Read Mongondow YEREMIA 13 Bible Online

YEREMIA 13 - Mongondow bible

YEREMIA 13

¹Ki TUHAN nopotabá kon inakó notaḷui kon bintoḷ nopoḷok nongkon lenan bo pinaké, táe diábí motaau in akuoi mopoḷodok intua kon tubig.

²Dá minayádon in akuoi notaḷui kon bintoḷ nopoḷok tatua, bo nomaké intua.

³Onda intua ki TUHAN nosingog bui kon inakó, kai-Nia,

⁴“Bayádon kon Ongkag in Eprat, bo bunidon in bintoḷ nopoḷok tatua kon sigad in batu.”

⁵Dá podudui in parenta i TUHAN minayádon in akuoi bo nobuni kon bintoḷ nopoḷok tatua kon diug in Ongkag in Eprat.

⁶Diá noonggot kon tua ki TUHAN in nopotabá bui kon inakó minayá in Ongkag in Eprat sin mogamá kon bintoḷ nopoḷok tatua.

⁷Dá minayádon in akuoi bo nopoḷuai in bintoḷ nopoḷok tatua nongkon pinobunianku. Noniata magí yo noyapakdon in bintoḷ tatua bo diádon in baragunanea.

⁸Bo ki TUHAN in noguman bui kon inakó, kai-Nia,

⁹“Natuata in pogogaid-Ku kon intau in Yohuda bo intau in Yerusalem. Akuoi in morimumud kon koḷoḷatú monia inta moiḻiudon totok tua.

¹⁰Bangusa inta moraat tanaa totok in pamandot bo diá motoḷutui kon i-Nakó. Mosia in moibada bo mosumba kon ilah mita ibanea. Tuamai mosia in mobaḻí naonda bo bintoḷ nopoḷok inta diá in mangaḻenea tua.

¹¹Naonda bo bintoḷ nopoḷok noitogot nopia kon ogotan in intau inta nomaké, natuata in makusud-Ku sinbá umat in Israel bo Yohuda moyotogot modagin kon i-Nakó. Pongin natua mosia in mobaḻí umat-Ku inta nomaḻí kon tangoi-Ku in dinayow bo horomaton. Táe, mosia in doíbí dinumudui kon i-Nakó.”

¹²Ki TUHAN Allah in noguman kon inakó, “Yeremia, poyaputdon in koyow-Ku kon intau in Israel kon batúan in guci pobobonuan kon anggur musti bonuan kopuḻingon in anggur. Mosia in motubagbí, ‘Umpaka dá diábí kotaauan nami kon batúan in guci mustibí bonuan in anggur kopuḻingon?’

¹³Dá pogumandon kon i monia kon intau mita kon butá tanaa, datu mita buí i Daud, imang mita, nabi, bo bayongan in intau in Yerusalem in bonuan-Ku kopuḻingon in anggur modapot in moḷoḷangu.

¹⁴Bo mosia in poyodatongon-Ku. Nogurang bo noguod in pomiaan-Ku natua takin diábí in ampung. Mosia in yopúon-Kubí takin diábí in tabi andeka diábí in ampung. Akuoi, ki TUHAN, ain nosingog.”

¹⁵Umat in Israel, ki TUHAN ain nosingog! Dika ḷumoḷatú, indongogai in Sia!

¹⁶Ki TUHAN Allahmu musti poḷantudonmu kon dodai in diápa in Sia mopoangoi in sindip, bo sioḷmu in moipintud kon buḷud, kon dodai in bayag inta inoḷatmu mako baḷuiannea mobaḻí sindip.

¹⁷Aka iko doí mokidongog, mongombaḷbí in akuoi umuni-uni. Takin monakit in gina ombaḷanku in ḷoḷatúmu tua. Ḷuáku in motutug sin umat i TUHAN in dinia nobaḻí intau dinakop.

¹⁸Ki TUHAN in noguman kon inakó, “Potabá in datu bo ki inánea moponag nongkon pomomarentaannea, sin mahkotanea inta mopia in noḷabúdon kon uḷunea.

¹⁹Kotá mita in Yohuda kon dotá in toḷatan koyogotdon in kinopung, bo diádon in mokoḷuai kon pinongopungan tatua. Bayongan intau in Yohuda in diniadon kon pinoḷumbúan.”

²⁰Ki TUHAN in noguman kon intau in Yerusalem, “Taridiaidon! Musungmu mita in niondon taya-taya mangoi nongkon utuan! Kon onda in intau mita inta musti ḷukadan monimu bo inta totok in pongata-ngata mako monimu.

²¹Onu in singogon monimu aka intau mita inta binaḻí monimu yobayatmu mita nonaḷow bo mongawasa kon i monimu? Notantúbí kon korasaan monimu in monakit naonda bo bobay inta koyogot mononggadí.

²²Degá moḻibó in moiko nongonu sin tua komintan in moiantugbí kon inimu, nongonu sin ḷambungmu in binerakbí bo moiko in pinakisa siniugan. Pokotaaudon kon tua in nobaḻí popisí in dosamu noiḻiudon in barong.

²³Motaau degá in intau morondí momaḷui kon kuḻitnea, andeka harimau monginggamá kon baḷangnea? Notantúbí kon diá! Natuabí doman in moiko inta aid moraat noipakédon yo diábí domandon inta mogaid kon inta mopia.

²⁴Akuoi in moporaritbí kon i monimu naonda bo baḻeká inirup in tompot nongkon padang gurun.

²⁵Tuata in ukurmu inta ain sinantú-Ku popisí in moiko ain nokoḻiong kon i-Nakó, bo nopirisayadon kon ilah mita diá totuu.

²⁶Akuoi tontaní in momerak kon ḷambung nongkon awakmu sinbá mopilangdon in moiko bo mooyá.

²⁷Akuoi in nokoontongdon kon i monimu in nogaid kon inta kinodoí-Ku. Inontong-Kudon in ilah mita ibanea kon tombuḷudnea bo kon gobá, naonda bo ḷoḷaki tobatú mongibog totok kon i buḷoi bobay in intau ibanea andeka naonda bo kabaḷo koḷakian inta mongibog kon kabaḷo kobaayan. Ei intau in Yerusalem, moboditodon in moiko! Toonu degá in moiko in moiḷuat kon bayongan in inta moraat?”