Read Mongondow IMAMAT 4 Bible Online

IMAMAT 4 - Mongondow bible

IMAMAT 4

¹Ki TUHAN nopotabá kon i Musa

²mopotaau kon bangusa Israel kon ki inekabí inta diá sinumuod nogaid kon dosa takin noiḷaut noiḻimpatdon kon tobatú nongkon parenta mita i TUHAN, yo musti dumudui kon atorang tanaa.

³Aka inta dinosa tatua bo Imang Moḷoben, modapot in bangusa Israel in moitakin doman moitaḷá, dá sia musti mopokuruban in sapi koḷakian batánea tobatú inta mopia kon i TUHAN sinbá dosanea ampungandon.

⁴Sapi tatua musti diaannea kon ngara in Ḷoḷaigan i TUHAN. Imang moḷoben musti mopotudu in ḻimanea kon mahaḷuk tatua, bodongka ratáannea kon tayowon in Ḷoḷaigan.

⁵Tongosilai in dugúnea musti diaannea tumuot kon bonu in Ḷoḷaigan.

⁶Bo sia in musti mopoḷodok in gongguyamúnea kon bonu in dugú tatua bodongka mopopisik kopitu kon tayowon in toḻipoi inta nopoyotondí in Yuang Motusi.

⁷Tongosilai nongkon dugú tatua musti poḻepo kon tungoi mita inta kon siku mita in mezbah in dupa mobondu kon bonu in Ḷoḷaigan, bo kiagatnea kon tua in musti popobutak kon taḷog in mezbah in kuruban tubáan inta kon tayowon in ḷoḻingkop in Ḷoḷaigan.

⁸Imang musti mogamá kon bayongan ḷongó in sapi koḷakian tatua, ḷongó inta noibakut kon bonu in siannea,

⁹kombiloinea bo takin ḷongónea bo onu inta totok in mopia nongkon poatnea.

¹⁰Tua komintan musti tubáannea ná kuruban dodamean.

¹¹Táe tapú in sapi tatua, kuḻitnea, uḷunea, sioḷnea, bonu in sian kiagatnea kon tua moigapí doman in kompongnea,

¹²dá tua mita koḻikudbí in tongosilai inta ain pinotondí, tua in musti diaan kon ḷuai in ḷoḷaigan. Kon tampat tatua sapi tatua musti tubáan kon tudu in kayu ponontuḷú kon tampat poḷumbúan kon ḷobud, tampat inta sinuodbí inaidan natua.

¹³Aka inta dinosa tua bo bayongan umat in Israel, tongá diábí sinumuod noḷawang kon tobatú nongkon parenta i TUHAN,

¹⁴dá naonda in ḷagidon kinotaauan in dosa tatua, yo umat in musti modia kon sapi koḷakian tobatú inta batáneapa kon tayowon in Ḷoḷaigan i TUHAN. Mahaḷuk tatua musti posumba mobaḻí kuruban pongampung kon dosa.

¹⁵Tongguḷu mita in bangusa musti mopoukat in ḻima monia kon uḷu in mahaḷuk tatua, bodongka moratá kon mahaḷuk tatua kon tampat tatua.

¹⁶Imang Moḷoben musti modia kon dugú in mahaḷuk tatua tongosilai bo tumuot kon bonu in Ḷoḷaigan.

¹⁷Kon tua sia musti mopoḷodok in gongguyamúnea kon bonu in dugú tatua bodongka popisiknea kopitu kon tayowon in toḻipoi inta nopoyotondí in Yuang Motusi.

¹⁸Tongosilai doman in dugú tatua musti poḻepo kon tungoi mita inta kon siku in mezbah pototubáan kon dupa kon bonu in Ḷoḷaigan, bo kiagatnea in musti popobutak kon datoḷan in mezbah tampat in kuruban tubáan inta kon tayowon ngara in Ḷoḷaigan.

¹⁹Bayongan ḷongó in mahaḷuk tatua musti gamáan bo tubáan kon tudu in mezbah.

²⁰Aidan naonda bo pogogaid kon sosumba sapi koḷakian inta nobaḻí kuruban pongampung kon dosa. Natuata in pogogaid in Imang Moḷoben moposumba in kuruban sin potobut kon dosa mita in umat, dá dosa mita tatua in ampungandon i TUHAN.

²¹Onda intua sapi koḷakian tatua musti diaan kon ḷuai, bo tubáan kon ḷuai in ḷoḷaigan, ná inta kon sosumba sapi koḷakian inta binaḻí kuruban pongampung kon dosa in Imang Moḷoben tua. Natuata in moposumba in kuruban pongampung kon dosa in umat.

²²Aka inta dinosa tua in bobato tobatú táe diábí sinumuod noḷawang kon parenta i TUHAN tobatú,

²³dá naonda in kotaauanneadon ḷagidon in sia mopokuruban in bembé koḷakian inta mopia totok sin pongampung kon dosanea.

²⁴Sia in musti mopotudu in ḻimanea kon uḷu in mahaḷuk tatua, bodongka ratáan kon dotá in utuan mezbah, tampat pororataan kon kuruban inta tubáan.

²⁵Imang musti mopoḷodok in gongguyamúnea kon bonu in dugú in mahaḷuk tatua bodongka poḻeponea kon tungoi mita kon siku in mezbah bo ki agatnea pobutak kon datoḷan in mezbah.

²⁶Onda intua bayongan ḷongó in mahaḷuk tatua musti tubáan kon tudu in mezbah, ná kuruban dodamean. Natuata in pogogaid i imang kon moposumba in kuruban in tobatú bobato, dá intau tatua in ampungan i TUHAN.

²⁷Aka intau biasa tobatú diábí sinumuod nogaid kon mokodosa poḷat noiḻimpat kon atorang i TUHAN tobatú,

²⁸dá naonda in kinotaauanneadon, yo sia in mustibí mopokuruban in bembé kobaayan tobatú inta totok in mopia.

²⁹Sia in musti mopoukat in ḻimanea kon uḷu in mahaḷuk tatua, bodongka ratáannea kon dotá in utuan mezbah tampat pororataan kon mahaḷuk inta pokuruban mobaḻí kuruban tubáan.

³⁰Imang musti mopoḷodok in gongguyamúnea kon dugú in mahaḷuk tatua, bodongka popoḻeponea kon tungoi mita inta kon siku in mezbah bo kiagatnea in popobutak kon datoḷan in mezbah.

³¹Bayongan ḷongó in mahaḷuk tatua musti gamáan ná kon kuruban dodamean. Ḷongó tatua musti tubáan in imang kon tudu in mezbah, sinbá ronginginea mokosanang kon gina i TUHAN. Natuata in pogogaid i imang moposumba in kuruban potobut kon dosa in intau biasa tobatú, dá intau tatua in ampungan i TUHAN.

³²Aka intau tobatú mopokuruban in domba tobatú mobaḻí kuruban potobut kon dosanea, dá domba tatua musti kobaayan inta mopia.

³³Sia in musti mopotudu in ḻimanea kon uḷu in mahaḷuk tatua, bodongka ratáannea kon dotá in utuan mezbah, tampat pororataan kon mahaḷuk inta mobaḻí kuruban tubáan.

³⁴Imang musti mopoḷodok in gongguyamúnea kon dugú in mahaḷuk tatua, bodongka popoḻeponea kon tungoi mita inta kon siku in mezbah, bo kiagatnea in popobutak kon datoḷan in mezbah.

³⁵Onda intua bayongan ḷongó in mahaḷuk tatua musti gamáan ná kon kuruban dodamean. Ḷongó tatua musti tubáan kon tudu in mezbah, poyotakinon in kuruban kaanon inta posumba kon i TUHAN. Natua in pogogaid i imang kon moposumba in kuruban potobut kon dosa in intau tatua, dá sia in ampungan i TUHAN.