Read Mongondow YEREMIA 20 Bible Online

YEREMIA 20 - Mongondow bible

YEREMIA 20

¹Ki Imang Pasyhur ki adí i Imer in tongguḷu in moḷoḷukad kon Baḷoi TUHAN. Naonda in dinongognea in akuoi nopotaau in bayongan tua,

²pinarentanea sinbá bongkugon in akuoi bo umantungan kon Bonawang in Benyamin, bonawang kon dotá in ḻimonik kon Baḷoi TUHAN.

³Doḷo-doḷom nobangon monik naonda in ki Pasyhur nomuḻi kon inakó nongkon pinoumantungan, akuoi i noguman kon inia, “Tangoi inta bain ogoi i TUHAN kon inimu in deeman bidon ki Pasyhur, táe ‘Sindoyó kon bayongan in tampat’.

⁴Ki TUHAN tontaní in noguman, ‘Iko in baḻíon-Ku sindoyó kon inimu tontaní bo kon i yobayatmu mita. Iko in mokoontongbí kon i monia in ḻimodon in musung monia. Bayongan in intau in Yohuda in pomayá-Kubí mako in kawasaan in datu in Babel; tongosilai kon i monia in akuton nobaḻí intau dinakop pobayá in Babel, bo ki agatnea in ḻimodon.

⁵Musung monia in pomayá-Ku doman mako in mogamá bo mogakut pobayá in Babel in bayongan kaoyúonan in kotá tanaa, bo bayongan in kapunyaannea, nodapotbí in pakakat mita pusaka in datu mita in Yohuda.

⁶Bo iko, Pasyhur, takin bayongan in motoḷuadímu in domokon doman bo akuton pobayá in Babel. Kon tua matoi in iko bo ḷobongon; natua doman in bayongan in yobayatmu inta ain nokidongog kon uboḷmu mita.’ ”

⁷TUHAN, Iko in nodondouḷug kon inakó bo akuoi in kinodondouḷugandon. Iko in moropo-ropot in akuoi bo nopokuyungdon kon inakó. Akuoi in irupa-rupamai in bayongan intau, siningkuḻe nongkon doḷo-doḷom dapot in ḷoḷabungnea.

⁸Pomuḷoi in akuoi mosingog, musti in akuoi momaḷú rumopot totok, “Ḷoḻinga! Bodito!” TUHAN, akuoi in irebeg bo siningkuḻe pomuḷoi mako, popisí in nopotaau in koyow-Mu.

⁹Táe aka kon bonu in ginaku akuoi in moguman, “Biódon mako ki TUHAN in ḻiongonkudon, doídon in akuoi mosingog podoyon kon tangoi-Nea,” dá koyowmu in naonda bo tuḷú inta moborambang kon bonu in dodobku. Aindon sinungkuḷanku pinondam, táe diá mokoigon in akuoi.

¹⁰Kodongogan in intau moyogombong kon bayongan in tampat, “Ondok in mongawasa! Igai pongaduon in sia kon i inta nongawasa!” Nodapotbí in bayongan in topotakinku modagin mogoḷat mako kon koḷabúanku. Guman monia, “Degá pongin dondouḷug, kotaḷowan in sia, sinbá motaaudon in kita motuḻí kon yaat in gina kon inia.”

¹¹Táe Iko, o TUHAN, in kon dotáku; Iko in totok in moropot bo motorindog. Mosia inta mogaḷow bo mondorot kon inakó in moḷabúbí bo kodaitan in daya. Mosia in mooyábí modapot in mononoi, diádon in notuoi in bayongan tomayá monia. Koempengan monia tua in umuranbí toropon.

¹²Táe, o TUHAN Inta Totok in mokawasa, takin aid moadil sinungkuḷan-Mu in intau; Kinotaauan-Mu in gina bo raian monia. Tuamai in ogoipa in akuoi moindoi kon ini-Mu motuḻí kon aid moraat in musung sin pelekaraku tanaa in poposarakankubí kon ini-Mu.

¹³Podondongdon kon i TUHAN bo dayowdon in Sia sin Sia in mopoḷuat kon intau inta dinorot in intau moraat.

¹⁴Kinutukdon in singgai kinoḷontaganku! Biódon mako noempeng kon dodai in akuoi pinononggadí i ináku.

¹⁵Kinutukdon doman in intau inta nodia kon habar inta nokoḷunganga totok kon i amáku, kon dodai in pinotaau kon inia, “Iko in nokouḻí kon adí ḷoḷaki!”

¹⁶Biódon mako ki inta nodia kon habar tatua in naonda bo kotá mita inta irimumud i TUHAN takin diá in tabi. Biódon mako in sia mokodongog kon karak monakit kon dodai in doḷo-doḷom, bo kokow in parang kon dodai in noutu in singgai.

¹⁷Sin sia in diá noḻimod kon inakó kon tungkuḷ in akuoi kon bonupa in sian, sinbá akuoi in umuranpa kon bonu in sian i ináku bo bobuḷadíannea in mobaḻí poḷoḷobongan kon inakó.

¹⁸Nongonu sin akuoi in mustibí pononggadí? Degá tongábí bá mororiga bo mosusa? Bo degá bá kobiaganku in moitaḻib kon bonu in oyá?