Read Mongondow YEREMIA 17 Bible Online

YEREMIA 17 - Mongondow bible

YEREMIA 17

¹Ki TUHAN in noguman, “Ei bangusa in Yohuda, dosamu in noikurigdon kon ginamu bo kon bayongan siku in mezbahmu mita pinais in polpen uatoi inta intau in matanea.

²Intaumu mita in moibada kon mezbah mita bo kon oigi mita in berhala inta ain pinosindog kon i Dewi Asyera kon pomuḷoi in pangkoi in kayu inta mobambar, kon tudu mita in tombuḷudnea,

³bo kon buḷud mita kon ḷuai in kotá. Sin bayongan in tampat pososumbaan kon berhala inta ain pinosindog monimu kon sinangkub in butá bo popisí in bayongan dosa inta ain inaidan monimu, dá baḻíon-Ku in musungmu mita mogakut kon bayongan in kapunyaan bo kaoyúonanmu.

⁴Moiko in pakisadon mobogoi in butá inta ain inogoi-Ku kon inimu, bo baḻíon-Ku in moiko mobantung kon musungmu kon butá inta totokbí in diá kinotaauanmu. Tua in inaidan-Ku komintan popisí in torú-Ku noiḻiudon naonda bo tuḷú inta nodokot bo diádon kopiongan.”

⁵Ki TUHAN in noguman, “Aka intau monaḷámai kon i-Nakó, ki Tuhannea, bo umandoḷ kon intau poḷat umandoḷ kon ropotnea, dá hukumon-Ku in sia.

⁶Sia in naonda bo pinomuḷa inta nobiag kon rawang, kon tudu in butá noḷogat, noingongow bo noibung, diá kon dodai in onda in sia in mokorasa kon kopiaan.

⁷Táe intau inta umandoḷ kon i-Nakó in umuran barakatan-Ku.

⁸Sia in naonda bo pangkoi in kayu kon bingkí in ongkag moiḻig; uakatnea in noidapot in tubig sia in diábí moondok kon sempo in poninggai daunnea mita in tantúbí moḷunow. Umpakabí butá inonag in singgai yo sia in diábí moḻia-ḻiaw in gina sin sia in umuran momungai.

⁹Gina in intau diábí kodoḷopan, moiḻiu in licik nongkon bayongan yagi-yagi bo totuu mobogat in takitnea.

¹⁰Akuoi, ki TUHAN monaridi kon gina, bonu in dodob in intau ujion-Ku kon batúan in intau tuḻían-Ku podudui in dodianea, bo aidan-Ku podudui in oaidnea.”

¹¹Naonda bo ḷagapan nogoob kon natu inta deeman natunea, natuata in intau inta diá mojujur mokouḻí kon kapunyaan. Kon umur moḻin gurangdon sia in kobuḻian in bayongan in kapunyaannea. Kon imbuit in kobiagannea moniata sia in intau inta bodok totok.

¹²Baḷoi i TUHAN naton naonda bo pomomarentaan inta momulia, kon buḷud inta moḷantud nongkon dungkuḷmai.

¹³TUHAN, Ikobí in inandoḷan in Israel, umat-Mu; Bayongan inta nonaḷámai kon ini-Mu in mooyábí. Mosia in moinggamábí nongkon dunia naa bo mayá in dunia in intau minatoi. Sin, Iko in bokaká in tubig kobiagan in sinaḷáandon monia, o TUHAN.

¹⁴TUHAN, undamaidon in akuoi, dá mopiadon in akuoi. Posaḷamatdon in akuoi, dá mosaḷamat in akuoi. Tongábí Iko in poḷantudonku!

¹⁵Intau in moguman kon inakó, “Kon onda in bayongan in gogondok i TUHAN tua? Biódon mako aidan in tanaa mako!”

¹⁶Táe, o TUHAN, diábí kon dodai in onda in akuoi nondodak sinbá Iko mopoantug in bodito kon i monia. Akuoi in diábí doman nopoigum sinbá onagon in bodito in mosia. Kinotaauan-Mu intua, TUHAN. Kinotaauan-Mu onu in siningogku.

¹⁷Dika mobaḻí in Iko inta mokoondok kon ginaku. Iko in nobaḻí pogogadopanku aka moiangoi in roriga.

¹⁸Igumon mako intau inta nogaḷow bo nondorot kon inakó, pokopooyáan-Mumai bo poangoian-Mu in ondok. Táe dikabí intua poaid kon inakó, o TUHAN. Poangoidon in bodito kon i monia modapot in mosia morimumud moputú.

¹⁹Ki TUHAN in noguman kon inakó, “Yeremia, bayádon kon Bonawang Rayat inta sinaḻiban in datu mita in Yohuda aka mosia tumuot ḷumuai in kotá. Bayádon doman kon bayongan in bonawang ibanea in Yerusalem.

²⁰Poyaputdon in koyow-Ku kon datu mita bo bayongan in intau in Yohuda takin bayongan in intau in Yerusalem inta moitaḻib kon bonawang mita tatua.

²¹Pogumandon nanaa: ‘Aka moiko doí matoi, dikadon mogakut kon pakakat kon singgai in Sabat, andeka modia tumuot mongin bonawang mita in Yerusalem.

²²Dika mogaid andeka modia kon pakakat onuka in ḷumuai kon baḷoimu kon singgai in Sabat. Potondídon in singgai tatua kon i-Nakó ná inta ain pinarenta-Ku kon mogoguyangmu.

²³Táe mogoguyangmu in doí mokidongog andeka nonaridi kon onu in pinoguman-Ku. Mosia in pamandot bo doí tumoindudui andeka toboḷowon.

²⁴Duduiai in bayongan parenta-Ku. Dika mogakut kon pakakat onuka mongin bonawang in kotá tanaa kon singgai in Sabat. Potondídon, Singgai in Sabat kon i-Nakó, bo dikadon mogaid kon onuka kon singgai tatua.

²⁵Aka moiko totu-totuu mopobayá in parenta-Ku mita tatua, dá datu mita bo pojabat mita inta nomarenta ná ki Daud in tumuotbí kon bonawang mita in kotá in Yerusalem. Mosia moyotakin in intau in Yohuda bo intau in Yerusalem, in tumakoibí kon roda inugut in kabaḷo, dá kotá in Yerusalem moramedon totok.

²⁶Intau mita in mamangoibí nongkon kotá mita in Yohuda, bo nongkon ḻipú mita kon diugmai in Yerusalem; mosia in mamangoibí nongkon butá in Benyamin, nongkon butá kon sioḷanmai in tombuḷudnea, nongkon buḷud, bo nongkon Yohuda kon dotá in toḷatan. Mosia in modiabí mangoi kon biag mita pokuruban kon Baḷoi-Ku, pinomayá inta tubáan andeka diá, bo sosumba doman gandum bo kamania takin sosumba sukur.

²⁷Bayongan intua in mobaḻíbí aka moiko motoḷutui kon i-Nakó bo mopotondí in Singgai in Sabat kon i-Nakó. Dika mogakut kon pakakat onuka bo tumaḻib kon bonawang mita in Yerusalem kon singgai tatua. Aka moiko ḻimimpat kon parenta-Ku mita tatua, bonawang mita in Yerusalem bo komaḻignea mita in daiton-Ku turubon tuḷú tatua in diábí kopiongan.’ ”