Read Mongondow IMAMAT 8 Bible Online

IMAMAT 8 - Mongondow bible

IMAMAT 8

¹Ki TUHAN noguman kon i Musa,

²“Oinídon in ki Harun bo ki adínea mita bo diadon in pakeang imang, ḷana upacara, sapi koḷakian tobatú inta batánea sin baḻíon kuruban potobut kon dosa, domba koḷakian doyowa, bo tokompé in roti inta diá iragian.

³Bo oinídon in bayongan umat Israel moyosipun kon tayowon ḷoḻingkop in Ḷoḷaigan-Ku.”

⁴Ki Musa nogaid kon onu inta pinoki aid i TUHAN. Kon dodai in bayongan umat noyosipundon kon tampat tatua,

⁵Ki Musa noguman kon i monia, “Onu in aidanku tanaa in parentabí i TUHAN.”

⁶Bo sia in nopotabá kon i Harun bo kon i adínea mita mamangoi in muna bo mondarit kon awak monia.

⁷Nopaḷut mako kon tua pinoḷutudneadon in ḷambung imang kon i Harun: kameja, togot in ogotan bo jubah. Epod[1] doman inta pinopobogot kon ogotannea takin togotnea inta nongkon kaeng moaḷus.

⁸Bo pinoḷutudnea domandon in oḻingoi in dodob kon i Harun, bo pinopobonuneadon kon oḻingoi in dodob tatua in Urim bo Tumim.[2]

⁹Bo pinopobogotneadon kon uḷu i Harun in bogot in uḷu, bo pinopotomot domandon kon bogot in uḷu tatua in ḷambá buḷawan, inta nobaḻí tanda kon ki Harun ain nobaḻí kapunyaan i TUHAN. Tua mita inaidan i Musa podudui in parenta i TUHAN kon inia.

¹⁰Bo ki Musa in nogamá kon ḷana upacara bo pinoḻeponea kon Ḷoḷaigan i TUHAN bo bayongan pakakatnea. Tua in moponiata kon bayongan in yagi-yagi aindon inogoi kon i TUHAN.

¹¹Topiḻik nongkon ḷana tatua pinopopisiknea kopitu kon tudu in mezbah bo kon bayongan pakakatnea, bo pinopopisik doman kon tudu in bak bo dodoyonannea. Tua moponiata kon bayongan in yagi-yagi komintandon inogoi kon i TUHAN.

¹²Nopaḷut mako kon tua ki Musa nomaḻídon imang kon i Harun takin nopobutak in ḷana upacara topiḻik kon uḷu i Harun.

¹³Bo ki Musa in nogoiní kon i adí mita i Harun namangoi in muna. Pinopopakéneadon kon i monia in ḷambung bo togot in ogotan. Bo pinopobogotneadon in bogot in uḷu kon i monia ná inta ain pinoki aid i TUHAN kon inia.

¹⁴Nopaḷut mako kon tua ki Musa in nogamá kon sapi koḷakian batánea tobatú sin pakéon pokuruban potobut kon dosa. Ki Harun bo ki adínea mita mopoukat in ḻima monia kon uḷu in mahaḷuk tatua.

¹⁵Onda in tua iratá i Musa bo dugúnea ibanea in gamáannea. Gongguyamúnea tontaní in pinoḷodoknea kon dugú tatua bodongka poḻeponea kon tungoi mita inta kon siku mita in mezbah, sinbá mezbah tatua tongádon ogoi kon i Allah. Dugú ki agatnea in popobutak kon datoḷan in mezbah. Natuata in mopobaḻí motusi kon mezbah tatua bo tongádon ogoi kon i TUHAN.

¹⁶Bo nongkon sapi inta bagu iratá tatua, gamáan komintan i Musa in bayongan ḷongó inta noikoḷob kon siannea, kombiloinea takin tonsilai inta totok in mopia nongkon poatnea. Tua komintan tubáannea kon tudu in mezbah.

¹⁷Táe tapú in sapi tatua, kuḻitnea, bonu in sian ibanea moitakin doman in kompongnea, dá komintan sapi tatua koḻikudon inta ain sinontaní in tubáanneadon kon ḷuai in ḷoḷaigan ná inta pinoki aid i TUHAN.

¹⁸Onda intua ki Musa mogamá kon domba koḷakian sin baḻíon kuruban tubáan, bo ki Harun takin ki adínea mita mopoukat in ḻima monia kon uḷu in domba tatua.

¹⁹Iratá i Musa in domba tatua bo dugúnea in pinobutaknea kon sí opat in mezbah tatua.

²⁰Bo mahaḷuk tatua in yingatonnea bo bonu in siannea takin sioḷnea in batáanneadon kon tubig. Uḷu, ḷongó, bo ki agat in tapú in domba koḷakian tatua tubáannea mobaḻí kuruban tubáan kon tudu in mezbah ná inta ain pinoki aid i Musa kon inia. Rongingi in kuruban kaanon tatua mokosanang kon gina i TUHAN.

²²Bo ki Musa in bui nogamá kon domba koḷakian tobatú ibanea sin baḻíon kuruban pomaḻían kon imang. Ki Harun bo ki adínea mita mopoukat in ḻima monia kon uḷu in domba tatua,

²³bodongka ratáan i Musa. Mopaḷut mako kon tua sia mogamá kon dugú in mahaḷuk tatua topiḻik, bo poḻeponea kon bongoḷan koḷanan i Harun, kon ki iná in ḻimanea koḷanan, bo ki iná in sioḷnea koḷanan.

²⁴Onda intua sia mopotabá kon i adí mita i Harun dimiug, bo ḻepoannea doman in dugú topiḻik kon bongoḷan monia koḷanan, kon ki iná in ḻima monia koḷanan, bo kon ki iná in sioḷ monia koḷanan. Kiagat in dugú tatua popobutaknea kon sí opat in mezbah.

²⁵Ki Musa mogamá kon ḷongó in domba tatua, iputnea inta oyúon in ḷongó, bayongan ḷongó inta noikoḷob kon bonu in siannea, tonsilai inta totok in mopia nongkon poatnea, kombiloinea takin ḷongónea bo sioḷnea koḷanan.

²⁶Nongkon kompé inta kon bonu in roti diá iragian inta ain pinosumba kon i TUHAN, ki Musa in nogamá kon roti tobatú inta mobunod inta pinomia binauian in ḷana bo tobatú doman in roti inta nonipit. Roti tatua inukatnea kon tudu in ḷongó bo páa koḷanan in domba.

²⁷Bayongan tua inukatnea kon ḻima i Harun bo kon ḻima i adínea mita, bo pinosumba monia nobaḻí sosumba inta sinonoi kon i TUHAN.

²⁸Mopaḷut mako kon tua ki Musa mogamá kon kaanon tatua nongkon imonia bo tubáannea kon tudu in mezbah, poyotakinon in kuruban inta tubáan sin pakéon mobaḻí kuruban pomaḻían kon imang. Rongingi in kuruban kaanon tatua mokosanang kon gina i TUHAN.

²⁹Bo ki Musa in nogamá kon dodob in domba tatua bo pinosumbanea mobaḻí sosumba tonoion kon i TUHAN. Tuata in silai i Musa nongkon domba koḷakian inta pinokuruban kon upacara pinomaḻían kon imang. Tua komintan inaidan i Musa notongkai ná inta ain pinoguman i TUHAN kon inia.

³⁰Nopaḷut mako kon tua ki Musa nogamá kon tongosilai in ḷana upacara bo tongosilai nongkon dugú inta kon tudu in mezbah, bo pinopo pisiknea kon i Harun bo kon i adínea mita takin pakeang monia. Tua in pinomia i Musa sin mopotondí kon i monia bo ḷambung monia ogoi kon i TUHAN.

³¹Onda intua ki Musa noguman kon i Harun bo kon i adínea mita, “Dungúdon in ponoyá kuruban tatua kon tayowon in ngara Ḷoḷaigan i TUHAN. Podudui in parenta i TUHAN, musti kaanon monimu kon tua takin roti kuruban pinomaḻían kon i monimu imang inta binonu kon kompé.

³²Ki agat in ponoyá bo roti tatua musti tubáan monimu kopayongon.

³³Kon bonu in pitu nosinggai moiko in diábí motaau in monaḷámai kon Ḷoḷaigan i TUHAN dapot in upacara pomaḻían imang kon inimu tatua mopaḷut.

³⁴Ki TUHAN noguman sinbá onu in inaidan monimu singgai naa yo umuran doman aidan monimu kon singgai moiduduimai. Aka mogaid kon upacara tatua dá dosa mita monimu in ampungandon.

³⁵Kon bonu in pitu nosinggai, singgai bo doḷom, moiko musti mogutun mako kon tayowon ngara in Ḷoḷaigan sin mogaid kon onu inta parentaan i TUHAN. Aka diá aidan monimu, yo matoi in moiko. Tuata in pinotaau i TUHAN kon inakó.”

³⁶Bo ki Harun takin ki adínea mita nomiadon kon bayongan inta pinoki aid i TUHAN inta pinotaaunea kon i Musa.