Read Mongondow IMAMAT 5 Bible Online

IMAMAT 5 - Mongondow bible

IMAMAT 5

¹Kuruban pongampung kon dosa tua in paraḷu posumba kon dodai in kaadaan tanaa: Aka intau tobatú pinoigum mobogoi in katarangan kon bonu in pongadilan, táe diá nobogoi in katarangan soaḷ onu inta ain inontong ande inta dinongognea nodapot in sia musti motarima kon akibatnea.

²Aka intau tobatú kotaḷá tongá diábí sinumuod nogaid kon inta monajis, ná batangan noikadaidon kon awak in mahaḷuk inta ain minatoi, táe ḷagidon kinotaauannea kon noitaḷádon in oaidnea tatua.

³Aka intau tobatú noitaḷádon takin diá sinuod bo noḻiaidon kon barang monajis inta nongkon intau, táe ḷagidon kinotaauannea kon noitaḷádon in oaidnea tatua.

⁴Aka intau tobatú kotaḷádon sin kino ibo-ibotneadon kon mogaid kon onukabí, bo onda intua ḷagidon kinotaauannea kon noitaḷádon in oaidnea tatua.

⁵Kon bayongan pelekara tatua, intau inta kotaḷá tatua musti mongaku kon taḷánea.

⁶Bo inta mobaḻí tontobut in dosanea tatua, dá sia in musti modia kon domba tobatú ande bembé kobaayan sin ogoi kon i TUHAN. Bo ki imang in musti moposumba in kuruban tatua sinbá ampungandon in dosa intau tatua.

⁷Táe aka intau inta kotaḷá tatua diá mokopooyúon kon domba ande bembé sin potobut kon dosanea, dá sia in mustidon modia kon ḷagapan tarangkuku togapang ande ḷagapan paḷoma moḻinea, tobatú in baḻíon kuruban potobut kon dosa, bo tobatú in baḻíon kuruban inta tubáan.

⁸Ḷagapan mita tatua in mustibí diaan kon i imang. Ki imang in musti muna moposumba in ḷagapan inta ain sinantú baḻíon kuruban potobut kon dosa. Sigogow in ḷagapan tatua musti pitoion, táe diábí kobontowon.

⁹Dugú in ḷagapan tatua musti popopisik kon bingkí mita in mezbah, bo kiagatnea in musti romputon poḷuai kon datoḷan in mezbah mobaḻí kuruban potobut kon dosa.

¹⁰Mopaḷut mako kon tua ki imang moposumbadon in ḷagapan inta nogindua mobaḻí kuruban inta tubáan, podudui in atorang. Natuata in pogogaid i imang kon moposumba in kuruban mobaḻí tobutan in dosa intau tatua, dá intau tatua ampungandon i TUHAN.

¹¹Aka intau inta kotaḷá tatua diá mokopooyúon in ḷagapan tarangkuku togapang ande ḷagapan paḷoma mobaḻí kuruban potobut kon dosa, dá sia in musti modia kon topong tokilo. Topong tatua diábí motaau in bauian in ḷana zaitun ande takinan in kamania, sin kuruban tatua in kurubanbí potobut kon dosa deemanbí kuruban oḷudon.

¹²Topong tatua musti diaan kon i imang. Ki imang musti mogamá kon topong tatua toyangkom mobaḻí tompoingat kon tua mita aindon pinokuruban kon i TUHAN. Topong inta toyoyangkom tatua in musti tubáan kon tudu in mezbah mobaḻí kuruban kaanon. Tuata in nobaḻí kurubannea mobaḻí tobut in dosa.

¹³Natuata in pogogaid i imang kon moposumba in kuruban mobaḻí tobutan in dosa intau tatua, dá intau tatua in ampungandon i TUHAN. Kiagat in topong tatua in nobaḻídon silai i imang, ná doman kon kuruban gandum.

¹⁴Ki TUHAN nobogoi kon i Musa in atorang mita tanaa.

¹⁵Aka intau tobatú takin diá sinumuod bo ain noiḷaut in nogaid kon dosa sin nokoḻiong nobogoi in sosumbanea mita inta ain sinantú ogoi kon i TUHAN, dá intau tatua in musti modia kon kuruban mobaḻí toḻiu in karugian. Kuruban tatua musti domba tobatú ande bembé koḷakian inta totok in mopia, bo iapon podudui kon boḻinea inta sinantú kon Ḷoḷaigan i TUHAN.

¹⁶Intau tatua musti moguboḻi kon onu inta koḻipod kinoḻiongannea, bo dugangan in doyowa nopuḷú noporsen. Onda intua sia in musti mobogoi in mahaḷuk tatua kon i imang, bo ki imang in mopokuruban intua mobaḻí tobutan in dosa intau tatua, dá intau tatua ampungandon i TUHAN.

¹⁷Aka intau tobatú diá sinumuod in nogaid kon dosa bo noiḷautdon nogaid kon onu inta ilarang kon parenta i TUHAN tobatú, intau tatua kotaḷá bo musti motanggung kon akibatnea.

¹⁸Saḷaku kuruban ponoḻiu kon karugian dá sia in musti modia kon domba tobatú ande bembé koḷakian inta mopia totok bo boḻinea iapon podudui in boḻinea inta ain nobaḻí atorang kon Ḷoḷaigan i TUHAN. Imang mopokuruban in tua potobut kon dosa intau tatua, dá intau tatua ampungandon i TUHAN.

¹⁹Tuata in kuruban toḻiu in karugian potobut kon taḷá inta ain inaidannea kon i TUHAN.