Read Mongondow IMAMAT 20 Bible Online

IMAMAT 20 - Mongondow bible

IMAMAT 20

¹Ki TUHAN nopotabá kon i Musa

²mopotaau in naa kon bangusa Israel, “Bayongan intau kon sigad monimu ande intau ango-angoi inta nogutun kon sigad monimu inta mopokuruban in adínea kon i Molokh, musti ara bo in bayongan intau dapot in sia matoi.

³Intau inta mopokuruban in adínea kon i Molokh, moponajis in Ḷoḷaigan-Ku bo mopoompámai kon tangoi-Ku inta motusi. Hukumon-Ku in sia bo diádon poyoiapon-Ku anggota in umat-Ku.

⁴Aka intau mita tongá mopomayá mako in dodia in intau natua bo diá mopoḷabú in hukuman matoi kon inia,

⁵dá Akuoidon tontaní in mohukum kon inia, bayongan tombonu in baḷoinea, takin bayongan intau inta noyotakinnea nonaḷámai kon i-Nakó bo minayá nosumba kon i Molokh. Mosia in diá bidon iapon-Ku anggota in umat-Ku.

⁶Intau inta mayá moigum kon tonggina kon boḻian inta mogoinímai kon dimukud in intau inta ain minatoi in hukumon-Kubí bo diádon iapon-Ku anggota in umat-Ku.

⁷Ḷukadai sinbá moiko umuran motusi, sin Akuoi in ki TUHAN Allahmu.

⁸Duduiaidon in hukum-Ku mita, sin Akuoi in ki TUHAN inta ain nopotondí kon i monimu sin mobaḻí mogogundoi-Ku.”

⁹Ki TUHAN nobogoi in atorang mita tanaa, “Intau inta mogodi-godimai kon i amánea ande kon i inánea musti hukumon matoi. Sia matoi popisí in taḷánea tontaní.

¹⁰Aka intau Israel tobatú monuaḻing kon buḷoi in intau inta tobangusanea, dá sia bo bobay tatua in musti hukumon matoi.

¹¹Intau ḷoḷaki tobatú inta mosiug takin i buḷoi tobatú i amánea, yo sia tua nogagowdon kon hak i amánea. Ḷoḷaki bo bobay tatua in mustibí hukumon matoi. Mosia in minatoi sin pinopisí in taḷá monia tontaní.

¹²Aka intau tobatú mosiug takin i mototakanea bobay, dá intau doyowa tatua musti hukumon matoi. Mosia aindon nonuaḻing, bo mosia minatoi popisí in taḷá monia tontaní.

¹³Aka intau ḷoḷaki tobatú bo mosiug doman takin ḷoḷaki ibanea tobatú, yo mosia tua ain nomia kon oaid inta moraat bo mokooyá, dá taya dua tua musti hukumon matoi. Mosia in minatoi sin pinopisí in taḷá monia tontaní.

¹⁴Aka ḷoḷaki tobatú mobuḷoi kon bobay tobatú takin ki iná in bobay tatua, dá taya toḷu tua in musti turubon dapot in matoi, popisí in mosia nomia kon oaid inta moraat totok. Oaid ná mita tatua in diábí motaau in aidan kon sigad monimu.

¹⁵Aka ḷoḷaki tobatú mongibog kon mahaḷuk, dá intau bo mahaḷuk tatua musti ḻimodon.

¹⁶Aka bobay tobatú mokipaké kon mahaḷuk, dá bobay bo mahaḷuk tatua musti ḻimodon. Mosia matoi popisí in oaid monia tontaní.

¹⁷Aka ḷoḷaki tobatú mosiug takin i bobaynea ande takin ki bobaynea inta toamáan táe noyoposi kon iná ande toináan táe noyoposi kon amá, dá mosia tua in diádon iapon umat-Ku. Mosia aindon nomia kon oaid inta moraat totok bo musti motarima kon bungai in oaidnea.

¹⁸Aka ḷoḷaki tobatú mosiug kon bobay tobatú inta inangoinea, dá mosia diá bidon iapon umat-Ku.

¹⁹Aka ḷoḷaki tobatú moniug kon bobay inta pokuináannea, dá taya dua tua musti motanggung kon bungai in oaid monia tontaní tatua.

²⁰Aka ḷoḷaki tobatú moniug kon i buḷoi pokuamáannea, yo sia in nokopoompámaidon kon pokuamáannea. Ḷoḷaki bo bobay tatua musti motanggung kon hukuman kon i monia, dapot in matoi mosia tua diá mokouḻí kon adí.

²¹Aka ḷoḷaki tobatú mogagow kon buḷoi i utatnea, yo sia tua in nokopoompámai kon i utatnea bo ain nomia kon oaid inta moraat tatua. Dapot in matoi mosia tua diá mokouḻí kon adí.”

²²Ki TUHAN noguman, “Duduiaidon in bayongan hukum bo parenta-Ku, sinbá moiko diá poguntunon kon butá in Kanaan, kon tampat inta pinodiaan-Ku kon i monimu.

²³Dika dumayan kon kabiasaan in bangusa inta nogutun kon tua. Mosia noponakit in gina-Ku takin oaid monia inta moromú. Tuamai mosia tua in pinoguntun-Ku, sinbá moiko motaau tumuot kon butá tatua.

²⁴Butá inta nooyúon bo mopia tatua aindon pinodandi-Ku kon i monimu, dá ogoi-Kubí intua mobaḻí kapunyaanmu. Akuoi in ki TUHAN Allahmu inta nopotondí kon i monimu nongkon bangusa mita ibanea.

²⁵Tuamai moiko musti motaau mopoyoposi onda in mahaḷuk inta haram nongkon inta diá haram. Dika mokaan kon mahaḷuk inta haram. Mahaḷuk tatua pinoniata-Kudon kon haram, dá aka mokaan yo moiko mobaḻí monajis.

²⁶Moiko pinotondí-Ku nongkon bangusa mita ibanea sinbá mobaḻí kapunyaan-Ku. Moiko in musti motusi sin Akuoi in ki TUHAN, bo Akuoi in motusi.

²⁷Bayongan intau ḷoḷaki ande bobay inta umuran mogoiní kon dimukud mita inta ain minatoi yo musti ara bo in batu modapot in matoi. Intau tatua in matoi popisí in oaidnea tatua.”