Read Mongondow YEREMIA 36 Bible Online

YEREMIA 36 - Mongondow bible

YEREMIA 36

¹Kon taong inggopatnea naonda in ki Yoyakin ki adí i Yosia nobaḻí datu in Yohuda, ki TUHAN in noguman kon inakó,

²“Gamádon in ḻitodan in buk tobatú,[20] bo paisdon kon tua in bayongan inta ain pinoguman kon inimu soaḷ Israel bo Yohuda, soaḷ bayongan in bangusa. Paisdon in bayongan tosingogon-Ku pinangkoi kon dungkuḷ totok Akuoi nosingog kon inimu kon tungkuḷ in pinomarentaan i Datu Yosia nodapot in singgai naa.

³Dika-dika bo intau in Yohuda mogogai in mogaid kon inta moraat aka mokodongog in mosia kon bayongan in bodito inta bain popouma-Ku kon i monia. Dá ampungan-Kubí in dosa bo aid moraat monia.”

⁴Tuamai in inoiníku in ki Barukh ki adí i Neria bo pinoki pais kon ḻitodan in buk in bayongan tosingogon inta pinoguman i TUHAN kon inakó. Dá nodait i Barukh pinais intua kon ḻitodan in buk tatua.

⁵Onda intua akuoi in noguman kon inia, “Akuoi in diádon inogoi in tumuot kon bonu in Baḷoi TUHAN.

⁶Tuamai, aka wakutuneadon mopuasa in intau, yo iko in musti mayá intua, bo baca koropot in bayongan inta ain pinogumanku kon inimu, sinbá mosia in mokodongog komintan kon inta pinoguman i TUHAN kon inakó. Baca intua nongkon tampat inta bayongan intau kon bonu in Baḷoi TUHAN mokodongog kon tua mita, noitakin doman in intau in Yohuda inta namangoi nongkon kotá mita monia.

⁷Dika-dika bo popisí in nokodongogdon bo mosia in mosambayangdon kon i TUHAN, bo mogogaidon in mogaid kon inta mongoraat. Ki TUHAN in sinumorú totok kon i monia bo nonindoyó kon i monia.”

⁸Dá ki Barukh in nobaca kon tosingogon i TUHAN kon Baḷoi TUHAN, ná inta pinoki aidku kon inia.

⁹Kon buḷan in siownea kon taong iḻimanea kon pinomarentaan i Yoyakin datu in Yohuda, rayat nopuasa,[21] sinbá mokouḻí kon totabi nongkon i TUHAN. Intau inta nogutun kon Yerusalem bo intau inta namangoi nongkon kotá mita in Yohuda, komintan nopuasa.

¹⁰Bo ki Barukh in nobaca nongkon ḻitodan in buk tatua in bayongan inta ain pinogumanku, bo bayongan in intau nokidongog. Tua in binaca kon bonu in Baḷoi TUHAN kon kantor i Gemarya, ki adí i Sapan momomais in negara. Kantor tatua in kon palas kon ḻimonik, kon diug in daḷan tumuot kon Bonawang Mobagu kon Baḷoi TUHAN.

¹¹Ki Mikhaya ki adí i Gemarya ki ompu i Sapan nokidongog kon i Barukh nobaca kon tosingogon i TUHAN nongkon ḻitodan in buk tatua.

¹²Bo minayá in komaḻig in sia, kon kantor in momomais in negara. Kon tua, bayongan in pojabat koyogot nobakid. Ki Delaya ki adí i Semaya, ki Elnatan ki adí i Akhbor, ki Gemarya ki adí i Sapan, ki Zedekia ki adí i Hananya, ki Elisama momomais tobatú, bo pojabat mita ibanea inta kon tua.

¹³Ki Mikhaya in nopotaau kon i monia, in bayongan inta binaca i Barukh kon Baḷoi TUHAN.

¹⁴Bo pojabat mita tatua in nopotabá kon i Yehudi (ki adí i Netanya, ki ompu i Selemya, ki ompu kon duḷud i Kusyi) minayá kon i Barukh takin parenta sinbá mamangoi bo modia mangoi kon i monia in ḻitodan buk inta ain binacanea tatua. Dá dinia i Barukh in buk tatua.

¹⁵“Ḻitúdon uḻe,” guman monia, “bacapa in ḻitodan buk tatua kon inami.” Binaca doman i Barukh.

¹⁶Naonda in nopaḷutnea binaca, nooindoian in mosia takin noḻia-ḻiaw in gina bodongka noguman kon i Barukh, “Kami in musti mopotaau in naa kon i datu.”

¹⁷Onda intua noḻibó in mosia, “Potaauka kon i nami mongo naonda in pinomomaismu kon bayongan naa. Degá ki Yeremia in noguman kon inimu?”

¹⁸“Totuu, bayongan in singog inta noipais kon naa in pinoguman i Yeremia kon inakó, bo pinaisku in tinta kon ḻitodan in buk tanaa,” tubag i Barukh.

¹⁹“Iko bo ki Yeremia in musti mogadop. Dika modapot in kotaauan in intau in pinogadopanmu tua,” guman monia.

²⁰Pojabat mita tatua nogukat kon ḻitodan in buk tatua kon gopot i Elisama, momomais tatua, bodongka minayá kon i datu bo nopotaau in bayongan tua.

²¹Bo ki datu in nopotabá kon i Yehudi nogamá kon ḻitodan in buk tatua. Naonda in ginamánea kon gopot i Elisama, binaca i Yehudi intua kon i datu bo kon bayongan in pojabat inta sinimindog iḻimibu kon i datu.

²²Tungkuḷ intua buḷan noginsiow, bo ki datu in ḻimitú mako kon tayowon in pononontuḷúan kon komaḻig kon sempo in tumping.

²³Naonda in ki Yehudi nopaḷut nobaca kon degá toḷu andeka opat nobares, ki datu nomongkó in tosilad kon tonsilai tatua bo pinogambatnea kon bonu in tuḷú. Natuata in inaidannea nodapot in bayongan ḻitodan buk tatua nodait sinubá.

²⁴Umpaka ki Elnatan, ki Delaya, bo ki Gemarya nopoigum totok sinbá ki datu diá motubá kon ḻitodan in buk tatua, táe doíbí in sia nokidongogmai kon i monia. Pinomayá datu andeka pojabat inta nokodongog kon tombonu in buk tatua diábí inangoian in ondok andeka inagían in manasaḷ.

²⁶Noidapot in ki datu nomarentabí kon i adínea ḷoḷaki, ki Yerahmeel, noyotakin i Seraya ki adí i Azriel bo ki Selemya ki adí i Abdeel, sin modomok kon inakó bo kon i Barukh momomaisku. Táe binuni i TUHAN in kaminda.

²⁷Naonda in ki Datu Yoyakin notubá kon ḻitodan in buk inta pinoki pais kon i Barukh tua, ki TUHAN in nopotabá kon inakó

²⁸nogamá kon ḻitodan in buk ibanea, bo nomais kon bayongan inta ain pinais kon ḻitodan in buk inta muna tua.

²⁹Ki TUHAN in nopotabá kon inakó moguman nanaa kon i datu, “Iko in notubádon kon ḻitodan in buk tatua, bo iko in noḻibó kon i Yeremia nongonu sin sia in nomaisbí kon ki datu in Babel in mamangoi bo morimumud kon butá tanaa poḷat moḻimod kon intau inta nogutun kon naa takin bobiagonnea mita.

³⁰Tuamai, Akuoi, ki TUHAN, noguman kon inimu, ei Datu Yoyakim, diábí tobatúmai in nongkon buímu in momarenta mobaḻí datu buí i Daud. Mayatmu in pogambatbí kon ḷuai, onagon in patú kon dodai in singgai, bo oḷú motumping kon dodai in doḷom.

³¹Iko, buímu bo pojabatmu mita in hukumon-Ku popisí in dosa mita inta inaidan monimu. Akuoi in mopoangoibí kon i monimu in bayongan bodito inta ain pinonindoyó-Ku kon inimu, sin pinomayá iko andeka intau inta nogutun kon Yerusalem bo kon Yohuda diábí nopandungmai kon sindoyó-Ku mita.”

³²Dá ginamá-Ku in ḻitodan in buk inta nobagu, bo nobogoi kon i Barukh momomaisku. Bo sia in nomais kon bayongan inta pinogumanku kon inia, inta bonu in ḻitodan in buk inta muna dinugangan in tongonumai in koyow ibanea inta ná tatua.