Read Mongondow YEREMIA 21 Bible Online

YEREMIA 21 - Mongondow bible

YEREMIA 21

¹Ki Zedekia datu in Yohuda nopotabá kon i Imang Pasyhur ki adí i Malkia, bo kon i Imang Zepanya ki adí i Maaseya. Sia in nopotabá kon i monia nopotaau kon inakó in oigum tanaa,

²“Poigumdon kon topotundú kon i TUHAN sin kopontingan naton, sin ki Nebukadnezar datu in Babel takin tontaranea in koyogotdon mongopung kon kotá naton. Dika-dika bo ki TUHAN in mogaidbí kon inta mokoherang kon inaton, bo momakisa kon i Nebukadnezar mopotabá umundok in tontaranea.”

³Bo ki TUHAN in nosingog kon inakó, dá pinotabáku in intau mita inta pinotabá namangoi tua

⁴nopotaau kon i Zedekia kon ki TUHAN, Allah in Israel, noguman nanaa, “Zedekia, Akuoi in monaḷowbí kon tontaramu inta tanaa koyogot in noparang nonayow kon i datu in Babel takin tontaranea. Pakakat mita in parang in tontaramu in sipunon-Ku kon yua-yuak in kotá.

⁵Akuoi tontaní in rumopot monayow kon i monimu bo takin doman torú inta tumaga-tagab.

⁶Intau mita in kotá tanaa in ḻimodon-Ku; pinomayá intau andeka mahaḷuk in matoibí popisí in yampoi in takit inta motoyang.

⁷Iko bo pogawaimu mita takin intau mita inta noisimparut kon parang, gogoy bo yampoi in takit, komintan pomayá-Ku mako in domokon i Datu Nebukadnezar bo in musung mita inta moibog moḻimod kon inimu. Ki Nebukadnezar in moḻimodbí kon i monimu komintan takin diá in ampung bo diá in tabi. Akuoi, ki TUHAN, ain nosingog.”

⁸Bo ki TUHAN in nopotabá kon inakó noguman nanaa kon umat-Nea, “Indongogai! Akuoi, ki TUHAN, in mokipiḻí kon inimu: daḷan inta mopobayá in kobiagan, andeka daḷan inta mopobayá in kopatoian.

⁹Bayongan in intau inta mogutun kon bonu in kotá in matoibí popisí in parang, gogoy, andeka yampoi in takit. Táe mosia inta ḷumuai sin tumungkud kon intau in Babel inta koyogot in nonubu kon kotá tanaa, in kotaḻibanbí bo diá ḻimodon.

¹⁰Akuoi in nonantúdon kon morimumud kon kotá tanaa, bo diábí motabi kon inia. Kotá tanaa in ogoibí kon i datu in Babel; turubonneabí modapot in mopayong komintan. Akuoi, ki TUHAN, ain nosingog.”

¹¹Ki TUHAN in nopotabá kon inakó nopotaau in koyow tanaa kon motoḷuadí in datu in Yohuda, buí i Daud: “Indongogai onu inta poguman-Ku, Akuoi, ki TUHAN. Poḷongasidon sinbá inta moadil in pobayá pomuḷoi in singgai. Poḷuatdon in intau inta umuran pogamáan in intau inta nongawasa kon inia. Aka diá, yo aid moraat inta inaidanmu mokotagab kon torú-Ku naonda bo tuḷú inta diá kopiongan.”

¹³Onda intua ki TUHAN in noguman kon Yerusalem, “Ei Yerusalem! Kinoukatanmu in moḷantu-ḷantud in ḷopá mita kon diugmumai. Iko in naonda bo buḷud batu irib kon rawang inta notondodai, táe Akuoi in moḷawangbí kon inimu. Iko in moguman kon diábí tobatúmai in intau in mokotubu kon inimu andeka mokodangat kon dindingmu mita,

¹⁴táe Akuoi in mohukumbí kon inimu popisí in oaidmu. Komaḻigmu in turubonkubí, bo bayongan in yagi-yagi kon diugnea in mopokakbí doman. Akuoi, ki TUHAN, ain nosingog.”