Read Mongondow YEREMIA 31 Bible Online

YEREMIA 31 - Mongondow bible

YEREMIA 31

¹Ki TUHAN in noguman, “Moiangoibí in wakutunea Akuoi mobaḻí Allah in bayongan suku in Israel, bo mosia in mobaḻí umat-Ku.

²Kon padang gurun Akuoi ain noponiata in tabi-Ku kon i monia inta ain noiḷagui kon popatoi. Kon dodai in umat in Israel notayak kon koodoman,

³nongkon noyayú Akuoi nokipogontong kon i monia. Ei umat Israel, nongkon koḻipodpabímai Akuoi umuran monotabi kon i monimu, bo umuranbí doman in Akuoi moponiata kon Akuoi in umuranbí motabi kon i monimu.

⁴Bangusamu in baḻíon-Kubí ponango-nangoian ná dungkuḷmai. Komintanpa doman moiko in mogamábí kon rebana bo motayok takin ḷunganga in gina.

⁵Moiko in mobukabí kon gobá in anggur kon buḷud in Samaria, bo ki inta nomuḷa in mosipúbí doman kon bungainea.

⁶Totuu, moiangoibí in wakutunea in moḷoḷukad mita kon kotá in momaḷú kon buḷud in Epraim, ‘Koḻigai in kita motakod kon Sion, kon i TUHAN Allah naton.’ ”

⁷Ki TUHAN in noguman, “Podondongdon takin ḷunganga in gina kon i Israel, umat-Ku — bangusa inta pinoḷontú nongkon bayongan in bangusa. Podondongdon in dondong dodayow, bo potaaudon ‘Ki TUHAN ain noposaḷamat kon i inta ki agat in umat-Nea.’

⁸Nongkon utuan dinia-Ku in mosia nobui; sinipun-Ku in mosia nongkon popod mita in butá. Intau bilog bo intau ḻempeng in moyotakinbí monia, bobay doman inta bagu nononggadí bo bobay inta dongkadon mogoḷat kon wakutu mononggadí. Mosia komintan in mamangoi mobayongbí totok in mamangoi in butá tanaa.

⁹Mosia in mayá takin moḷabú in ḷuá, Ḻipoion-Ku bo kapiton-Ku in mosia. Diaan-Ku in mosia mongin tampat mita inta mobayong in tubig, mongin daḷan motondodai inta diá in kopintudan. Kon i Israel, Akuoi in naonda bo ki amá; Epraim in ki adí-Ku ḷoḷaki guya-guyang.”

¹⁰Ki TUHAN in noguman, “Indongogai ei bangusa mita! Potaaudon in koyow-Ku modapot kon ḷoḷan in dagat Umat-Ku inta ain pinorarit-Ku in sipunon-Kubí bo biagon naonda bo gombala moḷukad kon dombanea.

¹¹Umat in Israel ain pinosaḷamat-Ku, bo pinoḷuat-Kudon nongkon bangusa inta moropot.

¹²Mosia in mamangoi in Tombuḷud in Sion takin pogot motamburiang, poḷat modondong takin pia in gina popisí in bayongan inta inogoi-Ku kon i monia, gandum, ḷana, anggur, sapi bo domba. Mosia in mobaḻídon naonda bo taman inta mobayong in tubignea, bo diábí kodaitan in onu bo onu.

¹³Kon dodai intua mongodeaga mita in motayok takin kinoibog in gina. Guyanga bo tayow mobiag tumpaḷa moḷunganga in gina, sin Akuoi in moḻipoibí kon i monia. Kuyang in gina monia baḷuian-Ku in pia in gina, robonoḷ in gina baḷuaian-Ku in ḷunganga in gina.

¹⁴Imang mita in poguḻíon-Kubí in kaanon inta mobayong totok; bo bayongan inta paraḷuon in umat-Ku ogoi-Kubí. Akuoi, ki TUHAN, inta noguman.”

¹⁵Ki TUHAN in noguman, “Kon Rama kinodongogan in ombaḷ, bo amui inta takindon in ajar in gina. Ki Rahel in nongombaḷ kon i adínea mita, sia in doíbí ḻipoion sin diádon in mosia.

¹⁶Gogaiai in ombaḷmu bo paḻitai in ḷuámu! Diábí doman inta diá in mangaḻenea in inta iḷongasimu kon i adímu mita. Kon inimu oyúonbí in tontuḻínea, ki adímu mita in mobui nongkon butá in musung.

¹⁷Oyúon in kamang kon inimu in kobiagan moiduduimai; ki adímu mita in mobuibí kon ḻipú tontaní.

¹⁸Dinongog-Ku umat in Israel noguman takin robonoḷ in gina, ‘O TUHAN, kami naa in naonda bo biag inta diápa iyonok táe sinundú-Mu in kami sinbá motoindudui, bo tanaa kami in nosadiadon mobui mangoi kon ini-Mu. Dá, diádon in kami mobui, o TUHAN, Allah nami.

¹⁹Iko ain sinoḻikudan nami, táe nomanasaḷ in kami kon aid tatua. Naonda in ihukum-Mu in kami, kinumuyung in kami sin norobonoḷ in gina. Nooyá in kami bo nobaḻí mokooyá popisí in binaradosadon kon dodai in noguodpa.’

²⁰Israel, iko in adí inta kinotabi-Ku totok, adí inta totok in kinotabi, batoḷ in dodob-Ku. Pomuḷoi indoyóon-Ku in iko kotoropan-Ku in iko takin tanob. Iko in pinomia-Ku takin nopuḻing in tabi.

²¹Tomponuotaidon in daḷan mita, posindogdon in tomponuotnea mita tayakdon in daḷan inta binayáanmu koḻipod. Ei, Israel, pobuidon! Pobuidon mangoi kon kotámu mita inta dungkuḷ.

²²Modapot in toonu moḻia-ḻiaw in ginamu, ei bangusa inta diá motoindudui kon i-Nakó? Akuoi in nomaḻídon kon inta mobagu kon dunia, tobatú inta diá notombuḷoi — naonda bo bobay diá motombuḷoi in moḷukad kon ḷoḷaki.”

²³Ki TUHAN Inta Totok in mokawasa, Allah in Israel in noguman, “Aka umat-Ku binaḻí-Kudon ponango-nangoian ná dungkuḷmai, dá kon butá in Yohuda bo kon ḻipúnea mita yo kodongogandon bui intau in moguman, ‘Igumon mako ki TUHAN in momarakat kon tombuḷud motusi[19] kon Yerusalem tampat pogutunan inta ain sinantú kon i-Nia.’

²⁴Intau in mogutun kon Yohuda bo kon ḻipúnea mita. Kon tua in oyúon bidon in monononggobá bo mononombobiagon kon sapi bo dombanea.

²⁵Mosia inta moḷopí in poguḻíon-Ku bui, bo inta moḷungkoyó popisí in ginogoi in pobotugon-Ku.

²⁶Kon dodai intuata intau in mogumandon, ‘Naonda in nosiug noḷoḷot, mopiadon in korasaanku.’

²⁷Akuoi, ki TUHAN, in noguman kon moiangoibí in wakutunea butá in Israel bo Yohuda puḻingan-Ku in intau bo bobiagon.

²⁸Ná koḻipod Akuoi noḷukad kon i monia sinbá kon singgai moiduduimai Akuoi in morabut, morumbun bo morimumud kon i monia, natua doman Akuoi in moḷukad kon i monia sinbá Akuoi in moginrigon bo moposindog kon i monia bui.

²⁹Kon dodai intua intau in diá bidon moguman bui, ‘Guyanga mokaan kon inta moboil, ingipon i adínea in mongilu,’

³⁰táe ki ine bidon inta nokaan kon noboil, yo ingiponnea bidon tontaní in mongilu. Batúan in intau in matoibí popisí in dosanea tontaní.”

³¹Ki TUHAN in noguman, “Moiangoibí in wakutunea Akuoi momia kon dodandian mobagu takin umat in Israel bo Yohuda.

³²Táe dodandian tatua in deemanbí ná dodandian inta pinomia-Ku takin mogoguyang monia kon dodai in mosia kinapit-Ku iḻumuai nongkon Mesir. Umpaka in Akuoi naonda bo ki buḷoi monia ḷoḷaki, táe mosia in nonoḻikud kon dodandian-ku takin i monia.

³³Naa in dodandian mobagu inta bain pomiaan-Ku takin umat in Israel: Hukum-Ku mita in tagúon-Ku kon bonu in gina monia, bo paison-Ku kon gina monia. Akuoi in mobaḻí Allah monia, bo mosia in mobaḻí umat-Ku.

³⁴Diá bidon paraḷu tobatúmai in intau nongkon i monia in mositundúan bá monotaau kon i TUHAN. Sin mosia komintan, moḷoben mointok, in monotaau bidon kon i-Nakó. Taḷá mita monia in ḻiongon-Ku bidon, dosa mita monia in ampungan-Kubí. Akuoi, ki TUHAN, ain nosingog.”

³⁵Mata in singgai sinadia i TUHAN sin monimbayag kon tungkuḷ in singgai; buḷan bo tundi mita in monimbayag kon tungkuḷ in doḷom. Dagat in kinaui-Nea dá mobokoḷ monomburá, Ki TUHAN Inta Totok in mokawasa, tuata in tangoi-Nea.

³⁶Ki TUHAN in nodandi, “Aka hukum in dunia naa bo diápa mobaḷui yo Israel in tantúbí oyúon saḷaku bangusa.

³⁷Aka kuma kon singgai tobatú bo koukuran in ḷangit, bo apad in butá kotaridian, kon dodai intuata Israel in indoíon-Kudon popisí in bayongan in aid monia inta moraat. Akuoi, ki TUHAN, ain nosingog.”

³⁸Ki TUHAN in noguman, “Moiangoibí in wakutunea bayongan in Yerusalem posindogon bui saḷaku kotá-Ku, nongkon Ḷangkeang in Hananeel modapot in Bonawang Sikunea.

³⁹Nongkon tua bares in sigadnea mopobayá in Tombuḷud in Gareb, bo moboyuk ná Angob.

⁴⁰Sinangkub in ḷopá tatua, inta pinaké saḷaku poḷoḷobongan bo tampat poḷoḷumbúan kon apat, bo bayongan in gobá tudunea kon bingkí in Ongkag in Kidron modapot kon Bonawang in Kabaḷo mopobayá ná pomukaan, in pinotondídon kon i-Nakó. Kotá in Yerusalem in diábí rumbunon bui andeka rimumudon.”