Read Mongondow IMAMAT 26 Bible Online

IMAMAT 26 - Mongondow bible

IMAMAT 26

¹Ki TUHAN noguman, “Dika momia kon toḻindua in Tuhan ande moposindog in patong ande oigi batu inta kinurig sin sumbáan. Akuoi in ki TUHAN Allahmu.

²Porameaibí in singgai mita in Sabat bo singgai mita moḷoben ibanea bo horomatdon in tampat inta ain sinantú posumbaan kon i-Nakó. Akuoi in ki TUHAN.

³Aka moiko mobiag moidudui kon atorang-Ku mita bo dumudui doman kon parenta-Ku mita,

⁴yo ogoian-Ku in uyan moiko kon wakutunea, dá butá mobogoidon in boyó bo pangkoi mita in ayop momungaidon.

⁵Bungai in boyó kon butá monimu moguntu-guntuḷ, modapot in aka moiangoidon in wakutunea mosipú kon bungai in anggur, umuranpa doman in moiko moratab kon gandum. Bo aka wakutuneadon momuḷa bui kon gandum, moiko in umuranpa doman mosipú kon bungai in anggur. Moiko in diábí kodai-daitan in kaanon bo mobiag motompia kon butámu.

⁶Ḷukadan-Ku in butá monimu sinbá moaman moiko in mosiug bo diábí moondok kon i ineka. Mahaḷuk mita moraat inggamáan-Ku nongkon butá tatua, bo diá bidon bui in parang kon butá monimu.

⁷Moiko mokomampubí in monaḷow kon musungmu mita;

⁸intau ḻima nongkon imonimu mokotaḷowbí kon intau mogatut, bo aka intau mogatut monimu yo mokotaḷowdon kon intau mopuḷú noribu.

⁹Barakatan-Ku in moiko bo mobogoi in adí bo ompu inta mobayong kon inimu. Onu inta ain pinodandi-Ku kon inimu, notantúbí kon aidan-Ku.

¹⁰Bungai in boyó kon butá monimu in moguntu-guntuḷdon, dá tugatbí kaanon kon bonu in totaong. Modapot in pakisadon poḷuaion monimu in ḻiu in bungai in boyó inta noonggotdon sinbá oyúonpa in potagúan kon bungai in boyó inta bagu binatun.

¹¹Akuoi in mogutun kon sigad monimu kon bonu in Ḷoḷaigan-Ku, bo diábí mogindoí kon i monimu.

¹²Takinan-Kubí in moiko; Akuoi in mobaḻíbí ki Allah monimu bo moiko in mobaḻí umat-Ku.

¹³Akuoi, ki TUHAN Allahmu, inta nodia kon i monimu iḻumuai nongkon butá in Mesir sinbá moiko in diádon mobaḻí ata bui. Kawasa inta mondorot kon i monimu pinutoḷan-Kudon, bo moiko in binaḻí-Kudon intau inta noiḷuat kon roriga.”

¹⁴Ki TUHAN noguman, “Aka moiko diá mokidongog kon i-Nakó bo diá dumudui kon parenta-Ku,

¹⁵Aka moiko ḻimimpat kon dodandian inta pinomia-Ku takin imonimu bo doí dumudui kon parenta bo atorang-Ku mita,

¹⁶yo hukumon-Ku in moiko. Popoangoi-Ku in bodito kon i monimu, mogobu bo mopatú inta diá koundaman, modapot in matamu mobilogdon bo kobobiag monimu in diádon mosanangmai. Moiko in monompinomuḷabí táe diábí moikaan kon bungainea, sin musungmu mita in momangoi bo monaḷow kon i monimu bo mogagow komintan kon onu inta pinomuḷa monimu.

¹⁷Hukumon-Ku in moiko, modapot in moiko taḷowondon in musungmu mita moiko kawasaandon in intau mita inta mosaturu kon i monimu. Agían totok in ondok moiko dapot in moḷagui moiko, umpaka diá in mogaḷow.

¹⁸Aka naonda in mokouḻí mako kon hukuman tatua bo diápa doman in moiko mokopotoindudui kon i-Nakó, yo hukuman kon i monimu dugangan-Ku in kobogatnea kopitu nongkon tua.

¹⁹Moiko totuu mododia, táe potungkudon-Kubí in moiko. Diá bidon monguyan, dá butámu in moingkag bo motogat naonda bo uatoi.

²⁰Bayongan inta irorigaanmu diádon in mangaḻenea, sin butámu in diá bidon in mangaḻenea bo pangkoi in ayop monimu diábí momungai.

²¹Aka moiko umuranpa doman monoḻikud kon i-Nakó bo doí mokopotoindudui kon i-Nakó, dá hukumanmu in dugangan-Ku bui inta kobogatnea kopitu ná tatua.

²²Popoangoi-Ku kon yua-yuak monimu in mahaḷuk mita moraat. Mahaḷuk mita tatua modomok kon i adí mita monimu, momatoi kon biagmu bo mokaan kon i monimu komintan, dá moiko in moyakagdon totok, bo daḷan mita kon butá monimu moingongowdon totok.

²³Aka naonda in mokouḻí mako kon hukuman tatua bo moiko in doípa doman mokidongog kon i-Nakó, táe umuranpa doman momaḷawang kon i-Nakó,

²⁴dá bouton-Kudon in moiko bo hukumon-Ku in moiko inta kobogat in hukuman tatua kopitu ná inta ain pinopoaid-Ku muna.

²⁵Popomuká-Ku in parang kon sigad monimu sin mohukum kon i monimu popisí in moiko ain iḻimimpat kon dodandian-Ku takin monimu. Bo aka moiko moyosipun kon kotámu sin motayak kon motototuḷung, yo popoangoi-Kudon in takit inta diábí kotompiaan, dapot in moiko pakisadon tumungkud kon musungmu.

²⁶Moiko in kodaitan in kaanon, dá naa in mobaḻí: Bobay mopuḷú dongkadon tobatú in doḷuong sin potubáan kon roti inta kaanon monia. Kaanon tatua in pobuion doman, bo naonda in mokaan mako, umuranpa doman gogoyon in moiko.

²⁷Bo aka motarima mako kon bayongan hukuman tatua bo umuranpa doman in moiko moḷawang kon i-Nakó bo doí doman dumudui kon i-Nakó,

²⁸Dá tumorúdon totok in Akuoi poḷat mosambok kon i monimu, bo mohukum kon i monimu inta kobogat in hukuman tatua in kopitu nongkon ná inta ain pinopoaid-Ku kon i monimu.

²⁹Moiko in gogoiondon totok, modapot in ki adí mita monimu kaanondon monimu tontaní.

³⁰Rimumudon-Kudon in tampat mita pososumbaanmu kon tudu in buḷud mita, mogumpag kon mezbahmu mita tampat pototubáan kon dupa, bo mopogambat in mayat mita monimu kon tudu in toḻindua mita in Tuhanmu inta ain noumpag tatua. Takin yaat in gina

³¹kotámu mita umpagon-Kudon, tampat mita pososumbaanmu in rimumudon-Kudon bo kurubanmu mita in diá tarimaan-Ku.

³²Poguraaton-Ku in butá monimu, modapot in musungmu mita inta mongawasa moitongaudon in mokoontong kon tua.

³³Popoangoi-Ku in parang kon butá monimu bo poyayiton-Kudon in moiko kon butá in intau. Gobá mita monimu moibiardon mako, bo kotámu mita pomayádon mako in mogoguyaat.

³⁴Kon tungkuḷ in moiko kon pinoḷumbúanpa kon butá in musungmu mita, butámu inta diá dodai onda noigogai diá pinonompinomuḷaan, moisimayatdon mako bo kasampatanneadon moigogai.

³⁶Intaumu mita inta kon pinoḷumbúanpa kon butá intau, popogonúan-Kudon in ondok moḷoben, modapot in umpaka tongá singog in daun irupon tompot yo poḷaguian monia. Moiko in moḷagui naonda bo inaḷowan kon bonu in parang, bo moḷabú umpaka diá in musung kon diugmu.

³⁷Moiko in moḷagui bo moyodangat, umpakabí diá in mogaḷow. Bo moiko in diábí mokosanggup monayow kon musungmu mita.

³⁸Moiko in matoidon kon butá inta pinoḷumbúan, yompaton in musungmu mita kon butá monia.

³⁹Bo ki ine in kon sigad monimu inta nobiagpa kon butá in musungmu mobiagdon moyoyiga popisí in dosamu tontaní bo dosa in mogoguyangmu.

⁴⁰Táe buímu in mongakubí kon dosa monia bo dosa in mogoguyang monia inta ain noḷawang kon i-Nakó bo ain nomarontak kon i-Nakó,

⁴¹dá iḷawang-Ku domandon in mosia bo inuntun-Ku pinobayá in tampat pinoḷumbúan kon butá in musung mita monia. Pangabisannea, aka buímu mita moitungkudon bo dinumuduidon kon hukuman popisí in dosa bo pinomarontakan monia,

⁴²yo toropon-Kudon in dodandian-Ku takin i Yakub, i Ishak bo i Abraham. Toimbaguon-Kudon in dodandian-Ku sin mobogoi in butá tatua kon bangusa-Ku.

⁴³Táe munapa poḷuaion in intau mita inta nogutun kon butá tatua, sinbá totu-totuu kon moigogaipa. Bo umat-Ku musti mopobayá in hukuman inta pinopoḷabú-Ku kon i monia popisí in doí dinumudui kon atorang bo parenta-Ku mita.

⁴⁴Táe umpaka in mosia kon butápa in musung monia, mosia in diábí taḷaan-Ku ande yompaton-Ku komintan. Sin aka mosia yompaton-Ku, yo mangaḻenea kon tua Akuoidon tontaní in nomontow kon dodandian-Ku takin i monia, bokaka Akuoi naa in ki TUHAN Allah monia.

⁴⁵Toimbaguon-Kudon in dodandian inta pinomia-Ku takin mogoguyang monia, kon tungkuḷ in Akuoi nopoontong in kawasa-Ku kon bayongan bangusa takin nodia kon umat-Ku iḻumuai nongkon Mesir, sinbá Akuoi, ki TUHAN mobaḻí ki Allah monia.”

⁴⁶Tuata in hukum bo parenta mita inta inogoi i TUHAN kon tudu in Buḷud Sinai kon i Musa kon bangusa Israel.