Read Mongondow IMAMAT 9 Bible Online

IMAMAT 9 - Mongondow bible

IMAMAT 9

¹Tosinggai naonda in upacara pinomaḻían kon imang tatua nopaḷut, kon singgai noginwaḷu, ki Musa nogoiní kon i Harun bo kon i adínea mita takin itoi mita in bangusa Israel.

²Guman i Musa kon i Harun, “Pogamádon kon sapi koḷakian batánea tobatú bo domba koḷakian tobatú, tumpaḷa mongopia. Posumbadon in mahaḷuk doyowa tatua kon i TUHAN, sapi koḷakian in posumba mobaḻí kuruban potobut kon dosa, bo domba koḷakian in kuruban tubáan.

³Bo potabádon in bangusa Israel moposumba in bembé koḷakian tobatú mobaḻí kuruban potobut kon dosa bo ki adí in sapi tobatú takin ki adí in domba tobatú inta tumpaḷa umurdon totaong bo inta mongopia sin baḻíon kuruban tubáan.

⁴Potabá in mosia moposumba doman in sapi koḷakian tobatú bo bembé koḷakian tobatú mobaḻí kuruban dodamean. Tua komintan in musti posumba monia kon i TUHAN poyotakinon in kuruban oḷudon inta pakéan in ḷana, sin kon singgai naa ki TUHAN mamangoi kon i monia.”

⁵Bayongan inta pinongoyow i Musa dinia monia kon tayowon in Ḷoḷaigan, bo bayongan umat noyosipun kon tua sin moibada kon i TUHAN.

⁶Bo ki Musa in noguman, “Ki TUHAN nopotabá nokiaid in naa kon i monimu sinbá moiko mokoontong kon sindar koangoian i TUHAN.”

⁷Nopaḷut mako kon tua sia noguman kon i Harun, “Bayádon kon mezbah bo sadiadon in kuruban potobut kon dosa bo kuruban tubáan, sinbá dosamu bo dosa in umat ampungandon i TUHAN. Aidaidon intua ná inta ain pinoki aid i TUHAN.”

⁸Dá minayádon in ki Harun kon mezbah bo noratá kon sapi koḷakian inta baḻíon kuruban potobut kon dosanea tontaní.

⁹Ki adí mita i Harun nodia kon dugú in mahaḷuk tatua kon i Harun, bo sia nopoḷodokdon in gongguyamúnea kon dugú tatua, bo poḷat nopoḻepo kon tungoi mita inta kon siku opat in mezbah. Onda intua kiagat in dugú tatua pinopobutakneadon kon datoḷan in mezbah.

¹⁰Ḷongó, kombiloi bo tonsilai inta totok in mopia nongkon mahaḷuk tatua tubáannea kon tudu in mezbah, ná inta pinarenta i TUHAN kon i Musa.

¹¹Táe tapú bo kuḻit in mahaḷuk tatua tubáannea kon ḷuai in ḷoḷaigan.

¹²Onda intua ki Harun noratá kon mahaḷuk tatua mobaḻí kuruban tubáan kon inia tontaní. Ki adí mita i Harun modia mangoi kon dugú in mahaḷuk tatua kon inia, bo ki Harun mopobutak kon siku opat in mezbah tatua.

¹³Nopaḷut mako kon tua mosia mopoabatdon kon inia in uḷu bo tonsilai mita ibanea nongkon mahaḷuk tatua, bo sinubánea kon tudu in mezbah.

¹⁴Noiduduimai kon tua bonu in sian bo páa in mahaḷuk tatua binatáannea bodongka sinubánea pinoyotakin in kuruban tubáan kon tudu in mezbah.

¹⁵Nopaḷut mako kon tua sia noposumba in bembé mobaḻí kuruban potobut kon dosa in umat. Bembé tatua iratánea bo pinosumbanea ná pinogogaid kon kuruban pinotobut kon dosanea tontaní.

¹⁶Noiduduimai kon tua ginamánea doman in mahaḷuk inta nobaḻí kuruban tubáan, bo pinosumbanea podudui in atorang.

¹⁷Nopaḷut mako pinosumbaneadon in kuruban oḷudon; ginamánea in topong toyangkom, bo sinubánea kon tudu in mezbah. Tua in nobaḻíbí indugang kon kuruban tubáan muḷoi in singgai.

¹⁸Bo iratánea domandon in sapi koḷakian tobatú bo domba koḷakian tobatú mobaḻí kuruban dodamean kon umat. Ki adí mita i Harun nobogoi in dugú in mahaḷuk tatua kon inia, bo sia in nopobutak kon sí opat in mezbah.

¹⁹Bayongan ḷongó in sapi bo bembé tatua inukat monia

²⁰kon tudu in dodob in mahaḷuk tatua, bo sinubá i Harun kon tudu in mezbah.

²¹Dodob bo páa koḷanan in mahaḷuk tatua pinosumbanea nobaḻí sosumba tonoion kon i TUHAN. Tua in nobaḻí silai in imang mita, ná inta ain pinoguman i TUHAN kon i Musa.

²²Naonda in mopaḷut mako noposumba in bayongan kuruban tatua, ki Harun nobingkat kon ḻimanea pinotayow kon bayongan umat Israel bo nomarakat kon i monia, bodongka sia moponag.

²³Onda intua ki Musa bo ki Harun sinumuot kon bonu in Ḷoḷaigan i TUHAN. Nopaḷut mako kon tua mosia iḻumuai bo nomarakat kon umat. Bo bayongan umat Israel nokoontong kon sindar kinoangoian i TUHAN.

²⁴Bo daḻídon in ki TUHAN nopoponag in tuḷú inta nomokak kon bayongan kuruban tubáan takin bayongan ḷongó inta kon tudu in mezbah. Naonda in umat Israel nokoontong kon tua, mosia norogiow bo dinumokó nosumba.