Read Mongondow YESAYA 55 Bible Online

YESAYA 55 - Mongondow bible

YESAYA 55

¹KI TUHAN in noguman, “Igaidon in moiko komintan inta morogang, ponginumdon, tubig in sinadiadon. Angoidon in moiko inta diá kodoit, tarimadon in gandum inta diábí uboḻian, bo kaandon! Anggur bo susu in sinadiadon, tarimadon mako diábí uboḻian.

²Onubí in mangaḻenea in motaḷui kon onuka inta diá mokoguḻí kon ibog, bo mogaid kon onu inta diá mokobotug? Duduiaidon in parenta-Ku dá moiko in mokaanbí kon inta mopia, bo mokaan kon kaanon inta mopia in nanamnea.

³Indongogaidon, ei bangusa-Ku, angoidon kon i-Nakó, moiko in ogoian-Ku in kobiagan inta mononoi. Pinodoyon kon tabi bo kososatia inta pinodandi-Ku kon i Daud, Akuoi in notogot kon dandi mononoi takin i monimu.

⁴Totuubí, sia in baḻíon-Ku itoi bo umpung pongayow, sakusi in kawasa-Ku kon bangusa mita.

⁵Moiko in mogoiníbí kon bangusa mita ango-angoi, bo mosia in ḷagidon mamangoi kon inimu, podoyon kon i-Nakó, ki TUHAN Allahmu, Allah mokudus in Israel, sin Akuoi in nopoḷantudon kon i monimu.”

⁶Pobuidon kon i TUHAN kon dodai in mokopobuipa; pokuanidon kon i-Nia kon dodai in Sia nodiugpa.

⁷Igumon mako intau inta moraat in monompiadon kon kobobiagnea, bo momaḷui kon pororainea. Biódon mako in sia in mobui mangoi kon i TUHAN, sinbá mokouḻí kon totabi-Nea. Igumon mako sinbá sia in mamangoi bui kon i Allah naton, sin ki TUHAN in mongampung takin pia in gina.

⁸Ki TUHAN in noguman, “Raian-Ku in deemanbí raianmu, bo daḷan-Ku in deemanbí daḷanmu.

⁹Ná kinoyoyayú in ḷangit nongkon butá, dá natua doman in koḷantud in raian-Ku nongkon raianmu, bo daḷan-Ku kon ḻimonik in daḷanmu.

¹⁰Naonda bo uyan nongkon ḷangit, bo diá mobui monik, táe momuntadbí kon butá, mopoḷumbá bo mopobiag in pinomuḷa mita, mopomungai in inta pomuḷaan bui bo inta kaanon,

¹¹natua doman in tosingogon inta siningog-Ku diábí mobui kon i-Nakó takin diá in mangaḻenea, táe mokoaid kon onu inta kinoibog-Ku, bo mokodapot kon bayongan inta imakusud-Ku.

¹²Moiko in monaḷámai kon Babel takin pia in gina, bo inatod iḻumuai takin nosaḷamat. Buḷud bo tombuḷudnea in moḷunganga bo morogiow, pangkoi in kayu mita kon gobá in mononggoḷokap.

¹³Pangkoi in ḷokuyú in momaḷui kon pangkoi in bo bonganga, pinomuḷa bungang in momaḷui kon dogami. Tua in mobaḻí sinbá Akuoi in popotaau magí-mako; nobaḻí tomponuot inta mononoi inta diá mobuḻi-buḻi.”