Read Mongondow YEREMIA 38 Bible Online

YEREMIA 38 - Mongondow bible

YEREMIA 38

¹Ki TUHAN in nopotabá kon inakó nopotaau in koyow tanaa kon rayat, “Kotá tanaa in ogoi-Ku kon tontara in Babel, bo mosia in monaḷowbí. Ki ine in mogutun kon bonu in kotá in matoibí kon bonu in parang, andeka matoi in gogoy andeka matoi in yampoi in takit. Táe ki ine in ḷumuai bo mobogoi in awak monia kon intau in Babel, yo diábí ḻimodon; nyawanea in mosaḷamatbí.” Ki Sepaca ki adí i Matan, ki Gedalya ki adí i Pasyhur, ki Yukhal ki adí i Selemya, bo ki Pasyhur ki adí i Malkia in nokodongog doman kon bayongan inta pinoguman-Ku tua.

⁴Dá minayádon in pojabat mita tatua kon i datu bo noguman, “Intau tanaa in mustibí hukumon matoi. Sin pongin singognea natua sia in mokoinggamá kon ibog in bayongan tontara bo intau ibanea inta nogutunpa kon kotá tanaa. Sia in diábí motuḷung kon rayat, táe mopoboditobí kon i monia.”

⁵Ki Datu Zedekia in notubag, “Mopia! Aidai podudui in koibogmu, diábí in akuoi motaau mogimaḷow kon i monimu.”

⁶Bo ginamá monia in akuoi bo sinuntun monag monia in akuoi kon bonu in parigí i Malkia ki adí ḷoḷaki i datu, inta noiukat kon palas in komaḻig. Diábí in tubig kon bonu in parigí tatua, tongá yoná, bo akuoi in noibonu kon yoná tatua.

⁷Kon dodai intua oyúon in intau in Sudan tobatú inta nogaid kon bonu in komaḻig i datu. Tangoinea in ki Ebed-Melekh. Kinodongogannea kon akuoi in binonudon kon bonu in parigí tatua. Kon dodai in ki datu koyogot nomia kon bakid kon Bonawang Benyamin,

⁸ki Ebed-Melekh minayá intua bo noguman kon i datu,

⁹“Tuang datu Inta Momulia, aid in intau mita tatua in diábí mopia. Mosia in nopobonudon kon i Nabi Yeremia kon parigí; notantú bidon kon matoi in gogoy in sia kon tua, sin kaanon kon kotá tanaa in nodaitdon.”

¹⁰Bo ki datu in nomarenta kon i Ebed-Melekh, “Podiaaidon kon toḷu[22] in intau bo poḷuaidon in ki Yeremia nongkon parigí tatua kon dodai in sia diápa matoi.”

¹¹Dá minayádon in ki Ebed-Melekh takin intau toḷu tatua kon ontag in komaḻig, bo nogamá kon daing mita koyongan kon tua, bo sinuntun in tontogot kon inakó kon bonu in parigí.

¹²Ki Ebed-Melekh nokipoaip in daing mita tatua kon iyokku, sinbá diá monakit in awakku in popotogotan in tontogot tatua. Dá dinuduianku in onu inta pinoki aid i Ebed-Melekh.

¹³Bo inugut pinoonik monia in akuoi, iḻumuai nongkon parigí tatua. Nopaḷut mako kon tua akuoi sinahang kon palas in komaḻig.

¹⁴Kon singgai tobatú, ki Datu Zedekia nopotabá kon intau nodia kon inakó minayá in tayowonnea kon ngara intoḷunea kon Baḷoi TUHAN. Sia in noguman kon inakó, “Akuoi in moḻibó kon inimu, bo iko in mustibí motubag kon inakó taran-tarangan. Dikabí mobuni kon onu bo onu.”

¹⁵Akuoi in notubag, “Aka akuoi in moguman kon inta totuu, yo notantú bidon kon ki Tuang datu in mopoḷabúbí in hukuman matoi kon inakó; bo aka akuoi mononggina, ki Tuang datu in doíbí dumudui kon tonggina tatua.”

¹⁶Ki Datu Zedekia inumuni-uni mako nodandi kon inakó, kainia, “Pinodoyon kon i Allah inta nobiag, ki Allah inta nobogoi in kobiagan kon i naton, akuoi in mongibot kon akuoi in diábí moḻimod kon inimu andeka mobogoi kon inimu kon intau mita inta moibog moḻimod kon inimu.”

¹⁷Bo akuoi in noguman kon i Zedekia kon ki TUHAN Inta Totok in mokawasa, ki Allah inta sinumba in intau in Israel, noguman nanaa, “Aka iko tumungkud kon pojabat mita i datu in Babel, iko in diábí ḻimodon, bo kotá tanaa in diábí doman turubon. Iko takin motoḷuadímu in mosaḷamatbí.

¹⁸Táe aka iko doí tumungkud, yo kotá tanaa in moḷabú kon ḻima in intau in Babel. Turubonbí monia modait, bo iko in diábí mokoḷagui.”

¹⁹Ki Datu in notubag, “Moondok in akuoi kon intau mita bangusa naton inta ain noḷagui bo dinumotá kon intau in Babel. Dika-dika akuoi ogoi kon i monia bo sikisaan.”

²⁰“Diá,” tubagku, “Ki Tuang datu in diábí ogoi kon i monia. Poigumonku totok sinbá ki Tuang datu in dumudui kon koyow i TUHAN; dá tua komintan in moḷapatbí, bo ki Tuang datu in diábí ḻimodon.

²¹Táe aka ki Tuang datu doí moposarakan in awak, yo ki TUHAN in nopoontongdon kon inakó onu in mobaḻí.

²²Kon bonu in oontongon tatua akuoi in nokoontong kon bayongan in bobay inta kon komaḻigpa in Yohuda pinoḷuai dinia kon pojabat mita in Babel. Kobaya-bayá mosingog in mosia, ‘Ki datu in pinomiadon ibo-ibog in yobayatnea mita inta modagin, bo kinawasa monia. Tanaa, naonda in sioḷnea noiḷosok kon bonu in yoná, inumundok komintan in mosia.’ ”

²³Akuoi in noguman doman, “Bayongan in adí bo buḷoi i Tuang datu in diaanbí doman ḷumuai bo ogoi kon intau in Babel. Ki Tuang doman tontaní in diábí moisimparut kon i monia. Ki Tuang datu in domokonbí i datu in Babel, bo kotá tanaa in payongonbí.”

²⁴Bo ki Zedekia in noguman, “Dika potaau kon i ineka in onu inta inouman naton naa, sinbá nyawamu in diá gamáan monia.

²⁵Aka pojabat mita mokodongog kon akuoi in noyosingogmudon, yo mosia in mamangoibí bo moḻibó kon inimu kon onu inta inouman naton. Mosia in modandi kon diábí moḻimod kon inimu, aka oumanonmu komintan kon i monia.

²⁶Potaaudon kon iko in nodondouḷug kon inakó sinbá akuoi in diádon mokidia bui kon inimu kon ponjara bo matoi kon tua.”

²⁷Diá noonggot kon tua bayongan in pojabat tatua namangoi bo nopoḻibo-ḻibó kon inakó. Akuoi in noguman kon i monia noitugat ná inta pinarenta i datu kon inakó. Takin natua mosia in diá nokopongonu sin diá tobatúmai in intau nonotaau kon yosingog naminda i datu.

²⁸Akuoi in tantú sinahang kon palas in komaḻig nodapot kon singgai pinogagowan in musung kon Yerusalem.