Read Mongondow YEREMIA 32 Bible Online

YEREMIA 32 - Mongondow bible

YEREMIA 32

¹Kon taong impuḷúnea kon pinomarentaan i Zedekia datu in Yohuda, inta taong impuḷú bo waḷunea kon pinomarentaan i Nebukadnezar datu in Babel, ki TUHAN in nosingog kon inakó.

²Kon dodai intua tontara i datu in Babel koyogot in nonubu kon Yerusalem. Akuoi in sinahang kon dangkuḷon in komaḻig in datu

³i Datu Zedekia popisí in pinoponapudan kon nopotaaudon kon ki TUHAN in noguman nanaa, “Datu in Babel in pomayá-Kudon mako in mopotungkud bo mongawasa kon butá tanaa,

⁴bo ki Datu Zedekia in diábí mokoḷagui. Sia in ogoibí kon i datu in Babel, bo tumayow kon i datu tatua poḷat mongonguman tontaní takinnea.

⁵Onda intua ki Zedekia in akutondon pobayá in Babel bo mogutun kon tua modapot in Akuoi mohukum kon inia. Umpakabí in sia momarang kon intau in Babel, diábí in sia mokountung. Akuoi, ki TUHAN, ain nosingog.”

⁶Ki TUHAN in noguman kon inakó,

⁷kon ki Hanameel, ki adí ḷoḷaki i Salum pokuamaanku in mamangoibí sin mopoigum sinbá taḷuionku in butánea kon Anatot kon wilayah in Benyamin. Sin, akuoibí in pokuadíonnea inta totok in modagin inta kohak motaḷui kon butá tatua.

⁸Bo noitugat ná inta ain pinoguman i TUHAN, namangoidon in ki Hanameel kon inakó kon palas in komaḻig, bo nopoigum sinbá taḷuionku in butánea. Tuamai in noyakindon in akuoi kon ki TUHAN in totu-totuubí ain nosingog kon inakó.

⁹Dá inuboḻianku kon i Hanameel in butá tatua in doit saḷaka mopuḷú bo pitu. Inoiníku in sakusi mita bo kon tayowon monia sinekengku in surat totaḷuiannea, bo kinompitanku in segel bo sinimbangku in doitnea.

¹⁰

¹¹Onda intua akuoi in nogamá kon surat totaḷuian tatua inta ain kinompitan in segel bo pinomaisan kon sarat mita bo atorangnea mita. Ginamáku doman in surat ibanea inta notongkai intua inta diá kinompitan in segelnea,

¹²Bo surat doyowa tatua in inogoiku kon i Barukh ki adí i Neria ki ompu i Mahseya. Inogoiku intua kon tayowon i Hanameel bo sakusi mita inta ain notekeng kon surat mita tatua, bo kon tayowon in intau mita inta ḻimitú mako kon palas tatua.

¹³Kon tayowon i monia komintan tatua akuoi in noguman kon i Barukh,

¹⁴“Ki TUHAN Inta Totok in mokawasa, ki Allah in Israel, nomarenta sinbá gamáanmu in surat doyowa tanaa, pinomayá inta asli andeka inta dongkadon pinais bui, bo bonuon kon kuyon butá tobatú sinbá monahang.

¹⁵Ki TUHAN Inta Totok in mokawasa, ki Allah in Israel, in noguman kon baḷoi, butá, bo gobá in anggur in kon singgai moiduduimai in potaḷuibí bui kon butá tanaa.”

¹⁶Naonda in surat mita totaḷuian tatua inogoiku kon i Barukh, nosambayang in akuoi,

¹⁷“TUHAN Inta Totok in momulia, Ikobí inta nomaḻí kon ḷangit bo butá pinongin kawasa bo ropot-Mu inta moḷoben. Diábí in tobatúmai in mororiga aidan-Mu.

¹⁸Iko in nopoontong in tabi-Mu inta mononoi kon ribuan in intau, táe Iko in mohukum doman kon intau popisí in dosa in guranganea. Iko in Allah inta momulia bo motorindog; tangoi-Mu in TUHAN Inta Totok in mokawasa.

¹⁹Tomayá-Mu mita in motoyang, bo aid-Mu mita in mokoherang; Iko in nokoontong kon bayongan inta inaidan in intau, bo motuḻí kon i monia podudui in aid monia.

²⁰Dungkuḷmai Iko in nogaid kon inta mokoherang bo soaḷ mita inta diá in poḻiu kon Mesir, bo dapot in tanaa doman Iko in umuranpabí doman mogaid kon natua, pinomayá kon sigad in intau in Israel andeka kon sigad in bayongan in bangusa ibanea. Tuamai tanaa Iko in ponango-nangoian kon bayongan tampat.

²¹Pinongin kawasa bo ropot-Mu inta moḷoben Iko in nodia kon umat in Israel iḻumuai nongkon Mesir. Iko in nogaid kon inta mujizat mita bo inta mokoherang bo aid mita inta mokodoḻiok kon musung.

²²Butá inta mopia bo motobai naa inogoi-Mu kon i monia ná inta ain pinodandi-Mu kon mogoguyang monia.

²³Táe naonda in mosia namangoi in butá tanaa bo nogagow, mosia in diábí notoḷutui kon parenta-Mu mita, bo diá nobiag podudui in totundú-Mu mita. Bayongan inta pinarenta-Mu kon i monia diá tobatúmai in inaidan monia. Tuamai in pinopoangoi-Mu in bayongan bodito tanaa kon i monia.

²⁴Intau mita in Babel ain noposindog in dinding mita pongopungan kon ḻibu mita in kotá sin mogagow, bo tanaa mosia in nonubu. Parang, gogoy, bo yampoi in takit in mokopopisí kon kotá tanaa moḷabú kon ḻima monia. Iko in nokoontong kon bayongan inta pinoguman-Mu in noniatadon.

²⁵Táe umpaka natua, o TUHAN Inta Totok in momulia, Ikobí in nopotabá kon inakó notaḷui kon butá tanaa kon tayowon in sakusi mita, umpaka topiḻikpa bo kotá tanaa in agowondon in intau in Babel.”

²⁶Onda intua ki TUHAN in noguman kon inakó,

²⁷“Akuoibí in TUHAN, Allah in bayongan intau. Diábí in mororiga-Ku aidan.

²⁸Kotá tanaa in pomayá-Kubí mako in kawasaan i Nebukadnezar takin tontaranea mita. Mosia in mogagowbí kon kotá tanaa,

²⁹bo monurub kon tua modapot in mopayong takin baḷoi mita in intau mita inta nokopomuká kon torú-Ku, sin kon tudu in atop in baḷoi mita tatua notubá in mosia kon dupa kon i Baal bo nopobutak in anggur sin posumba kon dewa mita.

³⁰Pinangkoipamai kon kinobobiag monia, intau in Israel bo intau in Yohuda ain nogaid kon inta diá nokopia kon gina. Mosia in nopomuká in torú-Ku pinongin aid mita monia inta moraat.

³¹Pinangkoi kon kotá tanaa pinosindog, intaunea in nopomukádon kon torú-Ku. Dá sinantú-Kudon kon yopúon intua,

³²popisí in bayongan aid moraat in intau in Yohuda bo Yerusalem takin datu mita, pojabat in pomarenta, imang, bo nabi mita monia.

³³Mosia in nonaḷámaidon kon i-Nakó bo umpakabí Akuoi tantú motundú kon i monia, mosia in doíbí mokidongog bo doí doman mosadar.

³⁴Nodapotbí in baḷoi inta pinosindog poibadaan kon i-Nakó ain pinonajis monia pinongin nogukat kon berhala mita monia inta mokorongó kon tampat tatua.

³⁵Mosia in noposindog in mezbah mita kon i Baal kon Ḷopá in Hinom, bo noposumba in adí mita monia kon i Dewa Molokh. Bokaka, Akuoi in diábí nokoimontanmai in nokiaid in natua kon i monia, noidapotbí in diábí kon dodai in onda in noigonúmai kon gina-Ku kon mosia in mogaid kon inta totok in moraat natua bo mokopopisí kon intau in Yohuda baradosaan.”

³⁶Ki TUHAN, Allah in Israel, noguman kon inakó, “Yeremia, bangusa in Israel noguman kon parang, gogoy, bo yampoi in takit in mokopopisíbí kon kotá tanaa in moḷabú kon ḻima in datu in Babel. Tanaa, indongogai doman onu in poguman-Ku.

³⁷Akuoi in mosipunbí kon bangusa tanaa nongkon bayongan butá tampat pinoporaritan-Ku kon i monia popisí in torú-Ku bo rogi-Ku kon i monia. Mosia in diaan-Kubí bui kon tampat tanaa bo ogoi-Kudon mogutun kon naa takin moaman.

³⁸Mosia in mobaḻí umat-Ku bo Akuoi in mobaḻí Allah monia.

³⁹Akuoi in mobogoibí kon i monia in tongábí tobatú in tujuan kobiagan: tuata in mohoromat kon i-Nakó modapot in mononoi; tua in modiabí kon kopiaan kon i monia tontaní, bo kon i buí monia.

⁴⁰Akuoi in momiabí kon dodandian inta mononoi takin i monia. Akuoi in diábí mogogai in mogaid kon inta mopia kon i monia. Baḻíon-Kubí in mosia moondok bo mohoromat kon i-Nakó takin ḻimbatú in gina sinbá mosia diá yumayú kon i-Nakó.

⁴¹Mopiabí in gina-Ku in mopoaid kon inta mopia kon i monia, bo mopobaḻí kon i monia mogutun motantú kon butá tanaa modapot in mononoi.

⁴²Ná doman onda in pinopopoangoi-Ku in bodito kon bangusa tanaa, yo natua doman in Akuoi in mobogoi in bayongan inta mopia inta ain pinodandi-Ku kon i monia.

⁴³Intau in moguman kon butá tanaa in nobaḻí naonda bo padang gurun inta diá inutunan in intau bo mahaḷuk, bo butá tanaa in noḷabúdon kon ḻima in intau in Babel. Táe Akuoi in moguman kon singgai moiduduimai gobá tudunea in buibí potaḷui kon ḻipú tanaa;

⁴⁴Surat totaḷuiannea in tekengonbí, bo kompitan in segel, bo irigonan in sakusi mita. Tua in mobaḻíbí kon butá in Benyamin, kon ḻipú mita kon diugmai in Yerusalem, kon kotá mita in Yohuda, kon kotá mita kon butá mita kon buḷud, kon butá kon siḻigonmai in buḷud, bo kon Yohuda toḷatan. Bangusa tanaa in tompiaan-Kubí bui in kaadaannea kon butá tanaa. Akuoi, ki TUHAN, ain nosingog.”