Read Mongondow YEREMIA 28 Bible Online

YEREMIA 28 - Mongondow bible

YEREMIA 28

¹Kon taong doman tatua[17] kon buḷan iḻimanea taong inggopatnea kon pinomarentaan i Datu Zedekia, ki Hananya ki adí i Azur, nabi tobatú nongkon kotá in Gibeon, nosingog kon inakó kon Baḷoi TUHAN. Kon tayowon in imang mita bo rayat sia in noguman kon inakó

²kon ki TUHAN Inta Totok in mokawasa, Allah in Israel, noguman nanaa, “Ropot in datu in Babel ain pinutoḷan-Ku.

³Kon bonu in doyowa notaong tanaa Akuoi in mopobuibí in pakakat mita nongkon Baḷoi-Ku, inta ain inakut pinobayá in Babel i Datu Nebukadnezar.

⁴Akuoi in modia doman bui kon i Yoyakhin ki adí ḷoḷaki i Yoyakin datu in Yohuda, takin bayongan in rayat in Yohuda inta ain inakut pinobayá in Babel. Totuu, Akuoi in momutoḷbí kon ropot in Babel. Akuoi, ki TUHAN ain nosingog.”

⁵Dá kon tayowon in imang mita bo bayongan in rayat inta sinimindog kon Baḷoi TUHAN tatua, akuoi in noguman kon i nabi Hananya,

⁶“Mopia! Igumon mako toḻindapmu tua in moniata, bo ki TUHAN in totu-totuu modiadon bui mangoi nongkon Babel in pakakat mita in Baḷoi TUHAN takin bayongan intau inta ain iḷumbú kon tua.

⁷Táe iko, Hananya bo moiko komintan, ei rayat, indongogaidon in naa:

⁸Nabi mita inta noiuna kon inaton ain nonoḻindap kon poparangan, bodito, bo yampoi in takit in moiantug kon mobayong in bangusa bo dodatuan inta mongoropot.

⁹Táe nabi inta nonoḷanow kon kaadaan modame, in tongábí motaau akúon saḷaku nabi inta totu-totuu pinotabá i TUHAN, aka toḷanownea mita moniata.”

¹⁰Bo ki Hananya noḷuat kon tombuḻigan nongkon sindunku bo pinutoḷnea.

¹¹Kon tayowon in bayongan in rayat inta kon tua, sia in noguman, “Ki TUHAN in noguman kon nanaa in pomomutoḷ-Nea kon tombuḻigan inta pinopopotaan i Datu Nebukadnezar kon sindun in bayongan bangusa; Ki TUHAN in nogaidbí kon bayongan intua kon bonu in doyowa notaong naa.” Onda intua akuoi in minayádon.

¹²Diá noonggot kon tua, ki TUHAN in nopotabá kon inakó

¹³minayá kon i Hananya sin moguman nanaa, “Ki TUHAN in noguman kon iko in mokoputoḷbí kon tombuḻigan kayu, táe Sia in momaḷuibí in tombuḻigan uatoi.

¹⁴Ki TUHAN Inta Totok in mokawasa, Allah in Israel, in noguman kon Sia in mopopakébí in tombuḻigan uatoi kon sindun in bayongan bangusa tanaa, bo mosia in mobaḻíbí ata kon i Nebukadnezar, datu in Babel. Ki TUHAN in noguman doman kon mahaḷukpa moraat in ogoi-Neabí doman kon bonu in kawasa i Nebukadnezar.”

¹⁵Tua komintan in pinotaauku kon i Hananya, bo akuoi in noguman doman bui, “Indongogai, ei Hananya! Ki TUHAN in diábí nopotabá kon inimu; iko in nomaḻídon kon bangusa tanaa nopirisaya kon tosingogon uboḷ.

¹⁶Tuamai in ki TUHAN tontaní in noguman kon iko in yopúon-Neabí nongkon dunia naa. Taong tanaa doman matoi in iko, sin iko in nopotabádon kon bangusa tanaa noḷawang kon i TUHAN.”

¹⁷Dá kon taong doman tatua kon buḷan impitunea, ki Hananya minatoi.