Read Mongondow YEREMIA 4 Bible Online

YEREMIA 4 - Mongondow bible

YEREMIA 4

¹Ki TUHAN in noguman, “Umat in Israel, aka moiko moibog mobui mangoi, yo pobuidon mangoi kon i-Nakó. Ḷumbúdon muna in berhala mita inta kinorongó-Ku tua, bo pokotoinduduidon kon i-Nakó.

²Aka moiko in mongibot podoyon kon tangoi-Ku bo moiko in mobiag mojujur moadil bo mobanar, dá bayongan in bangusa in mopoigumbí kon i-Nakó sinbá barakatan-Ku in mosia, bo mosia in modayow kon i-Nakó.”

³Ki TUHAN in noguman kon intau mita inta nogutun kon Yohuda bo kon Yerusalem, “Tonggobádon in butámu inta diápa sinonggobá; dika moponimboi in bibit kon yuak in dugi.

⁴Kadaiai in dandimu kon i-Nakó, TUHANmu, bo awakmu in tongádon ogoi kon i-Nakó, ei intau mita in Yohuda bo Yerusalem. Aka diá, yo torú-Ku in tumagabdon bo momokak naonda bo tuḷú inta diábí kopiongan i inekabí. Tua komintan in moiumabí kon inimu popisí in aidmu mita inta moraat.”

⁵Irupdon in torompet kon sinangkub in butá! Pomaḷúdon kosilang bo koḷangon. Potabádon in intau in Yohuda bo Yerusalem moḷagui mayá in kotá mita inta dininding.

⁶Tundúdon in daḷan mayá in Sion, Buḷud i TUHAN, ḷagidon poḷagui dika tongá kibio-biómai. Ki TUHAN in koyogotdon in mopoangoi in bodito bo korimumudan moḷoben nongkon utuan.

⁷Ná singa inta iḻumuai nongkon pinogadopannea natua doman nobuatdon in momomutú kon bangusa mita inta namangoi sin momutú kon Yohuda. Kotá mita in Yohuda in mobaḻídon dongka rumbunnea tampat inta diá inutunan in intau.

⁸Tuamai, pongombaḷ bo pogamuidon, pakédon in daing karong nobaḻí tomponuot in pinonogumatoian. Sin torú i TUHAN inta tumaga-tagab diápa doman nopiong nongkon Yohuda.

⁹Ki TUHAN in noguman, “Kon singgai tatua datu mita bo intau mita moḷoben in kobuḻiandon in ibog; imang mita in moondok bo nabi mita in moitaḻikokog.”

¹⁰Bo akuoi in noguman, “TUHAN Inta Totok in moḷantud, Iko in nonguboḷdon kon intau in Yohuda bo intau in Yerusalem! Iko in noguman kon moiangoi in dodamean, bokaka tanaa in kobiagan nami in inindoyódon in pitow.”

¹¹Wakutunea in moiangoibí intau in Yohuda bo intau in Yerusalem mokouḻí kon habar kon tompot mopatú nongkon padang gurun koyogotdon in mogirup mamagí kon i monia. Tompot tatua in deemanbí tompot biasamai inta tongá mopoḷayug in baḻeká,

¹²táe tompotbí moropot inta namangoi pinodoyon kon parenta i TUHAN tontaní sin mopoḷabú in hukuman kon umat-Nea.

¹³Indoiai, musung in moitukat ná goḷom. Kereta mita in parangnea in naonda bo deḷang, kabaḷonea mita in moḻika-ḻikat nongkon ḷagapan boniá. Ado, mobodito in kita! Moputú in kita!

¹⁴Yerusalem, ḷumbúdon in inta moraat nongkon ginamu sinbá posaḷamaton in iko. Modapot in toonu in raian mita moraat tatua in tagúonmu kon bonu in ginamu?

¹⁵Nongkon kotá in Dan, bo nongkon buḷud in Epraim noiangoidon in totabá mita inta nodia kon habar diá mopia.

¹⁶Mosia in nopotoingat kon bangusa mita bo nopotaau kon intau in Yerusalem kon musung[2] niondon taya-taya mangoi nongkon butá inta moyayú. Mosia in mopobaḷúbí in baḷú in parang kon kotá mita in Yohuda

¹⁷bo moḻipung kon Yerusalem ná intau inta moḷukad kon gobá. Tua komintan in nobaḻí popisí in bangusa in Yohuda ain nomarontak kon i TUHAN. Ki TUHAN ain nosingog.

¹⁸Yohuda, ikobí tontaní inta nopoangoi in bodito tatua kon inimu. Kobobiagmu bo oaidmu mita in nokopopisí kon bayongan in roriga tatua tumurak kon ginamu.

¹⁹Totuu morobonoḷ in dodobku, diádon mokoigon in akuoi in mobaba kon roriga. Diá mokotongod in akuoi in mopoonow in gina putúku in modoḷodok kon bonu in dodob, sin dinongogku in torompet in nosingog, bo kokow in parang kodongogandon mogintubagan.

²⁰Bodito in mamangoi diá moobo-obot morimumud kon sinangkub in butá. Daḻídon in ḷoḷaiganku pinoguyaat, daingnea mita in binisi-bisí.

²¹Modapot in toonu intua in ontongonku intau simimpatoi in moparang? Modapot in toonu in dongogonku singog in torompet inta mokobongoḷ?

²²Ki TUHAN in noguman, “Mobodok totok in umat-Ku tatua, mosia in diábí nonotaau kon i-Nakó. Mosia in naonda bo mongoadí mita inta pamandot diábí in topiḻikmai in pomomangaḻe; mopandoi in mogaid kon inta moraat, diá mokoaid kon inta mopia.”

²³Mataku in ḷumongow monag kon butá, diá in koontongan bo noingkag, ḷumangag in akuoi kon ḷangit, uḻe, diábí in monindar.

²⁴Inontongku in buḷud bo tombuḷud mita inta moḷantud modandú motoyang totok.

²⁵Inontongku diábí in intau, ḷagapanpa in nodaitdon iḷumayug.

²⁶Butá moḷumbá in nobaḻídon rawang noingkag, kotá mita in norimumud nobaḻídon rumbunnea, popisí in ki TUHAN in sinumorúdon totok kon umat-Nea. (

²⁷Ki TUHAN in noguman kon sinangkub in dunia in mobaḻí padang gurun, táe Sia in diábí momutú kon tua komintan.)

²⁸Butá in mononogumatoi, ḷangit in simindipdon. Ki TUHAN in nosingogdon bo diá bidon momaḷui kon tomayá-Nea. Sia in nonantúdon kon singog bo diábí umundok tongákabí toḷoḷampang.

²⁹Kinodongogan in dowawá in tontara inta sinumakoi kon kabaḷo bo momomiot, nokopopisí kon bayongan in intau noḷagui mopogoa-goa. Kayuon mita sinuotan monia, buḷud batu sinakod monia. Bayongan in kotá noingongowdon, diádon in moibog mogutun kon tua.

³⁰Ei Yerusalem, iko in sinaḷáandon bo diádon mokopongonu! Onubí in mangaḻenea in mogiḷambung in ḷambung nopura bo moḷambá kon awak mopomaké in buḷawan bo saḷaka, poḷat moponggares in cilá kon mata? Diábí in mangaḻenea in iko in mopogaga in pogotmu, sin intau mita inta kinotabimu in doí bidon kon inimu, nodapotbí in mosia in moibogbí morabut kon nyawamu.

³¹Akuoi in nokodongog kon ombaḷ mopoina-inak naonda bo bobay inta mononggadí; naonda bo bobay moguod inta monononggadí ḻinggané, natua in ombaḷ in Yerusalem inta mosisí in pogoginanea. Ḻimanea in mongokap bo mogamui in sia, “Moboditodon in akuoi — akuoi in ḻimodon in musung!”