Read Mongondow YESAYA 58 Bible Online

YESAYA 58 - Mongondow bible

YESAYA 58

¹Ki TUHAN in noguman, “Pomaḷúdon podudui in ropotmu! Potaaudon kon umat-Ku in dosa mita monia.

²Mosia in mosumba kon i-Nakó pomuḷoi in singgai, bo moibog monotaau kon ibog-Ku, naonda bo moibog in mosia mogaid kon inta mopia, bo motoindudui kon hukum-Ku. Mosia in moguman kon mosanang in gina monia in mosumba kon i-Nakó bo moibog in hukum-Ku inta moadil.”

³Bangusa tatua in moḻibó, “Onu in mangaḻenea in mopuasa aka diá ontongon i TUHAN? Onu in mangaḻenea in kita in tumonsiup aka diá in Sia moindoimai?” Ki TUHAN in moguman, “Totuubí, kon dodai in moiko koyogot in mopuasa, moiko in motayak kon kauntungan tontaní bo momakisa kon intau mita inta sinokotondananmu.

⁴Koyogot in mopuasa, mobobayowan in moiko bo moropatoi bo mopobayá in oaidan takin romú. Kai monimu kamai dá popopuasa monimu in mokoḻiaibí kon gina-Ku sinbá mokidongog kon sambayangmu mita?

⁵Aka moiko mopuasa, moiko in moposikisa in awakmu; moiko in kumuyung naonda bo daun in bonok. Moiko in mopoompat in daing nongkon karong bo moponabud in ḷobud kon tudunea bo umuḻid. Tua degá inta sinangoian monimu mopuasa? Kainimu kamai mosanangbí in gina-Ku kon aid monimu tatua?

⁶Naabí in puasa inta kinoibog-Ku: Ḷuatdon in aid mopororiga bo bobabaan inta diá moadil, bo poḷuatdon in intau mita inta dinorot.

⁷Silaidon in kaanonmu takin intau inta gogoyon, tarimadon kon baḷoimu in intau mita inta diá kobaḷoi. Ogoiaidon in ḷambung in intau mita inta diá nogiḷambung, bo dika monoḻikud kon i utatmu inta paraḷu tuḷungan.

⁸Dá bayag in monimbayagdon kon inimu naonda bo modiug mobayag, bo kekebmu mita in ḷagidon mopia. Akuoi in moyotakinmubí sin moposaḷamat kon i monimu. Koangoian-Ku in mogoḻiungbí kon i monimu nongkon bayongan in tampat.

⁹Aka moiko mosambayang, indongogan-Ku intua. Aka moiko mokuani kon i-Nakó, tubagan-Ku. Dikadon bui mondorot kon tumpaḷa intau, gogaiaidon in sosaturuan bo tapud.

¹⁰Ogoiaidon in kaanon kon intau inta gogoyon bo tuḷungaidon in intau mita inta dinorot. Aka moiko mogaid kon natua, dá sindip kon ḻibumumai in mobayagdon ná singgai.

¹¹Akuoi in umuranbí mokapit kon i monimu bo mopobotug kon i monimu kon butá inta noingkag; Akuoi in moḷukadbí kon i monimu sinbá umuran mosehat bo moropot. Moiko in nádon onda bo taman inta tugat in tubignea, naonda bo bokaká inta diá mogio-giot.

¹²Kotá inta noonggotdon in nobaḻí rumbunnea in posindogonmudon bui kon tudu in orotan koyongan. Moiko in tangoiondon ‘Bangusa inta moposindogdon bui in dinding mita bo monompia kon baḷoi mita inta ain nogoguyaat.’ ”

¹³Ki TUHAN in noguman, “Horomatbí in singgai in Sabat saḷaku singgai kon i TUHAN. Dika mogaid kon kopontinganmu tontaní kon singgai tatua. Ramedon in singgai tatua nobaḻí singgai mokosanang kon gina; horomatbí in singgai i TUHAN takin diá maya-mayá mako; dika doman mogaid andeka mosingog kon diá in mangaḻenea.

¹⁴Dá, mopiabí in gina monimu sin mogundoi kon i-Nakó. Baḻíon-Ku in moiko horomaton kon sinangkub in dunia. Moiko in mobiagbí mosanang takin bungai in butá tonsilai i Yakub, mogoguyangmu. Akuoi, ki TUHAN ain nosingog.”