Read Mongondow IMAMAT 7 Bible Online

IMAMAT 7 - Mongondow bible

IMAMAT 7

¹Naa in atorang mita pogogaid kon kuruban toḻiu in karugian. Kuruban tatua totok in motusi.

²Mahaḷuk inta pakéon kon kuruban tatua musti ratáan kon tampat pororataan kon mahaḷuk inta baḻíon kuruban tubáan, bo dugúnea in popobutak kon sí opat in mezbah.

³Ki imang in musti moposumba kon tudu in mezbah bayongan ḷongó in mahaḷuk tatua: Iputnea inta oyúon in ḷongó, ḷongó inta noikoḷob kon bonu in siannea, kombiloi takin ḷongónea, bo tonsilai inta totok in mopia nongkon poatnea.

⁵Tua mita musti tubáannea kon tudu in mezbah mobaḻí kuruban kaanon kon i TUHAN. Kuruban tatua in nobaḻí kuruban toḻiu in karugian.

⁶Bayongan intau ḷoḷaki kon bonu in baḷoi imang mita motaaubí mokaan kon ponoyá inta pinokuruban tatua, táe tua musti kaanon monia kon tampat inta ain sinantú, sin kuruban tatua motusi totok.

⁷Aka kuruban potobutan kon dosa bo kuruban toḻiu in karugian notongkai in atorangnea: Tapú in biag inta pokuruban in nobaḻí silai i imang inta noposumba.

⁸Kuḻit in biag tatua in nobaḻí domandon silai i imang.

⁹Pomuḷoi in kuruban oḷudon inta sinubá kon bonu in tampat pototubáan ande dinungú kon bonu in rumping ande inta inangag, tua in nobaḻí silai i imang inta noposumba.

¹⁰Táe kuruban oḷudon inta diá dinungú, pinomayá inta binauian in ḷana ande inta noingkag, tua mita nobaḻí silai in imang mita inta buí i Harun, bo mustibí silaion kotongkaion kon i monia.

¹¹Naa in atorang mita pogogaid kon kuruban dodamean inta pinosumba kon i TUHAN.

¹²Aka kuruban tatua pinosumba takin makusud mopoyaput in sukur, dá poyotakinon in mahaḷuk tatua pokuruban in roti diá iragian. Roti tatua motaaubí inta mobunod nongkon topong pomiaan kukis takin ḷana in zaitun, motaaubí doman in roti noingkag monipit inta iḻepoan in ḷana, ande kukis topong inta pinomia pinoyotakin in ḷana zaitun.

¹³Koḻikud intua musti posumba doman roti inta iragian.

¹⁴Nongkon noyagi-yagimai in roti tongosilai in musti posumba kon i TUHAN, bo tua in nobaḻí silai i imang inta nogamá kon dugú in mahaḷuk tatua bo nopobutak kon mezbah mobaḻí kuruban dodamean.

¹⁵Tapúnea musti kaanon kon dodai in mahaḷuk tatua pinosumba, topiḻikmai diábí motaau tonggagatan modapot in mobangon monik.

¹⁶Aka intau tobatú modia kon kuruban dodamean sin mogintompod kon dandinea, ande kuruban inta nomuká nongkon ginanea tontaní, diá bidon musti kodaiton kaanon kon singgai doman tatua. Ibanea in motaaubí kaanon mobangon monik.

¹⁷Aka kon singgai nogintoḷu bo oyúonpa in ki agatnea, dá ki agatnea tatua musti daiton tubáan.

¹⁸Táe aka kon singgai nogintoḷu bo ponoyá tatua kaanonpa doman, dá kuruban tatua in diá bidon tarimaan bo diádon mobaḻí barakat kon intau tatua, sedang bo mobaḻíbí poton. Intau inta mokaan kon tua mobaḻídon kotaḷá bo musti motarima kon akibatnea.

¹⁹Tapú inta kinotugatan in inta monajis musti tubáan modait bo diábí motaau kaanon. Tapú inta mobaḻí kuruban dodamean tongábí motaau kaanon in intau mita inta diá monajis.

²⁰Aka intau inta mokaan kon ponoyá tatua bo dodai intua monajis, dá sia diádon pinoyoiap anggota umat i TUHAN.

²¹Aka intau tobatú nokaan kon ponoyá inta pinokuruban tatua bo mopaḷut mako kon tua sia moḻiai kon inta monajis, pinomayá kon intau ande inta nongkon mahaḷuk, dá sia doman in diádon poyoiapon anggota in umat i TUHAN.

²²Ki TUHAN nobogoi kon i Musa in atorang mita tanaa

²³kon bangusa Israel. Ḷongó in sapi, domba ande bembé diábí motaau kaanon.

²⁴Ḷongó in mahaḷuk inta minatoi monag naníon ande dinomok in mahaḷuk moraat ibanea, diábí motaau in kaanon táe motaaubí in pakéon kon kaparaḷuan ibanea.

²⁵Intau inta mokaan kon ḷongó in mahaḷuk inta motaau posumba mobaḻí kuruban kaanon kon i Allah, yo intau tatua in diá bidon poyoiapon umat i TUHAN.

²⁶Intau Israel, kon ondaka in pinogutunannea, diábí motaau in mokaan kon dugú in ḷagapan ande dugú in mahaḷuk ibanea.

²⁷Ki ine in ḻimimpat kon atorang tatua yo diá bidon iniap umat i TUHAN.

²⁸Ki TUHAN nobogoi kon i Musa in atorang mita tanaa

²⁹kon bangusa Israel. Ki ine in modia kon kuruban dodamean, musti mopotondí in tongosilai sin diaan posumba kon i TUHAN.

³⁰Sia tontaní in musti modia kon kuruban kaanon tatua. Ḷongó bo dodob in mahaḷuk tatua musti posumba mobaḻí sosumba inta sinonoi kon i TUHAN.

³¹Ki imang musti motubá kon ḷongó in mahaḷuk tatua kon tudu in mezbah, táe dodobnea in nobaḻíbí silai in imang mita.

³²Páanea koḷanan in musti ogoi mobaḻí tonsilai tontaní

³³kon imang inta noposumba in dugú bo ḷongó in kuruban dodamean tatua.

³⁴Dodob bo páa koḷanan in nobaḻí oogoi husus inta ginamá i TUHAN nongkon sosumba sinonoi in bangusa Israel bo ogoi kon imang mita. Tuata in umuran mobaḻí pinononsilai in bangusa Israel kon imang mita.

³⁵Nongkon kaanon inta pinosumba kon i TUHAN, tuata in inogoinea kon i Harun bo kon i adínea mita kon singgai kon tungkuḷ in mosia baḻíondon imang.

³⁶Kon singgai tatua ki TUHAN nomarenta kon bangusa Israel sinbá nongkon sosumba monia, tonsilai tatua in ogoi kon imang mita. Atorang tatua in musti umuran duduian in bangusa Israel.

³⁷Natuata in atorang mita pogogaid kon kuruban inta tubáan, kuruban oḷudon, kuruban potobut kon dosa, kuruban toḻiu in karugian, kuruban ponabisan bo kuruban dodamean.

³⁸Ki TUHAN nobogoi in atorang mita tatua kon i Musa kon Buḷud in Sinai kon tungkuḷ in ki TUHAN nopotabá kon bangusa Israel noposumba in kuruban kon padang gurun Sinai.