Read Mongondow YEREMIA 23 Bible Online

YEREMIA 23 - Mongondow bible

YEREMIA 23

¹Ki TUHAN Allah in Israel noguman, “Moboditodon in moiko ei itoi mita inta nomutú bo noporarit in umat-Ku! Moiko in sabanarnea in mustibí momiag kon umat-Ku, táe diábí inaidan monimu intua; pinomayábí mako monimu in noirarit bo noḷagui. Tanaa Akuoi in mohukum kon i monimu popisí in aidmu moraat.

³Táe ki agat in umat-Ku in sipunon-Kubí nongkon butá mita inta pinoḷumbúan kon i monia. Mosia in diaan-Kubí buí kon butá monia bo bui monia in modugangdon mobarong.

⁴Akuoi in moduíbí kon itoi sin momiag kon i monia. Umat-Ku in diá bidon moondok andeka mourot, diábí tobatúmai in nongkon i monia in mobuḻi. Akuoi, ki TUHAN, ain nosingog.”

⁵Ki TUHAN in noguman, “Moiangoibí in wakutunea, Akuoi in moduí kon datu tobatú inta moadil nongkon buí i Daud. Datu tatua in momarenta takin bijaksana, bo mogaid kon onu inta moadil bo inta totuu kon sinangkub in butá.

⁶Aka momarenta in sia, intau in Yohuda in mosaḷamatbí, bo intau in Israel in mobiagbí moaman. Datu tatua in tangoionbí ‘TUHAN kasaḷamatan naton’.

⁷Moiangoibí in wakutunea, intau in diá bidon mongibot podoyon kon i-Nakó, Allah inta nobiag, inta nodia kon umat in Israel iḻumuai nongkon Mesir,

⁸táe podoyon kon i-Nakó, Allah inta nobiag, inta nodia kon umat in Israel iḻumuai nongkon butá tobatú kon dotá in utuan, bo nongkon bayongan in butá ibanea kon tampat inta ain pinoporaritan-Ku. Mosia in mogutundon kon butánea tontaní.”

⁹Naa in koyowku soaḷ nabi mita: Ginaku morumbun bo mourot in akuoi. Ki TUHAN bo tosingogon-Nea inta motusi nopobaḻí kon inakó naonda bo intau noḷoḷangu inta noiḻiu in bayong in anggur ininum.

¹⁰Butá naton nopuḻing in intau inta diá mosatia kon i TUHAN. Mosia in nobiag moraat bo noitaḷá in nopomaké in kawasa monia. Popisí in kutukan i TUHAN, bonok kon rawang noingkag bo sinangkub in butá nonogumatoi.

¹¹Ki TUHAN in noguman, “Nabi bo imang doí tumoḷutui kon i-Nakó. Nodapot in kon Baḷoi-Ku kinouḻían-Kudon in mosia nogaid kon inta moraat.

¹²Tuamai, daḷan monia in morondogbí bo mosindip, dá moipintud in mosia bo moḷabú. Akuoi in mopoangoibí in bodito kon i monia, aka moiangoidon in wakutunea mohukum kon i monia. Akuoi, ki TUHAN, ain nosingog.

¹³Dosa in nabi mita in Samaria ain inontong-Ku. Mosia in nosingog podoyon kon tangoi i Baal, bo mopoḷaḻe kon Israel, umat-Ku.

¹⁴Táe kon Yerusalem inontong-Kudon in nabi mita nogaid kon inta noiḻiu doman in raat. Nonguboḷ bo nonuaḻing in mosia, bo noduḷu kon intau inta nogaid kon inta moraat, dá diá tobatúmai in intau in moibog mogogai in mogaid kon moraat. Aka kon i-Nakó yo mosia tua in komintandon moraat naonda bo intau in Sodom bo Gomora.”

¹⁵Ki TUHAN Inta Totok in mokawasa in noguman, “Ogoi-Kubí kon nabi mita kon Yerusalem tatua in pinomuḷa mopait sin kaanon bo rasum sin inumon, sin mosia in nokopopisídon kon intau mita kon sinangkub in butá doí mohoromat kon i-Nakó.”

¹⁶Kon intau inta nogutun kon Yerusalem, ki TUHAN Inta Totok in mokawasa noguman, “Dika indongogan in tosingogon in nabi mita inta umuran tongá mobogoi in kamang inta diá in mangaḻenea. Mosia in tongábí mopotaau in onu in inta kon raian monia tontaní bo deemanbí koyow-Ku.

¹⁷Kon intau mita inta doí mokidongog kon tosingogon-Ku mita, mosia in umuranbí moguman, ‘Moiko in mosaḷamatbí.’ Bo kon bayongan in intau inta pamandot, mosia in moguman, ‘Iko in diábí mokouḻí kon bodito.’ ”

¹⁸Akuoi in noguman, “Diábí tobatúmai in nongkon nabi mita tatua in nonotaau kon onu in kon bonu in gina i TUHAN. Diábí in nongkon i monia in nokoimontandon nokodongog bo nomangaḻe kon tomayá-Nea mita; diábí doman in nonaridi andeka nokidongog kon tosingogon-Nea mita.

¹⁹Torú i TUHAN in nádon deḷang inta nondangat bo nonubu kon intau mita inta moraat.

²⁰Torú-Nea in diábí mooyong aka diápa mobaḻí in inta sinomayá-Nea motuoi. Kon singgai moiduduimai umat i TUHAN in momangaḻebí totok kon tua.”

²¹Ki TUHAN in noguman, “Totokbí in mogaid in nabi mita tatua, bokaka mosia in diábí pinotabá-Ku. Podoyon kon tangoi-Ku in mosia mopotaau in habar, bokaka diábí in koyow in inogoi-Ku kon i monia.

²²Aka kuma kinotaauan monia onu in kon bonu in raian-Ku, yo notantú bidon kon mosia in nopotaaudon kon umat-Ku in bayongan inta ain siningog-Ku. Dá umat-Ku in mogogaidon in mogaid kon dosa mita bo dodia monia inta moraat.

²³Akuoi in Allah inta oyúon kon bayongan tampat, deemanbí tongá kon tampat tobatú.

²⁴Diábí tobatúmai in mokopogadop kon i-Nakó, sin Akuoi in oyúonbí kon bayongan tampat: kon soroga bo kon dunia.

²⁵Bayongan inta siningog in nabi mita tatua in kinotaauan-Ku bidon. Pinodoyon kon tangoi-Ku mosia in nonguboḷ kon koyow-Ku in sinarimadon monia pinongin togoindop.

²⁶Modapot in toonupa in nabi mita tatua moibog mopoḷaḻe kon umat-Ku takin habar inta inai-aidan monia tontaní?

²⁷Kai monia kamai dá pinongin togoindop mita inta inouman monia tua, umat-Ku in mokoḻiongbí kon i-Nakó ná mogoguyang monia nokoḻiong kon i-Nakó bo nosumba kon Baal.

²⁸Nabi inta sinumogoindop mustibí moguman, ‘Naa in tongábí togoindop.’ Táe nabi inta nokouḻí kon koyow nongkon i-Nakó mustibí mopotaau in koyow tatua podudui in koyow inta mobanar tua. Gandum in diábí motaau potongkaion in wawa.

²⁹Tosingogon-Ku in naonda bo tuḷú, bo ná bobibil inta norimumud kon batu!

³⁰Akuoi in moḷawangbí kon nabi mita inta nopotaau in koyow nongkon yobayatnea, bo noguman kon tua in koyow nongkon i-Nakó.

³¹Akuoi in moḷawangbí doman kon nabi mita inta nopotaau in tosingogonnea mita tontaní, bo noguman kon tua in nongkon i-Nakó.

³²Akuoi, ki TUHAN, in moḷawangbí kon nabi mita tatua inta nopotaau in togoindopnea mita inta nopuḻing in uboḷ. Mosia in nopoḷangkam in umat-Ku pinodoyon kon uboḷ bo ambungangaḷ monia. Akuoi in diábí nopotabá kon nabi mita tatua. Mosia in beresibí diá baraguna kon umat-Ku. Akuoi, TUHAN, ain nosingog.”

³³Ki TUHAN in noguman, “Yeremia, aka tobatú nongkon umat-Ku, andeka nabi tobatú andeka imang moḻibó kon inimu, ‘Onu in koyow i TUHAN?’ Iko in musti motubag, ‘Iko in nobaḻí bobabaan[12] i TUHAN; tuamai iko in ḷumbúon-Nea.’

³⁴Aka tobatú nongkon umat-Ku andeka nabi andeka imang umuranpa doman mosingog kon soaḷ ‘bobabaan i TUHAN’, dá sia bo motoḷuadínea in hukumon-Kubí.

³⁵Noyotoḻikud kon tua, batúan in intau mustibí moḻibó kon yobayatnea bo kon motoḷuadínea, ‘Onu in tubag nongkon i TUHAN?’ andeka ‘Onu in pinoguman i TUHAN?’

³⁶Mosia in diá bidon motaau momaké in istila ‘bobabaan i TUHAN.’ Aka oyúonpa in momaké in istila tatua, yo baḻíon-Ku in koyow-Ku totu-totuu mobaḻí bobabaannea. Intau inta noguman ‘bobabaan i TUHAN’ tongábí monuui kon tosingogon-Ku, Allah monia, Allah inta nobiag, TUHAN Inta Totok in mokawasa.

³⁷Mosia in tongábí motaau moguman kon nabi mita, ‘Onu in tubag i TUHAN kon inimu? Onu in pinoguman i TUHAN?’

³⁸Aka oyúon in diá motoindudui kon parenta-Ku tatua, bo umuranpa doman momaké in istila ‘bobabaan i TUHAN’,

³⁹dá Akuoi in mopuyut[13] kon i monia, bo mopogambat kon i monia koyayúon, pinomayá mosia andeka kotá inta ain inogoi-Ku kon i monia bo mogoguyang monia.

⁴⁰Akuoi in mopomiabí kon i monia mooyá bo mokooyá modapot in mononoi bo ukur monia tua in diábí koḻiongan in intau.”