Read Mongondow IMAMAT 3 Bible Online

IMAMAT 3 - Mongondow bible

IMAMAT 3

¹Aka oyúon intau moposumba in sapi koḷakian tobatú sin pomiaan kuruban dodamean, dá sapi tatua motaaubí in koḷakian bo motaau doman in kobaayan, táe musti inta mopia totok.

²Intau inta moposumba intua musti mopoukat in ḻimanea kon tudu in biag tatua bodongka ratáannea kon tayowon ngara in Ḷoḷaigan i TUHAN. Imang mita buí i Harun musti mopobutak in dugú in sapi tatua kon sí opat in mezbah.

³Aka pakéon kuruban dodamean kon i TUHAN, dá gamáan i imang naa nongkon biag tatua bo posumba: ḷongó inta noibakut kon siannea,

⁴kombiloi takin ḷongónea bo poatnea inta totok in mopia.

⁵Tua komintan poyotakinon in kuruban mita tubáan ibanea, musti tubáan kon tudu in mezbah. Rongingi in kuruban kokaanon tatua mokosanang kon gina i TUHAN.

⁶Aka inta pinosumba nobaḻí kuruban dodamean tua bo domba tobatú ande bembé, dá motaaubí in koḷakian ande kobaayan, táe inta totok in mopia.

⁷Aka intau tobatú moposumba in domba tobatú, yo musti diaannea intua kon Ḷoḷaigan i TUHAN.

⁸Kon tua in sia bo musti mopoukat in ḻimanea kon uḷu in domba tatua bodongka ratáannea kon tayowon in Ḷoḷaigan. Bo imang musti mopobutak in dugú in domba tatua kon sí opat in mezbah.

⁹Aka pakéon kuruban dodamean kon i TUHAN, dá musti in ki imang moposumba in naa: ḷongó in domba tatua, iputnea takin ḷongónea inta pinongkó dapot in tuḷan nonoyannea, ḷongó inta noibakut kon bonu in siannea,

¹⁰kombiloinea takin ḷongónea bo dotá in poatnea inta totok in mopia.

¹¹Ki imang inta mogaid kon oaidannea musti motubá kon tua mita kon tudu in mezbah sin mobaḻí kuruban kokaanon kon i TUHAN.

¹²Aka inta pinosumba tatua bo bembé tobatú, dá intau inta moposumba tatua musti modia kon bembé tatua pobayá in tayowon in Ḷoḷaigan i TUHAN.

¹³Kon tua sia musti mopoukat in ḻimanea kon uḷu in bembé tatua bo dongka ratáannea kon tayowon in Ḷoḷaigan. Imang musti mopobutak in dugú in biag tatua kon sí opat in mezbah tatua.

¹⁴Aka kuruban kokaanon ogoi kon i TUHAN, yo imang musti mogamá kon naa nongkon bembé tatua bo posumba: ḷongó inta noibakut kon bonu in siannea,

¹⁵kombiloinea takin ḷongónea bo dotá in poatnea inta totok in mopia.

¹⁶Imang inta mogaid kon oaidannea musti motubá kon tua mita kon tudu in mezbah. Rongingi in kokaanon tatua mokosanang kon gina i TUHAN. Bayongan ḷongó in mahaḷuk tatua ogoi posumba kon i TUHAN.

¹⁷Intau in Israel diábí motaau mokaan kon ḷongó ande dugú. Atorang tatua pakéon dapot kon adí bo ompu monia bo musti duduian in bayongan intau Israel kon ondaka in pogutunan monia.