Read Mongondow IMAMAT 10 Bible Online

IMAMAT 10 - Mongondow bible

IMAMAT 10

¹Kon singgai tobatú ki adí mita i Harun ki Nadab bo ki Abihu, tumpaḷa nogamá kon tampat in tuḷú bo nomonu kon baga. Bo nopoukat in dupa kon bonu in tuḷú tatua bo noposumba kon i TUHAN. Táe tuḷú tatua kinodoíbí i TUHAN sin ki TUHAN in diábí nopotabá kon i monia noposumba intua.

²Dá ki TUHAN nopouma in tuḷú kon i monia bo poḷat nomokak kon i monia dapot in minatoi kon Ḷoḷaigan i TUHAN.

³Bo ki Musa in noguman kon i Harun, “Tuata in makusud i TUHAN kon dodai in Sia noguman, ‘Bayongan intau inta mogaid kon oaidan-Ku musti mohoromat kon kotusian-Ku. Poniata-Kubí in kawasa-Ku kon bayongan bangusa-Ku.’ ”[3] Táe ki Harun tongádon kibio-biómai.

⁴Onda intua ki Musa nogoiní kon i Misael bo kon i Elsapan, ki adí mita i Uziel, inta pokuamáan i Harun. Ki Musa in noguman kon i monia, “Koḻigaidon kon naa bo gamádon in mayat i utat monimu nongkon Ḷoḷaigan i TUHAN bo ukatdon kon ḷuai in ḷoḷaigan.”

⁵Mosia in namangoi bo nodia kon mayat mita tatua inta nogiḷambungpa tatua bo pinoḷuai kon Ḷoḷaigan, ná inta ain pinoki aid i Musa.

⁶Bo ki Musa in noguman kon i Harun bo kon i adínea mita ibanea, inta ki Eleazer bo ki Itamar, “Dika mokuyang in gina monimu popisí in kinopatoian tatua. Aka moiko momia kon natua, yo matoi doman, bo bayongan umat Israel torúan i TUHAN. Táe bayongan intau Israel ibanea in motaaubí in mogi morondí sin kinopatoian intau doyowa tatua inta popisí in tuḷú nongkon i TUHAN.

⁷Dika monaḷámai kon Ḷoḷaigan i TUHAN sinbá diá matoi in moiko, sin moiko aindon binaḻí imang takin ininggúan in ḷana upacara sin mogaid kon oaidan i TUHAN.” Mosia in nogaid kon ná inta ain pinoguman i Musa.

⁸Ki TUHAN noguman kon i Harun,

⁹“Naonda in mopaḷut mako monginum kon anggur ande oinumon mokoḷoḷangu, iko bo ki adímu mita in diábí motaau in tumuot kon bonu in Ḷoḷaigan-Ku. Aka moiko ḻimimpat kon atorang tatua, yo matoi. Atorang tatua musti duduian in bayongan buímu.

¹⁰Moiko in mustibí motaau mopoyoposi kon inta sinantú kon i Allah bo inta diá sinantú, inta nonajis bo inta diá nonajis.

¹¹Bayongan hukum inta inogoi-Ku kon inimu pinongin i Musa, musti motaau tundúon monimu kon bangusa Israel.”

¹²Ki Musa noguman kon i Harun bo kon i adínea mita inta ki Eleazer bo ki Itamar, “Pogamádon kon gandum inta ki agat in kaanon inta pinosumba kon i TUHAN. Nongkon topong tatua pogaidaidon kon roti inta diá ragian, bo kaandon intua kon sí in mezbah, sin kuruban tatua totok in motusi.

¹³Roti tatua musti kaanon kon tampat inta motusi, sin nongkon kaanon inta pinosumba kon i TUHAN, roti tatua in nobaḻí silaimu bo i adímu mita inta ḷoḷaki. Tua in parenta i TUHAN kon inakó.

¹⁴Táe iko bo ki adímu mita ḷoḷaki bo bobay motaaubí in mokaan kon dodob in mahaḷuk inta nongkon sosumba inta sinonoi bo páa nongkon sosumba inta pinonangoi. Tuata in silai in imang mita nongkon kuruban dodamean in bangusa Israel. Motaaubí kaanon monimu intua kon bayongan tampat inta diá monajis.

¹⁵Páa inta kon sosumba pinonangoi bo dodob inta kon sosumba sinonoi tatua musti diaan poyotakinon in ḷongó inta baḻíon kuruban tubáan mobaḻí sosumba ponangoi kon i TUHAN. Tua mita in nobaḻíbí silaimu bo i adímu mita dapot kon ompu mita, ná inta ain pinotaau i TUHAN.”

¹⁶Onda intua ki Musa in noḻibó soaḷ bembé inta baḻíon kuruban potobut kon dosa. Pinotaaudon kon inia kon bembé tatua aindon sinubá. Aid tatua nokopomuká kon torú i Musa kon i Eleazer bo kon i Itamar, bo sia noḻibó kon i monia,

¹⁷“Nongonu sin kuruban pinotobut kon dosa tatua diábí kinaan monimu kon tampat inta motusi? Kuruban tatua totokbí in motusi; Inogoi i TUHAN intua kon inimu, sinbá dosa in umat Israel ampungan.

¹⁸Dugú in bembé tatua diá dinia pinobayá in Ḷoḷaigan i TUHAN, dá sabanarnea in mustibí kaanon monimu in kuruban tatua kon tua ná inta ain pinogumanku.”

¹⁹Tubag i Harun, “Totuubí kon singgai naa umat Israel aindon noposumba in kuruban potobut kon dosa bo kuruban tubáan kon i TUHAN. Umpaka natua, bodito tanaa aindon noiantug kon inakó. Aka kuma kon singgai naa akuoi mokaan doman kon kuruban potobut kon dosa tatua, yo degá mopia in gina i TUHAN?”

²⁰Nosanang in gina i Musa nokodongog kon tubag tatua.