Read Mongondow IMAMAT 13 Bible Online

IMAMAT 13 - Mongondow bible

IMAMAT 13

¹Ki TUHAN nobogoi kon i Musa bo kon i Harun in atorang mita tanaa:

²Aka intau bo kobiagan inta mobobentuḷ mita takin bobagá mita ande oḷaap mita kon kuḻitnea inta mobaḻí panyaki kon kuḻit inta mokobahaya, dá sia in mustibí diaan kon imang buí i Harun.

³Musti taridion i imang tatua in panyaki intau tatua. Aka poyuntung kon diug in panyaki tatua mobaḻí mobudó, bo inta monakit tatua koontongan notongkuriong monag, dá intau tatua kino tugatandon in panyaki kuḻit inta mokobahaya. Dá musti poguman i imang kon intau tatua in nonajis.

⁴Táe aka inta kon kuḻitnea tatua tongábí oḷaap bo kuḻitnea in diábí notongkuriong, bo poyuntungnea in diá doman nobaḷui nobudó, dá intau tatua in tongápa potontanímai mako kon bonu in pitu nosinggai.

⁵Kon singgai noginpitu, sia musti taridion buí i imang. Bo aka sinaridinea mako bo panyaki tatua umuranpabí tongá natua bo diábí iḷumekep magí mako, yo intau tatua in buipa doman potontaní kon bonu in pitu nosinggai.

⁶Kon singgai noginpitu ki imang musti monaridi bui, bo aka panyaki tatua nopopatdon bo diábí iḷumekep, dá musti potaau i imang kon intau tatua in nodaritbí. Tua in panyaki kuḻitbí inta diá mokobahaya. Intau tatua musti momatá kon pakeangnea bo mobaḻídon modarit in sia.

⁷Táe naonda in imang mopaḷut mako noguman kon sia in nodaritbí bo noniata magí panyaki tatua iḷukepdon, dá sia in mustibí bui mayá kon i imang.

⁸Ki imang musti bui monaridi, bo aka panyakinea tatua aindon iḷumekep, dá intau tatua musti poniata kon ain nonajis; sia kino tugatan in panyaki kuḻit inta mokobahaya.

⁹Intau tobatú inta kinotugatan in panyaki mokobahaya musti diaan pobayá kon i imang.

¹⁰Aka podudui in hasil pinonaridian i imang bo kon kuḻit intau tatua oyúon in bobagá inta nonomata bo poyuntung kon kuḻitnea tatua nobaḻídon nobudó,

¹¹dá intau tatua kinotugatandon in panyaki inta mokobahaya. Ki imang musti moponiata kon intau tatua in nonajis. Diáka bidon mopoyayú kon inia, sin nosilangdon kon sia tua in nonajis.

¹²Aka inontongdon i imang kon inta tumbobog mita nobudó tatua aindon noiḻekep nongkon uḷu dapot in sioḷ,

¹³bo podudui in pinonaridiannea panyaki tatua aindon noiḻekep kon bayongan awak bo bayongan awaknea nobaḻídon nobudó komintan, dá intau tatua poniatadon kon nodarit.

¹⁴Táe aka momuká in tumbobog, dá musti bui taridion i imang in sia.

¹⁵Aka tua bo tumbobogbí, yo intau tatua in musti poniata kon nonajis, sin sia in kino tugatan in panyaki kuḻit inta mokobahaya.

¹⁶Táe aka tumbobog tatua bo mopia bo mobaḻídon mobudó bui, intau tatua musti mayá bui kon i imang

¹⁷sin mokitaridi bui. Aka tumbobog tatua totuu kon nobaḻídon nobudó, dá ki imang musti moponiata kon nodaritdon in sia.

¹⁸Aka intau tobatú kobitul inta nopiadon,

¹⁹táe kon kabangnea kinobiagan in bobog mobudó bo oḷaap inta mobudó nosimpuya, dá intau tatua musti mayá kon i imang

²⁰sin mokitaridi. Aka oḷaap mita tatua nokuriong bo poyuntung inta kon kuḻit tatua nobaḻídon doman nobudó, dá musti poniata i imang tatua kon intau tatua in nonajis. Bituḷ tatua in pinomangkoian panyaki kuḻit inta mokobahaya.

²¹Táe aka naonda in sinaridi mako i imang bo poyuntung inta kon kuḻit tatua diábí nobaḷui nobudó, bo diábí nokuriong, tongábí noḻin guod in batangannea, dá intau tatua musti potontanípa kon bonu in pitu nosinggai.

²²Aka oḷaap nobudó tatua bo moiḻekepdon, dá ki imang musti moponiata kon intau tatua nonajis sin kinotugatandon in panyaki kuḻit inta mokobahaya.

²³Táe aka oḷaap tatua diábí mobaḷui bo diá doman moiḻekep, tua in tongábí kabang in bituḷ, dá intau tatua in poniatadon kon nodarit.

²⁴Aka intau tobatú nokouḻí kon kekeb noḷontup, bo kuḻit kon kekeb tatua nobaḻídon nobudó ande nobudó noḻin puya-puya,

²⁵dá ki imang musti monaridi kon tua. Aka poyuntung inta kon kekeb tatua nobaḷuidon nobudó bo kekebnea nokuriongdon, dá panyaki inta mokobahaya tatua noidakitdon kon kekeb inta noḷontup tatua, dá ki imang musti moponiata kon intau tatua nonajis.

²⁶Táe aka poyuntung kon kuḻit tatua diá nobaḻí nobudó bo diá doman nokuriong, tongábí noḻin guod in batangannea, dá intau tatua musti potontaní kon bonu in pitu nosinggai.

²⁷Kon singgai noginpitu ki imang musti monaridi bui kon inia. Aka oḷaap tatua ḷumekep, dá intau tatua kinotugatan in panyaki kuḻit inta mokobahaya, bo musti poniata kon nonajis.

²⁸Táe aka oḷaap nobudó tatua diá nobaḷui bo diá doman ḷumekep, tongábí modugang in kobudónea, dá tua in deemanbí panyaki kuḻit inta mokobahaya. Musti poniata i imang kon intau tatua in nodaritbí, sin inta nobudó tua in tongábí kabang noḷontup.

²⁹Aka ḷoḷaki ande bobay tobatú kino tugatan in panyaki kuḻit kon uḷu ande kon ayoinea,

³⁰sia musti taridion i imang. Aka inta monakit tatua moḻin kuriong, bo buok ande kumi kon tua bo mopodara-darag bodongka moḷabú, dá intau tatua kinotugatan in panyaki kuḻit inta mokobahaya bo musti poniata kon nonajis.

³¹Aka naonda in pinirikisa mako i imang bo kuḻit inta monakit tatua diá nokuriong, táe diá in buok ande kumi inta nosehat kon kuḻit tatua, dá intau tatua musti popotontanípa kon bonu in pitu nosinggai.

³²Kon singgai noginpitu, musti buidon taridion i imang in kuḻit inta monakit tatua, bo aka panyaki tatua diá ḷumekep bo diá doman kouḻían kon buok ande kumi inta mopodara-darag kon kuḻit tatua, bo diá doman nokuriong in kuḻit tatua,

³³dá intau tatua musti mokigonsing ande mongarug kon kuminea kon tudu in kuḻit inta monakit tatua. Bo sia in buipa popotontaní kon bonu in pitu nosinggai.

³⁴Kon singgai noginpitu, ki imang musti monaridi bui. Aka panyakinea tatua diá ḷumekep bo kuḻit inta kino biagannea tatua diábí mokuriong, dá intau tatua in poniatadon kon nodaritbí bo musti momatá kon pakeangnea.

³⁵Táe aka naonda in pinoniata mako kon sia in nodarit tongá indoianmai panyakinea tatua ḷumekepbí

³⁶dá musti bui taridion i imang in sia. Aka panyaki tatua ḷumekepbí, dá diá bidon paraḷu in ki imang monaridi mongo buok ande kumi intau tatua nodaragdon, sin nosilang bidon kon sia tua in nonajis.

³⁷Táe aka podudui in pinonaridian i imang bo kekebnea tatua diábí ḷumekep, bo nobiag doman in buok ande kumi inta nosehat kon tampat tatua, dá panyaki tatua in nopia bidon, bo ki imang musti moponiata kon intau tatua in nodaritbí.

³⁸Aka intau ḷoḷaki ande bobay oyúon in oḷaap nobudó kon kuḻitnea,

³⁹dá intau tatua musti taridion i imang. Aka oḷaap tatua koontongan diá totok in mobudó, sia in tongábí kinodakitan in oḷaap, bo sia in poniatadon kon nodaritbí.

⁴⁰Aka tobatú ḷoḷaki nobaḻídon noḷogat kon dotá in tuminea ande kon dotá in munanea, dá ḷogatnea tatua in diábí mokopopisí kon inia nonajis.

⁴¹

⁴²Táe aka momuká in tumbobog mobudó mosimpuya kon tampat inta noḷogat tatua, dá sia in kinotugatan in panyaki kuḻit inta mokobahaya.

⁴³Ki imang musti monaridi kon intau tatua, bo aka totuu kon oyúon in tumbobog nobudó mosimpuya,

⁴⁴dá musti poniata i imang kon nonajis in sia sin kino tugatan in panyaki kuḻit inta mokobahaya kon uḷunea tatua.

⁴⁵Intau tobatú inta kinotugatan in panyaki kuḻit inta mokobahaya, musti mogiḷambung in ḷambung inta mobera-berak bo pomayáneadon mako in buoknea mobuyum-buyun. Sia musti mogoḻingoi kon pogotnea bo momaḷú: “Najis! Najis!”

⁴⁶Kon bonu in sia monahang mako kon roriga popisí in panyaki tatua sia in nonajispabí bo musti mogutun kon ḷuai in ḷoḷaigan, moyayú nongkon intau mita ibanea.

⁴⁷Aka oyúon in monopad[4] kon pakeang ande kaeng nongkon wol ande linen,

⁴⁸ande kon kuḻit ande onukabí inta pinomia nongkon kuḻit,

⁴⁹bo batangan in pinonopadan tatua mopoḷuno-ḷunow ande mosimpu-simpuya, dá ponopadan tatua in panyaki torupa inta dumodakit bo musti poontong kon i imang.

⁵⁰Ki imang musti monaridi kon barang tatua, bo potontanínea kon bonu in pitu nosinggai.

⁵¹Kon singgai noginpitu sia in musti monaridi bui, bo aka inta ponopadan tatua totuu kon ain noiḻekep, barang tatua in nonajis.

⁵²Ki imang musti motubá kon barang tatua, sin pinonopadan tatua in dumodakitbí, dá musti tubáan kopayongon.

⁵³Táe aka naonda in sinaridi i imang bo pinonopadan tatua doíbí iḷumekep kon barang tatua,

⁵⁴dá barang tatua pokibatánea bo potontaní pitu nosinggai in koonggotnea.

⁵⁵Bo ki imang bui monaridi kon tua. Aka pinonopadan tatua diá moiḻekep táe batangannea diá mobaḷui, dá barang tatua in umuranpabí nonajis bo musti tubáan, umpaka inta nonopad tatua tongá kon dotá in muna ande tongá kon dotá in tuminea.

⁵⁶Táe aka podudui in pinonaridian i imang bo pinonopadan tatua noinggamádon, dá inta nonopad nongkon kaeng ande kuḻit tatua musti berakon.

⁵⁷Aka kon singgai moiduduimai bo momuká bui, dá ponopadan tatua moiḻekep, bo kitoginea musti motubá kon barang tatua.

⁵⁸Aka naonda in binatáan mako bo batangan in pinonopadan kon barang tatua noinggamá, dá barang tatua musti batáan bui, bain tua bo anggapon nodarit.

⁵⁹Natuata in atorang kon ponopadan inta kon pakeang ande nongkon kaeng linen ande wol, ande kon onukabí inta pinomia nongkon kuḻit.