Read Mongondow YESAYA 7 Bible Online

YESAYA 7 - Mongondow bible

YESAYA 7

¹Ki Datu Ahas in ki adí ḷoḷaki i Yotam ki ompu i Uzia. Kon tungkuḷ in sia nomarenta kon Yohuda, nobaḻídon in parang. Dá ki Rezin datu in Siria, bo ki Pekah ki adí ḷoḷaki i Remalya datu in Israel, namangoi nonubu kon Yerusalem. Táe mosia in diábí nokoagow kon kotá tatua.

²Kon dodai in ki datu in Yohuda nokodongog kon tontara in Siria in sinumuotdon kon butá in Israel bo nobaḻídon totakin, sia takin bangusanea totokdon in noondok, nodapot in gugurdon mako in mosia naonda bo pangkoi in kayu inta dinandú in tompot.

³Ki TUHAN in noguman kon i Yesaya, “Diadon in ki adímu ki Syear Yashub[8] bo bayádon pokipodungkuḷ kon i Datu Ahas. Iko in moyodungkuḷneabí kon popod in got in tabang kon ḻimonikan, kon pomomataan in momomatá mita.

⁴Pogumandon kon i datu kon sia in musti tantú mosadia bo umuran mokopoonow. Dikabí in sia moondok andeka motoboḻingo. Torú i Datu Pekah bo i Datu Rezin takin tontaranea intau mita in Siria tatua in diábí noiḻiu kon doyowa in oḷuton inta nonompoyok.

⁵Siria in ain noyopopog in Israel bo datunea.

⁶Mosia in moibog monubu kon Yohuda bo nopogogondok kon intau inta nogutun kon tua sinbá dumotá kon i monia, bo noduí kon i adí ḷoḷaki i Tabeel nobaḻí datu.

⁷Táe Akuoi ki TUHAN, moguman kon tua in diábí mobaḻí,

⁸sin Siria in diábí moropo-ropot nongkon Damsyik iná in kotánea, bo Damsyik in diábí moropo-ropot nongkon i Datu Rezin. Umpaka kon bonu in onom nopuḷú bo ḻima notaong, Israel in mosila-silaibí modapot in diádon monahang saḷaku bangusa.

⁹Israel in diábí morop-ropot nongkon Samaria, ibukotánea, bo Samaria in diábí moropo-ropot nongkon i Datu Pekah. Aka moiko diá totu-totuu mopirisaya kon i-Nakó,, notantú bidon kon moiko in diábí mokotongod.”

¹⁰Ki TUHAN in nopotaau in koyow ibanea kon i Ahas:

¹¹“Poigumdon sinbá ki TUHAN Allahmu in mobogoi in tobatú tomponuot kon inimu, pinomayá nongkon dunia in intau minatoi kon ḻimonag, andeka nongkon ḷangit kon ḻimonik.”

¹²Ki Ahas in notubag, “Akuoi in doíbí moigum kon tomponuot. Akuoi in doíbí monungkuḷ kon i TUHAN.”

¹³Bo ki Nabi Yesaya in noguman, “Aka natua, indongogai uḻe buí i Datu Daud! Diápa tugat in moiko in monungkuḷ kon kososabar in intau, modapot in moiko in monungkuḷ doman kon kososabar i Allahku?

¹⁴Tanaa, ki TUHAN tontaní in mobogoi in tomponuot kon inimu: Mongodeaga tobatú[9] inta sidia in mopononggadíbí in ḷoḷaki tobatú inta sinangoiannea Imanuel.[10]

¹⁵Kon tungkuḷ in tugatdon in koḷobennea monantú kon tosingogonnea tontaní, ḻipú tatua in mobiagdon mooyúon.[11]

¹⁶Sin kon dodai in wakutu tatua diápa moiangoi, ḻipú doyowa inta pinarenta in datu mita inta kinoondokmu tatua in taḷaanbí diádon in intau.

¹⁷Ki TUHAN in mopoangoibí in datu in Asyur, bo iko takin motoḷuadímu takin rayatmu in mokorasa kon singgai mita inta nopuḻing in roriga inta motoyang totok nongkon onu inta ain nokoimontan kinorasaan monimu pinangkoi kon kinobotakan in dodatuan in Israel bo Yohuda.

¹⁸Kon tungkuḷ intua ki TUHAN in mogoiníbí kon intau in Mesir bo intau in Asyur, bo bangusa doyowa tatua mamangoi naonda bo paanan in ḷangow bo pasukan inta noḻibut kon oyuk mita noirib bo sigad mita in batu karang. Mosia in momumbunbí kon batúan in bo bonganga bo bayongan in tampat inta ḻimbuyun.

²⁰Ki TUHAN in monondanbí kon datu in Asyur sin mopomia kon Israel naonda bo intau mongongarug inta mongarug komintan kon buok bo bubuḷ kon awak.

²¹Kon dodai intua, aka intau tobatú momiag kon sapi tobatú batánea bo bembé tongá doyowa,

²²yo tubig in teté in bobiagon tatua in moiḻiubí kon tugat poinumon kon intau mita inta ki agatnea kon butá tatua. Totuu, mosia in monginumbí kon susu bo biluk.

²³Kon tungkuḷ intua gobá mita in anggur inta kon batúannea pinomuḷaan kon pangkoi in anggur toribu bo inta boḻinea in toribu in doit saḷaka, in kobiagan in bo bonganga.

²⁴Intau inta mayá intua musti modia kon piot bo puḷunea, sin sinangkub in butá tatua nopuḻing in bo bonganga.

²⁵Bo butá kon buḷud inta biasamai tonggobaan bo ponompinomuḷaan in nopuḻing doman in bo bonganga, modapot in intau diádon mokobaḻí mayá intua. Butá tatua in tongádon mobaḻí pongongaanan in sapi bo domba.”