Read Mongondow IMAMAT 23 Bible Online

IMAMAT 23 - Mongondow bible

IMAMAT 23

¹Ki TUHAN nobogoi kon i Musa

²in atorang mita kon singgai moḷoben in agama, inta musti potaau mobaḻí singgai moḷoben poibadaan.

³Onom nosinggai in wakutu pogaidan, singgai in Sabat, in singgai pogogaian inta sinantúdon kon i TUHAN. Kon singgai tatua moiko musti momia kon poyodungkuḷan sin poibadaan bo diábí in motaau mogaid.

⁴Naa in singgai mita moḷoben inta ain sinantú i TUHAN bo inta musti potaau kon wakutu inta ain sinantú.

⁵Singgai Moḷoben Paska inta iramean sin mohoromat kon i TUHAN, pangkoion kon dodai mata in singgai tumoyop kon singgai impuḷú bo opat buḷan noginmitá.

⁶Mobangon monik, kon singgai mopuḷú bo ḻima, momangkoidon in Singgai Moḷoben Roti diá in Ragi, bo kon bonu in pitu nosinggai moiko in diábí motaau mokaan kon roti inta iragian.

⁷Kon bonu in pitu nosinggai moiko in musti moposumba in kuruban kaanon kon i TUHAN. Kon singgai inta muna bo kon singgai noginpitu kon poramean tatua moiko in musti momia kon poyodungkuḷan sin moibada bo diápabí motaau in mogaid kon oaidan inta mobogat.

⁹Aka moiko modapotdon in butá inta inogoi i TUHAN kon inimu, bo mosipundon kon bungai in boyó, yo bungai in gandum inta muna sinipú monimu musti diaan kon i imang.

¹¹Kon singgai mopaḷut mako singgai in Sabat, ki imang musti moposumba in gandum tatua mobaḻí sosumba inta tonoion kon i TUHAN, sinbá mopia in gina i TUHAN kon inimu.

¹²Kon singgai moiko moposumba in gandum tatua, moiko musti moposumba doman in kuruban payongon ki adí in domba tobatú inta koḷakian inta umur totaong bo diá nobogit.

¹³Aka kon kuruban kaanon yo posumbadon in doyowa nokilo in topong bauian in ḷana zaitun. Rongingi in kuruban tatua mokosanang kon gina i TUHAN. Poyotakinon intua posumba domandon in anggur tongoliter.

¹⁴Kon dodai in diápa modia kon sosumba tatua kon i TUHAN, moiko in diábí motaau mokaan kon topiḻikmai in gandum mobagu tatua, pinomayá inta diápa noḷutú, inangag ande inta ain sinubá nobaḻí roti. Atorang tatua musti duduian in bayongan buímu dapot kon adí bo ompu.

¹⁵Pangkoion kon mopaḷut mako in Sabat, kon dodai in moiko moposumba kon i TUHAN in bungai mita in gandum inta muna, musti iapon monimu pitu nodiminggu in motompod.

¹⁶Kon singgai noginḻima nopuḷú, inta kon singgai mopaḷut mako in Sabat inta noginpitu moiko in musti modia kon kuruban oḷudon kon i TUHAN.

¹⁷Pomuḷoi in motoḷuadí musti moposumba in roti doyowa mobaḻí sosumba tonoion kon i TUHAN. Roti mita in musti pomiaan nongkon topong moaḷus doyowa nokilo inta ragian bo musti ogoi kon i TUHAN mobaḻí sosumba in bungai in boyó inta muna.

¹⁸Poyotakinon in roti tatua bangusa Israel musti moposumba in adí in domba pitu inta umur totaong, sapi koḷakian batánea tobatú bo bembé doyowa. Dikabí inta nobogit bo musti posumba mobaḻí kuruban payongon kon i TUHAN, takin kuruban oḷudon bo kuruban tubig in anggur. Rongingi in kuruban tatua mokosanang kon gina i TUHAN.

¹⁹Posumba domandon in bembé koḷakian tobatú mobaḻí kuruban potobut kon dosa bo domba koḷakian doyowa inta umur totaong mobaḻí kuruban dodamean.

²⁰Roti bo adí in domba doyowa tatua musti posumba i imang mobaḻí sosumba tonoion kon i TUHAN, bo tua in mobaḻídon silai in imang. Sosumba mita tatua in motusibí.

²¹Kon singgai tatua moiko musti momia kon poyodungkuḷan sin moibada bo diábí motaau in mogaid kon oaidan inta mobogat. Atorang tatua musti duduian in buímu dapot in adí bo ompu, kon ondakabí in pogutunan monia.

²²Aka moiko monoḻisídon kon bungai in boyó, dikadon ratabon monimu in gandum inta nobiag kon bingkí mita in gobámu bo dikadon mobui mayá mopuyut kon inta kinotaḷáan kon pinokoyutan. Pomayádon mako intua kon intau mita inta nobiag nobogá bo kon intau ango-angoi. Ki TUHAN in ki Allahmu.

²³Kon singgai imitánea buḷan noginpitu musti pomiaan kon rame mobaḻí singgai inta ain sinantú pogogaian. Pogirupan kon torompet in mobaḻí tanda kon singgai tatua, bo moiko in musti momia kon poyodungkuḷan sin moibada.

²⁵Posumbadon in kuruban kaanon kon i TUHAN bo dika mogaid kon oaidan inta mobogat kon singgai tatua.

²⁶Kon singgai impuḷúnea buḷan mogimpitu tuata in singgai upacara pomuḷoi in taong sin potobutan kon dosa in bangusa Israel. Kon singgai tatua moiko in musti mopuasa bo momia kon poyodungkuḷan sin moibada poḷat moposumba in kuruban kaanon kon i TUHAN.

²⁸Dikapa mogaid, sin singgai tatua in singgaibí potobutan kon dosa, sinbá dosa monimu ampungandon kon tayowon i TUHAN Allahmu.

²⁹Ki ine in mokaan kon onuka kon singgai tatua, yo diá bidon iapon anggota in umat i Allah.

³⁰Bo ki ineka in mogaid kon singgai tatua, yo popoḷabúan i TUHAN tontaní in hukuman matoi.

³¹Atorang tatua pakéon kon bayongan buímu kon ondakabí in pinogutunan monia.

³²Pangkoion kon dodai in mata in singgai tumoyop kon singgai noginsiow kon buḷan tatua modapot doman kon dodai mata in singgai tumoyop kon singgai impuḷúnea, musti poramean monimu ná singgai in Sabat, singgai inta ain sinantú pogogaian. Tosinggai tua moiko musti mopuasa.

³³Poramean kon Singgai Moḷoben Pondok Daun pangkoion kon singgai impuḷú bo ḻima buḷan noginpitu bo pitu nosinggai in koonggotnea.

³⁵Kon bonu in pitu nosinggai tatua, pomuḷoi in singgai moiko musti moposumba in kuruban kaanon. Kon singgai dungkuḷ bo kon singgai moginwaḷu moiko in musti momia kon poyodungkuḷan sin moibada bo moposumba in kuruban kaanon kon i TUHAN. Dikadon mogaid kon oaidan mobogat kon singgai tatua.

³⁷Tuata in singgai mita moḷoben in agama inta ain sinantú i TUHAN bo inta musti potaau monimu. Kon singgai moḷoben mita tatua moiko musti mohoromat kon i TUHAN takin momia kon poyodungkuḷan sin moibada bo moposumba in kuruban kaanon, kuruban tubáan, kuruban oḷudon, kuruban mahaḷuk bo kuruban tubig in anggur, kobayongnea in ná doman inta paraḷu pakéon pomuḷoi in singgai.

³⁸Poramean mita tatua nobaḻí dugang kon singgai mita in Sabat biasa, dá sosumba mita tatua in nobaḻí doman dugang kon onu inta inogoimu inta biasamai, kon kurubanmu sin motobut kon onu inta ain dinandimu, ande kuruban monginibog inta inogoi monimu kon i TUHAN.

³⁹Naonda in mopaḷut mako mobatun kon bungai in boyó, pangkoion kon singgai mopuḷú bo ḻima buḷan noginpitu, moiko in musti momia kon poramean pitu nosinggai in koonggotnea. Singgai dungkuḷ bo singgai noginwaḷu tua in singgai inta ain sinantú kon pogogaian.

⁴⁰Kon singgai dungkuḷ tua moiko in musti mosipú kon bungai in boyómu kon gobámu mita, bo dáun doman mita in palem bo tanga mita in kayu inta norubombong, bo pangkoidon in ramean inta nobaḻí singgai pia in gina sin mohoromat kon i TUHAN Allahmu.

⁴¹Rame tatua musti aidan monimu pitu nosinggai in koonggotnea. Atorang tatua musti umuran aidan in buímu mita dapot kon adí bo ompu.

⁴²Pitu nosinggai in koonggotnea bayongan bangusa Israel musti mogutun kon bonu in pondok mita inta inatopan in daun,

⁴³sinbá buímu monotaau kon ki TUHAN nopotabá kon bangusa Israel mogutun kon bonu in pondok mita, kon wakutu in Akuoi nodia kon i monia iḻumuai nongkon Mesir. Sia tuata in ki TUHAN Allahmu.

⁴⁴Natuata in atorang mita pogogaid kon poramean mita sin mohoromat kon i TUHAN inta pinotaau i Musa kon bangusa Israel.