Read Mongondow IMAMAT 27 Bible Online

IMAMAT 27 - Mongondow bible

IMAMAT 27

¹Ki TUHAN nobogoi kon i Musa

²in atorang tanaa kon bangusa Israel. Aka intau tobatú pinosumba kon i TUHAN sin motobut kon dandinea inta ain sinantú, yo intau tatua in motaaubí tobutonnea in doit

³podudui in boḻinea inta sinantú kon Ḷoḷaigan i TUHAN: — kon ḻimonik in umur onom nopuḷú notaong: aka ḷoḷaki mopuḷú bo ḻima in doit saḷaka bobay mopuḷú in doit saḷaka — kon sigad in umur doyowa nopuḷú notaong dapot in onom nopuḷú notaong: ḷoḷaki: ḻima nopuḷú in doit saḷaka bobay: toḷu nopuḷú in doit saḷaka — kon sigad in umur ḻima notaong dapot in doyowa nopuḷú notaong: ḷoḷaki: doyowa nopuḷú in doit saḷaka bobay: mopuḷú in doit saḷaka — umur ḻima notaong bo namonag: ḷoḷaki: ḻima in doit saḷaka bobay: toḷu in doit saḷaka

⁸Aka intau inta ain nodandi tatua diá mokosanggup moguboḻi kon boḻi inta ain sinantú tua, dá sia musti modia kon intau inta ain pinosumba kon i TUHAN tua pobayá kon i imang. Ki imang musti monantú kon boḻi inta moona-onag podudui in komampuan intau tatua.

⁹Aka inta pinodandi tua bo mahaḷuk inta motaau kaanon inta motaau tarimaan mobaḻí sosumba kon i TUHAN, intau inta nodandi tatua in diábí motaau moponoḻiu in mahaḷuk ibanea, sin bayongan inta pinosumba kon i TUHAN mobaḻí kapunyaan i TUHAN. Aka toḻiuannea doman, mahaḷuk doyowa tatua tumpaḷadon mobaḻí kapunyaan i TUHAN.

¹¹Táe aka inta pinodandi tatua bo soaḷ mahaḷuk inta haram inta diá motaau tarimaan mobaḻí sosumba kon i TUHAN, intau inta nodandi musti modia kon mahaḷuk tatua kon i imang.

¹²Ki imang in monantú kon boḻinea podudui in kaadaan in mahaḷuk tatua. Bo boḻi inta sinantú tua in diá bidon motaau baḷuian.

¹³Aka intau tatua moibog motobut kon biagnea, dá musti uboḻiannea bo dugangan doman in doyowa nopuḷú noporsen.

¹⁴Aka intau tobatú moposumba in baḷoinea kon i TUHAN, yo ki imang in musti monantú kon boḻinea podudui in kaadaan in baḷoi tatua. Boḻi inta ain sinantú tatua in diá bidon motaau baḷuian.

¹⁵Aka intau tatua moibog motobut kon baḷoinea, yo musti uboḻiannea in boḻinea tatua bo dugangan in doyowa nopuḷú noporsen.

¹⁶Aka intau tobatú moposumba in butánea toḷosi kon i TUHAN, yo boḻinea musti tantúon podudui in bibit inta pakéon pomunak kon butá tatua. Aka doyowa nopuḷú nokilo in gandum yo boḻinea in doit saḷaka mopuḷú.

¹⁷Aka butá tatua pinosumba pinangkoipa kon taong pinopobuian, yo boḻinea musti uboḻian motompod.

¹⁸Aka butá tatua pinosumba naonda in nopaḷut mako in Taong Popobuian, dá ki imang musti monakuser kon boḻinea podudui in koonggot in taong mita inta ki agatnea modapot kon Taong Popobuian inta moidudui, bo monantú kon boḻinea in moona-onag nongkon tua.

¹⁹Aka intau inta noposumba in gobá tatua moibog motobut kon tua, yo musti uboḻiannea in tua takin dugangan in doyowa nopuḷú noporsen.

²⁰Aka sia mopotaḷui in gobá tatua táe diá muna tobutonnea kon i TUHAN, yo diá bidon in haknea motobut kon gobánea.

²¹Kon Taong popobuian moiduduimai, gobá tatua mobaḻídon kapunyaan i TUHAN mononoi, bo ogoidon kon imang mita.

²²Aka intau tobatú moposumba kon i TUHAN in gobánea inta sinaḷuinea,

²³yo ki imang in musti monakuser kon boḻinea podudui in koonggot in taong modapot kon Taong Popobuian moiduduimai. Bo intau tatua musti moguboḻi kon boḻinea kon singgai doman tatua. Doit tatua mobaḻí kapunyaan i TUHAN.

²⁴Kon Taong Popobuian, gobá tatua in musti pobuion kon i toginea inta muna ande kon buínea.

²⁵Boḻinea komintan musti tantúon podudui in boḻi inta sinantú kon Ḷoḷaigan i TUHAN.

²⁶Biag inta muna pinogadí in mobaḻíbí kapunyaan i TUHAN, dá diábí motaau posumba mobaḻí kuruban ibog tontaní. Adí in sapi, adí in domba ande adí in bembé inta muna pinogadí in kapunyaanbí i TUHAN.

²⁷Táe mahaḷuk haram inta muna pinogadí motaaubí tobuton podudui in boḻi inta sinantú kon Ḷoḷaigan i TUHAN, bo dugangan in doyowa nopuḷú noporsen. Aka diá tobuton in mahaḷuk tatua yo motaaubí in potaḷui kon intau ibanea podudui in boḻi inta ain sinantú kon Ḷoḷaigan i TUHAN.

²⁸Diá tobatúmai in motaau mopotaḷui ande motobut kon onu inta ain sinondínea takin diá in sarat[10] kon i TUHAN, pinomayá tua intau, mahaḷuk ande butá. Tua in nobaḻídon kapunyaan i TUHAN mononoi.

²⁹Modapot in intau inta ain sinantú kon i TUHAN inta yopúon yo diábí doman motaau tobuton; sia mustibí ḻimodon.

³⁰Mopuḷú noporsen nongkon bungai in boyó, pinomayá gandum ande bungai in ayop mita, tua in kon i TUHAN.

³¹Aka intau tobatú moibog motobut kon tobotak nongkon bungai in boyó tatua, yo sia in musti moguboḻi kon boḻinea inta ain sinantú bo dugangan in doyowa nopuḷú noporsen.

³²Tobatú nongkon biag mopuḷú tua in mobaḻí kapunyaan i TUHAN. Aka biag tatua iapon, dá pomuḷoi in biag inta noginpuḷú mobaḻí kapunyaan i TUHAN.

³³Ki togi biag tatua diábí motaau in momiḻí kon onda inta mopia, bo onda inta diá mopia. Bo diábí doman motaau toḻiuannea. Aka toḻiuannea doman, dá biag doyowa tatua tumpaḷadon ki TUHAN in kitogi bo diábí motaau tobuton.

³⁴Tuata in parenta mita inta inogoi i TUHAN kon tudu in Buḷud Sinai kon i Musa sin ogoi kon bangusa Israel.