUHAN?

²Ki TUHAN in moibog kon bobantung-Nea tua in naonda bo tokat inta nobiag kon butá inta diádon notoḷubú. Diábí in mogaga in kon inia in indoian naton; diábí in mokoangá inta koibog naton.

³Kita in moningkuḻe bo yumayú kon inia, intau inta nopuḻing in roriga bo nobiasa mobaba kon takit. Diá tobatúmai in intau in moibog imindoi kon inia, bo kita in diá doman moindoimai kon inia.

⁴Bokaka takitbí naton in inta binabanea, rorigabí naton in pinotaannea, bokaka kai naton in roriganea tatua in hukumanbí i Allah kon inia.

⁵Táe sia in pinaḻían popisí in dosa mita naton, bo binongkug popisí in aid naton inta moraat. Sia in ihukum sinbá kita in posaḷamaton, popisí in awaknea inta nobuog tua dá kita in inundaman.

⁶Kita komintan in noiḷangkam naonda bo domba, kon batúannea notayak kon daḷannea-daḷannea. Ki TUHAN ain nopouma kon inia in bayongan aid naton inta moraat.

⁷Iromu-romúmai in pinogogaid kon inia, táe binabanea intua takin gina nosabar. Diábí in sia noposingo-singog naonda bo ki adí in domba inta dinia kon tampat pororataan andeka ki iná in domba inta kinarugan in bubuḷnea.

⁸Sia in dinomok bo pinotayow kon pongadilan, bodongka dinia ihukum minatoi. Diábí in noindoimai kon ukurnea; sia in minatoi popisí in dosa in bangusa naton.

⁹Sia in iḷobong noyotakin in intau moraat; pinoḷobongan kon inia in kon yua-yuak in intau nooyúon, umpaka diá kon dodai in onda in sia in nogaid kon inta moraat, bo diá kon dodai in onda in nonguboḷ.”

¹⁰Ibogbí i TUHAN sia in kotugatan in roriga, bo moposarakan in kobiagan nobaḻí kuruban potobut kon dosa. Dá moumur in kobiagannea bo mokoontong kon buínea pongin inia ibog i TUHAN in koaidan.

¹¹Tuamai in ki TUHAN in noguman, “Naonda in nobaba mako kon roriga, sia in mosanangbí bo mopuas. Mogogundoi-Ku tua, inta mokosanang kon gina-Ku, ain nobaba kon hukuman in intau mobayong; pinodoyon kon inia Akuoi in mongampung kon i monia.

¹²Nobayagbí in ginanea in nobogoi in kobiagannea bo pinoyoiap intau moraat. Sia in nomotaan kon dosa in intau mobayong bo nosambayang sinbá mosia in ampungan.[75] Dá inogoian-Ku in sia in intau mobayong nobaḻí tombuinag, bo sia in nokouḻí kon tonsilai noyotakin in intau mita mobanar.”