Read Mongondow YEREMIA 27 Bible Online

YEREMIA 27 - Mongondow bible

YEREMIA 27

¹Diá noonggot naonda in ki Zedekia[16] ki adí ḷoḷaki i Yosia nobaḻí datu in Yohuda, ki TUHAN in nopotabá kon inakó

²nomitoi kon tontogot nongkon kuḻit bo tombuḻigan nongkon kayu, bo pinopopotaannea kon sindunku.

³Sia in nopotabá doman kon inakó nopotaau in koyow-Nea kon i datu mita in Edom, Moab, Amon, Tirus bo Sidon, takin pinotonsigad kon totabá mita monia inta ain namangoi in Yerusalem sin mokipodungkuḷ kon i Datu Zedekia.

⁴Akuoi in mustibí mopotaau kon i monia kon ki TUHAN Inta Totok in mokawasa, Allah in Israel, in noguman,

⁵“Pinongin kawasa-Ku inta moḷoben bo pinongin ropot-Ku binaḻí-Ku in dunia bo intau takin bayongan in mahaḷuk, bo tua in motaau-Kubí ogoi kon i ineka in koibog-Ku pobogoian.

⁶Akuoibí inta ain nobogoi kon bayongan in bangusa tanaa kon bonu in kawasa in mogogundoi-ku, ki Nebukadnezar datu in Babel. Nodapot in mahaḷuk yo inogoi-Ku doman kon inia sin kawasaan.

⁷Bayongan in bangusa in mobaḻíbí atanea, kon i adínea ḷoḷaki, bo kon i ompunea modapot in moiangoi in wakutunea negaranea tontaní moḷabú. Kon dodai intua bangusa in Babel in mobaḻí ata in bangusa mita inta moropot bo kon datu mita inta moḷoben.

⁸Bangusa andeka dodatuan inta doí mokiompu kon i Nebukadnezar in hukumon-Ku pongin parang, gogoy, bo yampoi in takit, modapot in kon imbuitnea bangusa tatua in mokiompubí doman.

⁹Dikadon mokidongog kon nabi mita andeka ki ineka doman inta mongampag kon i monimu mokiompu kon i datu in Babel, umpaka in mosia ain nongaku kon notarimadon kon topotundú nongkon togoindop, dimukud mita, andeka nopomaké in totaau mita.

¹⁰Mosia in monompobaḻik kon i monimu dá moiko in dinia noyayú nongkon butámu. Akuoi in mopoguntunbí kon i monimu nongkon butámu bo moputú in moiko.

¹¹Táe bangusa inta moibog mokiompu bo moibog mobaḻí ata i datu in Babel in pomayá-Kudon mako in mogutun kon butánea tontaní, bo monompinomuḷa kon tua, Akuoi, ki TUHAN ain nosingog.”

¹²Kon i Zedekia datu in Yohuda, akuoi, ki Yeremia, nopotaau in natua doman. Akuoi in moguman, “Tungkudon kon i datu in Babel. Kotoḷutui kon inia bo kon bangusanea, sinbá mosaḷamat in ki Tuang Datu.

¹³Ki TUHAN in nogumandon kon bangusa inta diá mokiompu kon i datu in Babel in matoibí in parang, in gogoy, andeka in yampoi in takit. Nongonu sin ki Tuang Datu bo rayat in moibogbí matoi ná tatua?

¹⁴Dika indongogan in nabi mita inta mongampag kon i Tuang Datu mokiompu kon i datu in Babel, sin mosia tua in monompobaḻikbí kon i Tuang Datu.

¹⁵Mosia in gumuman kon mosia in mosingog podoyon kon tangoi i TUHAN, táe mosia in monguboḷ. Ki TUHAN tontaní in noguman kon Sia in diábí nopotabá kon i monia. Tuamai in potabudon bo yopúon-Neabí in ki Tuang Datu takin nabi mita inta ain nonguboḷ kon i Tuang Datu.”

¹⁶Onda intua akuoi in nopotaau kon imang mita bo kon bayongan in rayat kon ki TUHAN in noguman nanaa, “Dika mokidongog kon nabi mita inta noguman kon diádon moonggot bo pakakat mita kon Baḷoi-Ku in diaandon bui nongkon Babel. Uboḷ monia.

¹⁷Dika indongogan in mosia! Tungkudon kon i datu in Babel, sinbá mosaḷamat in moiko. Onubí in mangaḻenea aka kotá tanaa in musti morimumud?

¹⁸Aka mosia bo totuu kon nabi, bo ain notarima kon koyow nongkon i-Nakó, yo notantú bidon kon tanaa in mosia in moigumbí kon i-Nakó, TUHAN Inta Totok in mokawasa, sinbá pakakat mita inta oyúonpa kon Baḷoi-Ku bo kon komaḻig in datu kon Yerusalem in diádon akuton pobayá in Babel.

¹⁹Sin Akuoi, TUHAN Inta Totok in mokawasa, Allah in Israel, ain nonantú kon bayongan in pakakat tatua in akutondon pobayá in Babel, bo umuranpabí kon tua modapot in Akuoi bui moindoi kon tua. Kon dodai intuata bo baintua diaan-Ku bui kon tampat tanaa. Akuoi, ki TUHAN, ain nosingog.” Pakakat mita inta kon Baḷoipa i TUHAN tua in: oigi mita, kuyon bitú, kereta mita, bo tongonumai in pakakat ibanea in Baḷoi TUHAN. Pakakat mita tatua in diábí pinoyotakin dinia pinobayá in Babel, kon tungkuḷ in ki Yoyakhin ki adí ḷoḷaki i Yoyakin datu in Yohuda takin guhanga mita in ḻipú in Yohuda bo Yerusalem inakut pinobayá in Babel i Datu Nebukadnezar.