Read Mongondow YEREMIA 39 Bible Online

YEREMIA 39 - Mongondow bible

YEREMIA 39

¹Kon buḷan impuḷúnea kon taong noginsiow kon pinomarentaan i Zedekia datu in Yohuda, ki Nebukadnezar datu in Babel takin bayongan in tontaranea namangoi bo nonubu kon Yerusalem.

²Kon singgai in siownea buḷan inggopatnea taong impuḷú bo mita kon pinomarentaan i Datu Zedekia, dinding in kotá dinangatan in musung,

³bo Yerusalem inagow.[23] Dá bayongan in pojabat mita in datu in Babel namangoi bo minayá iḻimitú kon Bonawang Toyuak. Kon sigad monia tua oyúon in ki Nergal-Sarezer, Samgar Nebo, Sarsekim tongguḷu in tombonu in komaḻig, ki Nergal-Sarezer Rabmag bo porwira mita ibanea.[24]

⁴Kon tungkuḷ in ki Datu Zedekia bo bayongan in tontaranea nokoontong kon bayongan inta nobaḻí tatua, mosia in noḷongasi noḷagui minayá in Ḷopá in Yordan doḷom doman tatua. Mosia in nongin taman in komaḻig, bo iḻumuai nongin bonawang inta nopoyoguput in dinding in tampat tatua.

⁵Táe dinuduran in tontara in Babel in mosia bo nodomok kon i Zedekia kon ḷopá in Yerikho. Onda intua sia in dinia kon i Datu Nebukadnezar kon kotá in Ribla kon daerah in Hamat, bo pinopoḷabúan in hukuman minatoi.

⁶Kon kotá doman tatua ki adínea mita in iḻimod kon tayowonnea, bo bayongan in pojabat in pomarenta in Yohuda in iḻimod doman.

⁷Onda intua ki Zedekia iḷontok doman kon matanea, bo inumantungan poḷat dinia kon Babel.

⁸Bo intau mita in Babel nonurub kon komaḻig in datu bo baḷoi mita in rayat, poḷat nogumpag kon dinding mita in Yerusalem.

⁹Imbuitnea rayat inta kon kotápa, takin intau mita inta ain noḷagui bo dinumotá kon intau mita in Babel, inakut pinobayá in Babel i Nebuzaradan itoi in tontara in Babel.

¹⁰Tongobotak in rayat inta totok in nobiag bogá bo inta diá kokapunyaan, sinaḷáan kon Yohuda bo inogoian in gobá in anggur bo gobá in tudunea.

¹¹Ki Datu Nebukadnezar ain nopotabá kon i Nebuzaradan, itoi in tontaranea, nopoḷuai in parenta ná noiduduimai naa:

¹²“Bayádon tayak in ki Yeremia, bo ḷukadai kopiaan in sia. Dika onuon monimu in sia; duduiai onu in poigumonnea.”

¹³Dá ki Nebuzaradan takin doyowa in porwira moḷantudnea, ki Nebusyazban bo ki Nergal-Sarezer takin bayongan in porwira in Babel ibanea,

¹⁴nogamá kon inakó nongkon palas in komaḻig. Bo akuoi in inogoi kon i Gedalya ki adí i Ahikam ki ompu i Sapan, inta musti mogatod kon inakó mobui takin saḷamat. Dá nogutundon in akuoi kon sigad in rayat.

¹⁵Kon tungkuḷ in akuoi pinonjarapa kon palas in komaḻig, ki TUHAN in nopotabá kon inakó

¹⁶moguman kon i Ebed-Melekh intau in Sudan tatua kon ki TUHAN Inta Totok in mokawasa, ki Allah in Israel, in noguman nanaa, “Ná inta pinoguman-Ku koḻipod, Akuoi in mopoangoibí in bodito kon kotá tanaa, bo deemanbí kobiagan motompia. Iko in mokoontongbí kon kobaḻían intua.

¹⁷Táe Akuoi, ki TUHAN, in moḷukadbí kon inimu. Iko in diábí ogoi kon intau mita inta kinoondokmu.

¹⁸Iko in diábí ḻimodon, sin Akuoi in moposaḷamatbí kon inimu. Nyawamu in mosaḷamatbí sin iko in inumandoḷ kon i-Nakó. Akuoi ki TUHAN, ain nosingog.”