Read Mongondow YEREMIA 43 Bible Online

YEREMIA 43 - Mongondow bible

YEREMIA 43

¹Koyow in TUHAN Allah in Israel, inta musti potaauku kon rayat in nodaitkudon pinotaau.

²Bo ki Azarya ki adí i Hosaya bo ki Yohanan ki adí Kareah takin bayongan in intau inta mododia tua in noguman kon inakó, “Mouboḷ in iko. Ki TUHAN Allah naton in diábí nopotabá kon inimu moḷamboi kon inami in mayá mogutun kon Mesir.

³Ki Barukhbí ki adí i Neria tua in nondodak kon inimu kon monayow kon inami, sinbá kami kawasaan in intau in Babel bo mokoḻimod andeka mogakut kon inami pobayá in Babel.”

⁴Pinomayá ki Yohanan andeka bayongan in porwira bo rayat in doíbí dinumudui kon parenta i TUHAN kon tantú mogutun kon Yohuda.

⁵Ki Yohanan bo bayongan in porwira tatua in nodia minayá in Mesir in bayongan in intau inta oyúonpa kon Yohuda, bo bayongan doman intau inta ain nobui nongkon butá ibanea inta kinoraritan monia.

⁶Ḷoḷaki, bobay, mongoadí mita bo ki adí mita bobay i datu inta inogoi i Nebuzaradan kon i Gedalya, takin doman akuoi bo ki Barukh, komintan dinia minayá in Mesir.

⁷Mosia in noḷawang kon parenta i TUHAN, bo minayá in Mesir nodapot in kotá in Tahpanhes.

⁸Kon tua ki TUHAN in noguman kon inakó,

⁹“Pogamádon kon batu mita mongoḷoben, bo ḷobongdon kon bonu in butá kon tayowon in ngara tumuot in baḷoi in pomarenta in kotá tatua. Ḷongasi sinbá intau mita in Yohuda mokoontong kon onu inta inaidanmu tatua.

¹⁰Bo pogumandon kon i monia kon Akuoi, ki TUHAN Inta Totok in mokawasa, Allah in Israel, in mopoangoibí in mogogundoi-Ku ki Nebukadnezar datu in Babel, kon tampat tatua. Bo kon tudu in batu mita inta iḷobongmu kon butá tatua, posindogonneabí in tampat pomomarentaannea bo mosongká kon ḷoḷaigan in dodatuannea.

¹¹Ki Nebukadnezar in mamangoibí bo monaḷow kon Mesir. Bo intau mita inta ain sinantú kon matoi popisí in yampoi in takit in matoibí popisí in yampoi in takit. Mosia inta sinantú kon akuton saḷaku inta dinakop in akutonbí saḷaku intau dinakop, bo inta sinantú kon matoi kon bonu in parang in matoibí kon bonu in parang.

¹²Akuoi[25] in mopoyongkitbí in tuḷú kon kuil mita in dewa mita in Mesir, bo ki datu in Babel in momokakbí kon patong mita in berhala bo kuil mita andeka akutonnea pobayá in butánea. Naonda bo gombala tobatú mondarit kon pakeangnea nongkon kutu, natua doman in datu in Babel in monimpat mokopodarit kon Mesir bodongka mobuat bui takin diábí in monuyayow kon inia.

¹³Tugu mita in berhala kon Heliopolis[26] kon Mesir, in rimumudonbí, bo kuil mita in dewa mita in Mesir pokakonbí komintan.”