Read Mongondow YESAYA 57 Bible Online

YESAYA 57 - Mongondow bible

YESAYA 57

¹Intau mopia bo motoindudui minatoi, diá in nomangaḻe andeka nonaridimai. Naonda in minatoi, mosia in noiḷagui nongkon bodito bo nogogai takin dame.

³Táe moiko inanakan mogogaid kon dosa, angoidon sin adilon! Moiko in diábí noiḻiu kon mososihir, intau inta moibog monuaḻing bo mopopotaḷui in awak!

⁴Ki ine in kosingan monimu? Ki ine in singkuḻeon monimu? Diá kinotaauan monimu kon moiko in buí in intau mouboḷ bo momomarontak?

⁵Moiko in mosumba kon dewa mita koḷumbaan takin mopomayá mako in awakmu dumudui kon ibog kon ḻimonag in pangkoi mita in kayu karamatmu. Moiko in moḷobong kon i adímu mita kon oyuk in ongkag bo kon sigad mita in batu.

⁶Dá patusbí in moiko mosipun kon batu mita moḷamag nongkon tua. Tuata in silaimu! Kon batu mita tatua doman moiko mopoburé in anggur bo moposumba in gandum. Kainimu kamai mopiabí in gina-Ku kon tua mita?

⁷Moiko in mayá kon tudu mita in buḷud sin moposumba in kuruban bo mopoorop in ibog in awakmu.

⁸Moiko moposindog in patongmu mita inta nomilang kon ngara in baḷoimu. Moiko ain nonaḷámai kon i-Nakó. Moiko in noḷongkut kon ḷambungmu bo noponik kon tosiugan inta pinooḷad in intau inta sinondananmu sin mosiug takinmu, bo moiko mopoorop in ibogmu.

⁹Moiko in nopomaké in ḷana bo inta mongo bo mongobondu, bo mayá mosumba kon i Dewa Molokh. Moiko in mopotabá in totabá mita mayá in butá mita inta moyayú nodapot in dunia in intau minatoi.

¹⁰Takin diá kodaitan in kamang moiko simiḷopí in motayak kon dewa mita. Kai monimu kamai yo mosia in mokopobogoibí in gina mobagu, modapot in moiko in diádon ḷumungkoyó.

¹¹Ki TUHAN in noguman, “Ki ine in dewa mita tatua inta nopobaḻí kon i monimu moondok, dá moiko in monguboḷ bo diádon mokotorop kon i-Nakó? Eta degá moiko in diádon mosumba kon i-Nakó popisí in Akuoi noonggot totok in kibio-biómai?

¹²Táe Akuoi in mopotaau kon inimu; kotoḷutuimu tatua in diábí totuu, bo bayongan in aidmu tatua in diábí in baragunanea kon inimu.

¹³Aka moiko momaḷú, yo biódon mako in patong mita tatua in moposaḷamat kon i monimu! Mosia in mobuḻibí poḷayugon in tompot bo moinggamá tongá tokokiap monag! Táe intau inta moniung kon i-Nakó in mogabatbí kon butá tatua bo mosumba kon i-Nakó kon Baḷoi-Ku.”

¹⁴Oyúon in noguman, “Aidaidon bo sadiadon in daḷan kon umat-Ku, Posídon in bayongan in tuḷamboi.”

¹⁵Sin nanaa in guman i Allah, Inta Totok in moḷantud bo mokudus, inta nongawasa modapot in mononoi, “Akuoi in nogutun kon tampat inta moḷantud bo inta motusi, táe kon yua-yuakbí doman in intau mita inta moompá in dodia bo inta nomanasaḷ in nogaid kon dosanea mita, sin mopoguḻí bui kon ibog bo kamang monia.

¹⁶Diábí modapot in mononoi Akuoi in mopotaḷá kon umat-Ku, diábí mononoi in tumorú in Akuoi, sinbá mosia in diá kobuḻian in ibog, bokaka Akuoibí in inta nomiag kon i monia.[77]

¹⁷Dosa in turá monia nokopopisí kon i-Nakó sinumorú, tuamai in ihukum-Ku in mosia bo sinaḷáan-Ku. Táe mosia in pamandot bo umuran momiḻí kon daḷannea tontaní.

¹⁸Akuoi in nokoontongdon kon dodia monia, táe mosia in bui-Kubí tompiaan. Kapiton bo tuḷungan-Kubí in mosia bo moḻipoi kon intau inta moajar in gina.

¹⁹Akuoi in mobogoibí in kobiagan moaman kon bayongan in intau, pinomayá inta nodiug andeka inta noyayú. Akuoi in monompiabí kon umat-Ku.

²⁰Táe intau moraat in naonda bo dagat inta nobokoḷ bo diá kon dodai in onda in moḷene. Toḷognea in modia kon ḷonggai bo yoná.

²¹Diábí in mokoaman kon intau binaradosa,” guman i TUHAN.