Read Mongondow YEREMIA 1 Bible Online

YEREMIA 1 - Mongondow bible

YEREMIA 1

¹Buk tanaa tombonunea in tosingogon mita i Yeremia ki adí i Hilkia imang tobatú nongkon kotá in Anatot kon butá in Benyamin.

²Ki TUHAN in nosingog kon i Yeremia kon taong impuḷú bo toḷúnea kon pinomarentaan i Yosia ki adí i Amon datu in Yohuda.

³Nopaḷut mako kon tua ki TUHAN in buidon nosingog kon inia nopobui-buimai, pinangkoi kon tungkuḷ in pinomarentaan i Yoyakin ki adí i Yosia nodapot in taong impuḷú bo mitánea kon pinomarentaan i Zedekia ki adí i Yosia. Kon buḷan iḻimanea kon taong tatua doman intau mita in Yerusalem inakut pinobayá in pinoḷumbúan.

⁴Ki TUHAN in noguman kon inakó,

⁵“Kon dodai in Akuoi diápa nomia kon inimu kon bonu in sian i inámu, bo kon dodai in iko diápa pinononggadí, Akuoi ain nomiḻí kon inimu bo noduí kon inimu mobaḻí nabi kon bangusa mita.”

⁶Akuoi in notubag, “O TUHAN Inta Totok in moḷantud, akuoi in diábí mopandoi mosingog sin akuoi in noiḻiupa in guod.”

⁷Táe ki TUHAN in notubag, “Dika moguman kon noguodpa in iko. Aka Akuoi in mopotabá kon inimu mayá kon i ineka, yo iko in mustibí mayá, bo bayongan inta pokiguman-Ku kon inimu, mustibí potaaumu kon i monia.

⁸Dika moondok kon i monia, sin Akuoi in moyotakinmu bo moḷukad kon inimu. Akuoi ki TUHAN ain nosingog!”

⁹Onda intua ki TUHAN nopotuntun in ḻima-Nea, bo noḻiai kon bibigku bo noguman, “Indongogai bo potaaudon in singog mita inta potaau-Ku naa.

¹⁰Singgai in naa Akuoi in mobogoi kon inimu in kawasa kon bangusa mita bo dodatuan mita — kawasa mogumpag bo morumbun, bo mopoḷabú bo moyopú, sin moposindog bui bo momuḷa.”

¹¹Ki TUHAN in noḻibó kon inakó, “Onu in inontongmu, Yeremia?” Akuoi in notubag, “Tanga in pangkoi in badam, TUHAN.”

¹²“Totuu,” guman i TUHAN, “Akuoi in moḷukad[1] sinbá bayongan inta singogon-Ku in moniata.”

¹³Bo ki TUHAN in bui noḻibó kon inakó, “Onupa doman in inontongmu?” Akuoi in notubag, “Kon dotá in utuan inontongku oyúon in kuyon inta bonunea in yogot mogoḷa-goḷak bo gogiódon moibutak mangoi.”

¹⁴Ki TUHAN in noguman, “Nongkon utuan bodito in moiḻimpó bo moiuma kon bayongan in intau in ḻipú tanaa.

¹⁵Akuoi in mopotabá kon bayongan in bangusa kon dotá in utuan mamangoi mongawasa kon Yerusalem. Dinding mita in kotá tanaa takin ḷoḻingkop in bonawangnea bo bayongan in kotá kon Yohuda in agowonbí monia.

¹⁶Akuoi in mohukumbí kon umat-Ku, popisí in mosia binaradosa bo nonoḻikud kon i-Nakó. Mosia in noposumbadon in kuruban mita kon ilah mita ibanea, bo nomiadon kon patong mita poḷat sinumba monia.

¹⁷Posadiadon, Yeremia! Bayádon bo potaaudon kon i monia, bayongan inta pinoki aid-Ku kon inimu. Dika moondok kon i monia, sinbá diá baḻíon-Ku in iko totok in moondok aka moyogintayowan mako monia.

¹⁸Indongogai! Iko in tayowanbí in intau mita kon butá tanaa, pinomayá datu mita in Yohuda, pomarenta mita, imang mita, bo rayat. Táe singgai naa Akuoi in mobogoi in ropot kon inimu sin monayow kon i monia. Iko in mobaḻídon naonda bo kotá inta dininding, naonda bo oigi uatoi bo dinding bitú. Mosia in diábí mokotaḷow kon inimu, sin Akuoi in moyotakinmu bo moḷukad kon inimu. Akuoi, ki TUHAN, ain nosingog.”