Read Mongondow YESAYA 66 Bible Online

YESAYA 66 - Mongondow bible

YESAYA 66

¹Ki TUHAN in noguman, “Ḷangit in ḷoḻitúan-Ku pomarentaan, bo butá in tosindogan-Ku. Dá baḷoibí naonda in posindogonmu kon i-Nakó, bo tampat onu in pomiaanmu sin pogutunan-Ku?

²Dunia naa in ḻima-Ku tontaní in nomia, dá tua komintan in pinomia. Táe koibog-Ku in intau inta moompá in dodia, inta nomanasaḷ in nogaid kon dosanea mita, inta moondok bo inta motoindudui kon i-Nakó.

³Táe bangusa tatua in mogaid kon onu in koibog monia; mopia in gina monia kon pooibada inta mokorongó. Kon i monia diábí in yoposinea: mopokuruban in sapi koḷakian bo mopokuruban in intau, mopokuruban in ki adí in domba bo momutoḷ kon sigogow in ungkú; moposumba in gandum bo mopokuruban in dugú in boké, motubá kon kamania bo mosumba kon patong.

⁴Tuamai Akuoi doman in mogaidbí kon onu in koibog-Ku bo mopouma kon i monia in bodito mita inta koondok monia. Sin kon tungkuḷ in Akuoi nogoiní, diá in notubag; kon tungkuḷ in Akuoi nosingog, diá in nokidongog. Mosia in moibo-ibogbí moḷawang kon i-Nakó bo mogaid kon inta moraat.”

⁵Indongogaidon onu in pinoguman i TUHAN, ei moiko inta moondok bo motoindudui kon i-Nia, “sin moiko in motoindudui kon i-Nakó, oyúon in kon sigad in bangusamu inta morongó kon i monimu, bo doí moyobayat monimu. Mosia in mopoyagi-yagimai kon i monimu pongin moguman, ‘Pomayádon mako in ki TUHAN mopoontong in kamuliaan-Nea, sinbá kami in mokoontong kon ḷunganga in ginamu.’ Táe mosiadon tontaní in bui mooyá.

⁶Indongogai! Oyúon in singog in gonugur kon kotá; oyúon in singog nongkon Baḷoi-Ku; tuata in singog-Ku inta koyogot motuḻí kon musung!

⁷Kotá motusi-Ku in naonda bo iná tobatú inta nononggadí kon dodai in diápa monahang kon monakit; inta nopononggadí in adí ḷoḷaki kon dodai in diápa pomangiton.

⁸Ki ine in nokoimontandon in nokodongog kon inta natua? Ki ine in nokoimontandon nokoontong kon natua? Táe bangusa in Israel aindon pinononggadí kon dodai in Sion nomangkoidon pomangiton.

⁹Dika kai monimu kamai Akuoi in modia kon umat-Ku modapot in wakutu mononggadí bo diá mopomayá mako kon i monia pononggadí.” Natua in guman i TUHAN.

¹⁰Poḷungangadon moyotakin in Yerusalem, ei bayongan in intau inta motabi kon inia. Moiko inta nonogumatoi popisí in sia, tanaa in motaaudon morame moyotakin.

¹¹Moiko in motarimabí kon kobiagannea inta motompia, naonda bo adí tobatú moneté kon i inánea.

¹²Sin ki TUHAN in noguman, “Moiko in ogoian-Ku in kobiagan motompia naonda bo ongkag inta moiḻig kaoyúonan in bangusa mita in diaan poangoi kon inimu naonda bo ongkag inta moiḻebe-ḻebet. Moiko in naonda bo adí inta pinoteté bo kokoyo-koyot i inánea, bo iyapumai kon tompunukaneamai.

¹³Akuoi in moḻipoi kon i monimu kon Yerusalem, naonda bo ki iná inta moḻipoi kon i adínea.

¹⁴Mokoontongmai kon tua, mopiabí totok in gina monimu bo moropotdon bui bo mosehat naonda bo bonok mobagu. Dá mogogundoi-Ku mita in mokoalamibí kon kawasa-Ku bo musung-Ku mita in mokorasa kon torú-Ku.”

¹⁵Totuu, ki TUHAN in mamangoibí takin tuḷú; Sia in tumakoibí kon kereta-Nea ná deḷang, sin mopobayá in torú-Nea, bo mongguak moropot.

¹⁶Sin bayongan in intau inta kinokadapatan kotaḷá in hukumon-Neabí in tuḷú bo pitow, bo mobayongbí in hukumon matoi.

¹⁷Ki TUHAN in noguman, “Bayongan in intau inta nopotusi in awak sin moyotakin mayá in gobá mita kon dewa mita[88] bo moibada kon i monia, in mobuḻibí moyotakin in intau mita inta nokaan kon tapú in boké bo boyod takin kaanon mita inta mokorongó.

¹⁸Akuoi in nonotaaubí[89] kon raian bo aid monia. Akuoi namangoi[90] sin mosipun kon intau mita nongkon bayongan bangusa. Kon tungkuḷ in mosia moyosipun, mosia in mokoontongbí kon kawasa-Ku.

¹⁹Akuoi in mopoukatdon in tomponuot tobatú kon yua-yuak monia. Tongosilai moyakag kon sigad monia in posaḷamaton-Ku. Mosia in potabá-Ku mayá kon bangusa mita kon butá mita inta moyayú inta diápa kon dodai in onda in nokodongog kon soaḷ Akuoi andeka nokoontong kon kamuliaan bo kawasa-Ku; mayá in Spanyol, Libia,[91] bo Lidia takin momomiot mita inta mongotaná, minayá in Tubal bo Yunani. Mosia in mopohabar in koḷoḷoben in kawasa-Ku kon sigad in bangusa mita tatua.

²⁰Nongkon butá mita tatua mosia in modia bui kon i utatmu mita tongobangusa monag mobaḻí tombuinag kon i-Nakó. Mosia in modiabí kon intau mita tatua mayá in tombuḷud inta motusi[92] kon Yerusalem takin tumakoi kon kabaḷo, keledai bo unta, bo takin kereta bo roda, ná biasamai intau in Israel modia mopobayá kon Baḷoi TUHAN sosumba gandum kon bonu in tampat inta modarit.

²¹Tongosilai in kon sigad monia in baḻíon-Ku imang bo intau in Lewi.

²²Ná ḷangit mobagu bo butá mobagu in monahangbí popisí in kawasa-Ku, natua doman in buímu bo tangoimu in umuranbí oyúon.

²³Pomuḷoi in buḷan mobagu bo pomuḷoi in singgai in Sabat bayongan in intau in mamangoibí sin mosumba kon i-Nakó kon Yerusalem.

²⁴Kon tungkuḷ in mobuat, mosia in mokoontongbí, kon mayat in intau mita inta ain nomarontak kon i-Nakó. Uḷod inta nokaan kon awak monia in diábí matoi, bo tuḷú inta nomokak kon i monia in diábí mopiong; kinoontongan tobatú inta mokokoningkim kon bayongan in intau.”