Read Mongondow YEREMIA 30 Bible Online

YEREMIA 30 - Mongondow bible

YEREMIA 30

¹Ki TUHAN, Allah Israel,

²noguman kon inakó, “Paisdon kon bonu in buk tobatú in bayongan inta ain pinoguman-Ku kon inimu.

³Sin moiangoibí in wakutunea Akuoi mopoguḻit bui in kaadaan in umat-Ku Israel bo Yohuda. Diaan-Kubí bui in mosia mayá in butá inta ain inogoi-Ku kon mogoguyang monia. Butá tatua in buibí mouḻí monia. Akuoi, ki TUHAN, ain nosingog.”

⁴Ki TUHAN in noguman kon umat in Israel bo Yohuda,

⁵“Akuoi in nokodongogdon karak in intau inta nourot, karak in intau moondok inta diá in dodamean.

⁶Tungkuḷaika rai bo taridi! Degá ḷoḷaki mopononggadí in adí? Aka natua, nongonu sin inontong-Ku in bayongan in ḷoḷaki nongo bilaibí bo motonoi kon siannea naonda bo bobay inta mononggadídon?

⁷Singgai motoyang ain noiangoi, singgai inta diá in poḷawangan. Kon i umat-Ku, tua in singgai inta mokoondok; táe mosia in posaḷamaton-Kubí.”

⁸Ki TUHAN Inta Totok in mokawasa in nosingog bui kon umat-Nea, “Aka moiangoi in singgai tatua, tombuḻigan inta pinopopotaan kon sindunmu in putoḷon-Kubí bo inta pinoumantungan kon inimu in bukáan-Kudon. Moiko in diá bidon mobaḻí ata in intau ango-angoi.

⁹Moiko in mogundoi bidon kon i-Nakó, TUHAN Allahmu, bo kon intau tobatú buí i Daud inta duíon-Ku mobaḻí datu.

¹⁰Umat-Ku Israel, dikadon moondok! Mogogundoi-Ku Yakub, dika mourot! Moiko bo buímu in posaḷamaton-Kubí nongkon butá moyayú, tampat pinodakopan kon i monimu. Moiko in mobuibí bo mogutun kon butámu takin moaman. Moiko in mobiagbí motomoman; diá bidon in koondok monimu.

¹¹Akuoi in mamangoibí bo moiko in posaḷamaton-Kubí. Bangusa mita, inta pinoporaritan-Ku kon i monimu komintanbí yopúon-Ku, táe moiko in diábí pomiaan-Ku natua. Memang moiko in diábí moiḷagui kon hukuman táe hukuman-Ku kon i monimu in moadilbí podudui in inta ain sinantú. Akuoi, ki TUHAN ain nosingog.”

¹²Ki TUHAN in noguman kon umat-Nea: “Takitmu in nobogatdon totok paḻímu in diá bidon in undamnea.

¹³Diá bidon tobatúmai in intau in moḷongasi mongudam kon inimu, diábí in undam in bituḷmu mita, diádon in kamangmu kon mopiapa.

¹⁴Bayongan in intau inta kinoibogmu nokoḻiongdon kon inimu; mosia in doí bidon morai kon inimu. Naonda bo musung Akuoi ain nonubu bo nohukum kon i monimu kinoḻingá, popisí in nobayongdon in dosamu bo moḷoben in taḷámu.

¹⁵Dikadon mogamui soaḷ kekebmu mita, sin kon inimu diádon in kamang mopia. Moiko in hukumon-Ku natua popisí in nobayong in dosamu bo moḷoben in taḷámu.

¹⁶Táe tanaa bayongan inta noḻiom kon inimu in ḻiomonbí, bo bayongan in musungmu akutonbí kon poḷumbúan. Akuoi in mondorotbí kon inta nondorot kon inimu, Akuoi in mogagowbí kon inta nogagow kon inimu.

¹⁷Umpakabí musungmu in moguman, ‘Sion in iḷumbúdon, bo diá in noindoimai,’ tongá moiko in posehaton-Kubí bui, bo kekebmu mita in undaman-Kubí.”

¹⁸Ki TUHAN in noguman doman bui: “Moiko, umat-Ku in totabion-Kubí bo poguḻiton-Ku bui in kaadaanmu kon butámu tontaní Yerusalem in posindogonbí bui, bo komaḻignea in tompiaan.

¹⁹Intau inta nogutun kon tua in modayowbí kon i-Nakó pongin dondong, bo monggoḷokap takin ḷunganga in gina. Baḻíon-Ku in mosia horomaton bo diádon singkuḻeon, bo kobayong monia in tantúdon modugang.

²⁰Bangusamu in baḻíon-Kudon ponango-nangoian ná dungkuḷmai, bo simindog bui saḷaku umat-Ku. Bayongan inta nondorot kon inia in hukumon-Kubí doman.

²¹Datu inta nomarenta kon i monimu in nongkon bangusamu takin diá in ḷamboinea dimiug in sia kon i-Nakó aka oiníon-Ku in sia mamangoi in tayowon-Ku. Sin ki ine in mokobaḻí tumayow kon i-Nakó podudui in ibognea tontaní? Moiko in mobaḻíbí umat-Ku bo Akuoi in mobaḻí Allahmu. Akuoi, TUHAN inta noguman kon tua.”

²³Torú i TUHAN nádon deḷang, nádon tompot moropot inta nondangat kon intau mita moraat, bo diádon mooyong kon dodai in diápa mobaḻí in bayongan tomayá-Nea. Kon singgai moiduduimai umat-Nea in monotaaudon kon tua.