Read Mongondow YEREMIA 15 Bible Online

YEREMIA 15 - Mongondow bible

YEREMIA 15

¹Ki TUHAN in noguman kon inakó, “Diá bidon in Akuoi motabi kon bangusa tanaa, umpakabí ki Musa bo ki Samuel in simindog kon naa mopoigum in totabi-Ku kon i monia. Potabádon mayá in bangusa tanaa, doídon in Akuoi moindoi kon i monia!

²Aka ḻibóon monia kon inimu mongo kon onda in bayáan monia, yo tubagai nanaa, ‘Ki TUHAN in noguman, inta sinantú matoi popisí in takit yo biódon mako in sia matoi in takit. Inta sinantú matoi kon poparangan yo biódon mako in sia matoi kon parang. Inta sinantú matoi popisí in gogoy yo biódon mako in sia matoi in gogoy. Inta sinantú dakopon, yo biódon mako in sia diaan saḷaku intau dinakop!’

³Akuoi, ki TUHAN, ain nonantú kon hukuman opat norupa inta mokoondok in mobaḻíbí kon i monia: mosia in matoi kon poparangan, mayat monia in uguton in ungkú, kaanon in ḷagapan, bo indaitan in mahaḷuk turá.

⁴Baḻíon-Ku in bayongan bangusa kon dunia mokoningkim in mokoontong kon i monia. Tua komintan aidan-Ku popisí in aid in Manasye ki adí ḷoḷaki i Hizkia kon Yerusalem kon tungkuḷ in sia nobaḻí datu in Yohuda.”

⁵Ki TUHAN in noguman, “Ei intau in Yerusalem, ki ine in monotabi kon i monimu? Ki ine in moibog moduḷu monahang kon nakit in gina monimu? Ki ine in moibog mongandup sin moḻibó kon kaadaanmu?

⁶Moiko in nondoídon bo nonaḷámai kon i-Nakó, tuamai in tonggóon-Ku in ḻima-Ku sin porimumud kon i monimu, sin mobúdon in Akuoi in momondam kon torú-Ku.[10]

⁷Kon batúan in kotá kon butá tanaa moiko in ḷumbúon-Ku naonda bo wawa. Umpakabí moiko in umat-Ku táe yopúon-Kubí in moiko takin ki adímu mita popisí in moiko doí momaḷui kon gogutúmu.

⁸Butámu in mopuḻing in boba-bobay, moiḻiu kon kobayong in bungaion kon pintad. Intau mita in ḻimodon-Ku kon dodai in moguodpa dá ki iná monia in mororiga. Kon dodai in singgai poangoi-Ku kon i monia in moḷoḻimod tobatú dá angoian in ondok in mosia bo moḻia-ḻiaw in gina.

⁹Ki iná inta kinobuḻian in adí ḷoḷaki taya pitu in sinogopuḷong sin mosisí in poginaannea. Singgai kinobiagannea in nosindipdon, kinorasaannea kon sia in pinopoompámai bo pinokopo oyámai. Musungmu mita pokiḻimodan-Ku in inta nobiagpa kon sigad monimu. Akuoi, ki TUHAN, ain nosingog.”

¹⁰Totuu mosoe in akuoi naa! Onubí in mangaḻe in pinononggadían i ináku kon inakó? Akuoi in mustibí morogenggeng takin bayongan in intau. Umpakabí diá kon dodai in onda in akuoi mopoḷuan andeka moḷuan, táe akuoi in inodi-odian in bayongan intau.

¹¹TUHAN, aka akuoi bo diá nopobayá in oaidanku kinopira, bo diá notuḷung kon musung mita kon tayowon-Mu kon dodai in mosia kinoantugan in anib bo roriga, yo biódon mako in kobaḻían in onu inta pinogodi-godi in intau mita tatua. (

¹²Diá tobatúmai in intau in mokoputoḷ kon uatoi, apapa doman uatoi nongkon utuan inta ain binaukan in bitú.)

¹³Ki TUHAN in noguman kon inakó, “Akuoi in mopotabábí kon musung sin mogakut kon kaoyúonan bo kapunyaan in umat-ku nobaḻí hukuman kon dosa mita inta ain inaidan monia kon sinangkub in butá.

¹⁴Kon butá in intau inta diá kinotaauan monia, Akuoi in mopobaḻíbí kon i monia ata in musung mita monia, sin torú-Ku in noiḻimpódon naonda bo tuḷú inta tumagab bo doídon mopiong.”

¹⁵Bo akuoi in noguman, “TUHAN, Iko in nomangaḻe. Toropdon bo tuḷungaipa kaasí in akuoi. Tuḻíaidon in mosia inta nogaḷow bo inta nomogutú kon inakó. Dika moiḻiu in sabar kon i monia modapot in mosia bain mokoḻimod kon inakó. Toropdon kon popisí in Iko dá akuoi in siningkuḻe.

¹⁶Iko in nosingog kon inakó, bo akuoi in nokidongog kon bayongan in tosingogon-Mu. Akuoi naa in Iko in kitogi, o TUHAN Allah Inta Totok in mokawasa, tuamai in tosingogon-Mu mita in mokosanang bo mokoḷunganga kon inakó.

¹⁷Akuoi in diábí sinumakin nobarasanang takin intau mita inta noyosipun sin moyambá. Popisí in motoḷutui kon ini-Mu dá sinumontaní in akuoi takin sinumorú.

¹⁸Nongonu sin akuoi in umuranbí mororiga? Nongonu sin kekebku in nodaḷombí bo diá mopopia? Degá makusud-Mu moponakit in ginaku naonda bo ongkag inta noingkagdon kon sempo in poninggai?”

¹⁹Ki TUHAN in notubag, “Aka iko in mobui, yo takinan-Kubí in iko. Iko in mobaḻídon bui mogogundoi-Ku. Aka iko in mopotaau kon inta oyúon in mangaḻenea bo deeman uboḷ, dá iko in motaau mobaḻí nabi-Ku bui. Intau mita in buibí mamangoi kon inimu, bo diá bidon paraḷu in iko mayá kon i monia.

²⁰Iko in baḻíon-Ku naonda bo dinding porunggu kon i monia. Mosia in momarang kon inimu, táe diábí mokotaḷow kon inimu. Takinan-Kubí in iko sin moḷukad bo moposaḷamat kon inimu.

²¹Poḷuaton-Ku in iko nongkon kawasa in intau moraat inta moromú. Akuoi, ki TUHAN, ain nosingog.”