Read Mongondow IMAMAT 1 Bible Online

IMAMAT 1 - Mongondow bible

IMAMAT 1

¹Nongkon Ḷoḷaigan-Nea, ki TUHAN nogoiní kon i Musa bo nopotaau in atorang mita tatua kon inia

²inta musti duduian in intau Israel. Aka intau tobatú moposumba in biag mobaḻí kuruban inta tubáan kon i TUHAN, sia in motaaubí moposumba in sapi, domba ande bembénea.

³Aka inta pinosumbanea tua bo sapi tobatú, dá biag tatua in musti koḷakian bo inta mopia totok. Sapi tatua musti diaannea pobayá in ngara in Ḷoḷaigan i TUHAN, sinbá koibog i TUHAN in intau tatua.

⁴Bo sia in musti mopoukat in ḻimanea kon uḷu in biag tatua, dá sosumbanea in tarimaan i TUHAN mobaḻí pongampung kon dosanea.

⁵Onda intua sapi tatua musti ratáan kon tayowon ngara in Ḷoḷaigan. Dugúnea musti posumba in imang mita inta buí i Harun kon i TUHAN, bodongka popobutak kon sí mita in mezbah inta opat tatua kon tayowon ngara in Ḷoḷaigan.

⁶Onda intua musti ingkuḻitan intau tatua in biag tatua bodongka yingatonnea.

⁷Imang mita musti monontuḷú kon tudu in mezbah bo mopondudub in kayu pondungú kon tudunea.

⁸Kuruban inta ain iyingat tatua, takin uḷu bo ḷongónea, musti ukaton monia kon tudu in tuḷú.

⁹Bo intau tatua musti mondarit kon bonu in sian takin paa in sapi tatua, bo imang inta mogaid kon oaidan tatua musti motubá kon tua mita. Rongingi in kuruban sinubá tatua mokosanang kon gina i TUHAN.

¹⁰Aka inta pinosumba tatua bo domba tobatú ande bembé, dá biag tatua musti koḷakian bo inta totok in mopia.

¹¹Intau tatua musti moratá kon biag tatua kon dotá in utuan mezbah, bo imang mita musti mopobutak in dugúnea kon sí opat in mezbah tatua.

¹²Naonda in biag tatua pinongko-pongkódon, bayongan inta pinongkó tatua, moitakin doman in uḷu bo ḷongónea, musti tuduon in imang kon tudu in tuḷú kon mezbah.

¹³Bo intau tatua musti mondarit kon bonu in sian bo páa in biag tatua. Onda intua imang musti moposumba intua komintan kon i TUHAN, bo tubáannea kon tudu in mezbah. Rongingi in kuruban tatua mokosanang kon gina i TUHAN.

¹⁴Aka inta pinosumba tatua bo ḷagapan tobatú, dá musti ḷagapan tarangkuku ande ḷagapan paḷoma inta moḻineapa.

¹⁵Imang musti modia kon ḷagapan tatua pobayá in mezbah, bodongka pitoian in sigogownea bo uḷunea tubáan kon tudu in mezbah. Dugú in ḷagapan tatua musti romputon poḷuai kon símai in mezbah.

¹⁶Bombaḷunan takin bayongan bonunea musti poḷuaion, bodongka ḷumbúon kon dotá utuan in mezbah kon tampat in ḷobud.

¹⁷Onda intua koḻikip in ḷagapan tatua musti yabion táe dika dapot in moyotontaní in awaknea. Bo ḷagapan tatua musti tubáan kon tudu in mezbah. Rongingi in kuruban sinubá tatua mokosanang kon gina i TUHAN.