Read Mongondow YESAYA 9 Bible Online

YESAYA 9 - Mongondow bible

YESAYA 9

¹Bangusa inta nobiag kon bonu in sindip mokoontongdon kon bayag moḷoben. Inta nogutun kon bonu in oḻinow in popatoi sinimbayagan in sindar nobayag.

²TUHAN, inogoian-Mu in mosia in ḷunganga moḷoben,[18] Binaḻí-Mu in mosia norogiow. Nopia totok in gina monia popisí in kopopia-Mu, naonda bo intau inta noḷunganga in gina kon tungkuḷ in nosipun kon bungai in boyó, andeka nosilai kon inta inagow kon parang.

³Iko ain nogamá kon binabanea inta nobogat bo kayu pomomotaanan nongkon obaganea. Iko in nonaḷow kon bangusa monondorot tatua inta nopogutú kon umat-Mu. Notongkai ná dungkuḷmai kon tungkuḷ in Iko nonaḷow kon tontara in Midian.

⁴Singog in sapatu in tontara inta kodongogan bo ḷambungnea inta nopuḻing in dugú, modait kaanon in tuḷú.

⁵Adí tobatú ain pinononggadí kon i naton; kita in pinonotabian in ḷoḷaki tobatú. Sia in mobaḻí itoi naton. Sia in sinangoian: “Monononggina Mobijaksana”[19] “Ki Allah Inta Motorindog”. “Ki Amá Inta Mononoi”. “Datu in Dodamean”.

⁶Sia in momarenta saḷaku datu buí i Daud, kawasaannea totok in moḷoben. Butánea in umuran modame bo mobiag mooyúon; pomarentaannea in pinodoyon kon hukum bo koadilan tanaa mako modapot in mononoi. Ki TUHAN Inta Totok in Mokawasa notantúbí kon mogaid kon tua.

⁷Ki TUHAN ain nopoḷabú in hukuman kon dodatuan in Israel.

⁸Bayongan in intau in Israel bo intau in Samaria in monotaaubí kon ki TUHANbí inta ain nogaid kon tua. Tanaa moḷoḷatú in mosia bo motosiḷantud. Guman monia,

⁹“Baḷoi mita nongkon tela noumpagdon, táe buibí posindogon nami in baḷoi mita mobagu inta pomiaan nongkon batu. Pangkoi mita in ara pinupuḷdon, táe baḷuaianbí nami in kayu ḷokuyú in Libanon inta totok in mopia.”

¹⁰Ki TUHAN ain nopotabá kon musung monia[20] sin monayow kon i monia.

¹¹Bangusa in Siria kon dotá pomukaan bo bangusa in Pilistin kon dotá toyopan in nogagow kon Israel. Táe ki TUHAN in sinumorúpabí bo umuranpa mohukum.

¹²Bangusa in Israel diápa doman nomanasaḷ, umpakabí ain ihukum i TUHAN Inta Totok in mokawasa; mosia in diápa doman in tobat kon i-Nia.

¹³Tuamai in tongá tosinggai in ki TUHAN in nohukum kon i itoi mita in Israel bo rayatnea. Pinongkó bo iḷumbú-Nea in uḷu bo iputnea.

¹⁴Uḷunea in guhanga mita in ḻipú bo intau mita inta ihoromat, iputnea in nabi mita inta nobogoi in totundú mita inta mokoḷaḻe.

¹⁵Itoi mita in bangusa tatua ain nopoḷaḻe bo nopodoḻiok kon rayat.

¹⁶Bangusa tatua ain nonaḷámai kon TUHAN bo moromúdon bo bayongan in tosingogon monia moraat. Tuamai in kon sigad in tayow mobiag mita diá tobatúmai in sinaḻiban i TUHAN. Sia in diábí notabi kon boba-bobay mita bo uno-unon. Táe ki TUHAN in sinumorúpabí bo umuran mohukum.

¹⁷Kororaat in bangusa tatua in nonurub naonda bo tuḷú inta noḷeḷep kon dogami. Dokotnea in naonda bo kayuon noturub inta nopodamonik in poyok mobarong.

¹⁸Ki TUHAN Inta Totok in mokawasa sinumorú totok, bo hukuman-Nea in naonda bo tuḷú inta moborambang bo bangusa tatua in kayu inta pinondudub inta nodaitnea kinaan. Diábí tobatúmai in intau in motabi kon i utatnea.

¹⁹Kon sinangkub in butá tatua mosia mogagow bo mokaan kon onukabí in motaau kaanon, táe diábí in mosia mokorasa kon mobotug. Nodapotbí in mosia mokaan kon topotakin mita monia tontaní!

²⁰Intau in Manasye bo intau in Epraim mositubuan, bo moyotakin monayow kon Yohuda. Táe ki TUHAN in sinumorúpabí bo umuran mohukum.