Read Mongondow YEREMIA 44 Bible Online

YEREMIA 44 - Mongondow bible

YEREMIA 44

¹Ki TUHAN in nosingog kon inakó soaḷ bayongan in intau in Israel inta nogutun kon Mesir, inta kon kotá in Migdol, Tahpanhes, Mempis, bo kon butá kon dotá in toḷatan.

²Naa in koyow i TUHAN Inta Totok in mokawasa, Allah in Israel, kon i monia, “Moiko tontaní ain nokoontong kon bodito inta pinopouma-Ku kon Yerusalem bo bayongan in kotá ibanea kon Yohuda. Nodapot in tanaa mako kotá mita tatua in umuranpabí norimumud bo diá in nogutun.

³Tua in nobaḻí popisí in intaunea in binaradosa, dá sinumorú in Akuoi. Mosia in noposumba in kuruban bo nogundoi kon dewa mita inta diápa kon dodai in onda in sinumba monia tontaní, i monimu bo in mogoguyangmu.

⁴Akuoi in tantúbí mopotabá mangoi in mogogundoi-Ku mita nabi mita, inta nogimaḷow kon i monia nogaid kon inta moraat inta kinodoí-Ku tua.

⁵Táe moiko in doí mokidongog bo doí monondudut. Moiko in doíbí mogogai in mogaid kon inta moraat, tuata in moposumba in kuruban kon dewa mita.

⁶Tuamai in pinopobutak-Kudon in torú bo rogi-Ku kon kotá mita in Yohuda bo kon daḷan mita kon Yerusalem. Nodait-Ku sinurub nodapot in dongkadon apugnea bo noḷogat naonda inta inontong monimu tanaa mako.

⁷Bo tanaa Akuoi, ki TUHAN Inta Totok in mokawasa, Allah in Israel, noḻibó mongo nongonu sin moiko in nogaidbí kon inta mokopoangoi kon bodito moḷoben kon inimu tontaní. Degá moibog in moiko moyopú kon bayongan in intau — ḷoḷaki, bobay, mongoadí mita, bo adí mita mointok — modapot in diádon in tobatúmai in inta nongkon bangusamu in kotaḷáan?

⁸Nongonu sin moiko in nogaidbí kon inta mokopomuká kon torú-Ku? Moiko in namangoi bo nogutun kon Mesir, butá inta deeman moiko in kitogi, bo moiko in mosumba kon berhala bo moposumba in kuruban kon dewa mita in butá tatua! Degá moibog in moiko morimumud kon awakmu tontaní sinbá singkuḻeon in moiko in bayongan in bangusa kon dunia bo tangoimu in pakéondon mobaḻí kutukan?

⁹Degá kinoḻiongandon monimu in bayongan aid moraat inta inaidan in mogoguyangmu kon butá in Yohuda bo kon daḷan mita kon kotá in Yerusalem, in datu mita in Yohuda bo i buḷoi mita monia, bo moiko doman takin ki buḷoi monimu mita?

¹⁰Táe dapot in singgai naa moiko in doíbí tumonsiup. Moiko in diábí mohoromat kon i-Nakó bo diá nobiag podudui in hukum inta inogoi-Ku kon inimu bo mogoguyangmu.

¹¹Tuamai, Akuoi, ki TUHAN Inta Totok in mokawasa, Allah in Israel, moḷawangbí kon i monimu bo morimumud kon sinangkub in Yohuda.

¹²Bo aka intau in Yohuda inta ki agatnea oyúon in tantú moibog mayá in Mesir sin mogutun kon tua, yo moyopúbí komintan in mosia. Mosia komintan, moḷoben mointok, in matoibí kon Mesir kon bonu in parang andeka popisí in gogoy. Intau in mokoningkimbí in mokoontong kon i monia bo moningkuḻe kon i monia. Tangoi monia in pakéonbí saḷaku kutukan.

¹³Ná pinohohukum-Ku kon Yerusalem, yo natua doman in pohohukum-Ku kon i monia inta nogutun kon Mesir. Mosia in matoibí kon bonu in parang, popisí in gogoy andeka yampoi in takit.

¹⁴Bo intau in Yohuda inta ki agatnea, inta ain minayá in Mesir sin mogutun kon tua, diábí tobatúmai in mokoḷagui andeka mobiag. Diábí tobatúmai in kon sigad monia in mobuipa mangoi kon Yohuda, umpakabí tua in totok in koibog monia. Totuu, diábí in mobui koḻikudbí in inta moḷoḷagui.”

¹⁵Bo namangoidon in intau mobayong totok kon inakó, bayongan ḷoḷaki inta nokotaaumai kon ki buḷoi monia in noposumba in kuruban kon dewa, bo bayongan in bobay inta sinimindog mako kon tua, noitakin doman in intau mita in Israel inta nogutun kon Patros, kon dotá in toḷatan in Mesir. Mosia in noguman kon inakó,

¹⁶“Kami in doíbí mokidongog kon onu in pinogumanmu kon inami pinodoyon kon tangoi i TUHAN.

¹⁷Bayongan inta ain pinodandi nami, in aidanbí doman nami. Kami in umuranbí moposumba in kuruban kon i Bokí in Soroga, bo mopobutak in tubig in anggur mobaḻí sosumba kon inia ná inta biasamai pomiaan kon kotá mita in Yohuda bo kon daḷan mita kon Yerusalem in mogoguyang nami, in datu mita bo in pojabat mita in pomarenta nami bo inami tontaní. Kon dodai intua kon inami in tugatbí in kaanon, kami in nobiag notompia, bo diábí in roriga onu bo onu nion.

¹⁸Táe pinangkoi kon kami nogogai noposumba in kuruban kon i Bokí in Soroga, bo diádon nopobutak in anggur saḷaku sosumba kon inia, kami in kinodaitandon in bayongan yagi-yagi; intau mita nami in minatoi kon pinoparangan andeka popisí in ginogoi.”

¹⁹Onda intua bobay mita tatua in noguman, “Ki buḷoi mita nami in nobogoi kon kami nomia kon roti ná ki Bokí in Soroga bo notubá kon kuruban poḷat moposumba in anggur kon i dewa nami tatua.”

²⁰Tubagku kon bayongan in ḷoḷaki bo bobay inta noguman natua,

²¹“Degá kai monimu kamai dá ki TUHAN in diábí nonotaau andeka nokoḻiongdon kon kuruban mita inta pinosumba kon kotá mita in Yohuda bo kon daḷan mita in Yerusalem in mogoguyangmu, in datu mita bo in pojabatmu mita, takin rayat kon butá tanaa bo takin doman moiko tontaní?

²²Ki TUHAN in diádon mokoigon in mokoontong mako kon i monimu moposumba in kuruban kon ilah mita ibanea. Aidmu tua in moraat bo mokooyá. Moiko in binaradosadon kon i TUHAN bo diá motoindudui kon parenta-Nea mita. Tuamai tanaa doman mako butámu ain norimumud dá diádon motaau pogutunan, bo tangoinea in pinakédon nobaḻí kutukan. Intau inta mokoontong in mokoningkimbí.”

²⁴Bo pinotaauku kon bayongan in intau tatua, muna-munamai kon bobay mita, kon ki TUHAN Inta Totok in mokawasa in noguman nanaa kon intau mita in Yohuda inta nogutun kon Mesir, “Moiko bo ki buḷoimu mita in nongibotdon kon i Bokí in Soroga kon moiko in motubá kon kuruban bo moposumba in anggur kon inia. Dandimu tatua in inintompodandon monimu. Dá, mopiadon! Aidaidon onu inta ain dinandi monimu tua!

²⁶Táe tanaa indongogai onu in poguman-Ku kon inimu, ei intau in Israel kon Mesir: Akuoi ki TUHAN, in mongibot podoyon kon tangoi-Ku inta momulia kon moiko in diá bidon ogoi-Ku mopomaké in tangoi-Ku aka momia kon dandi. Moiko in diá bidon motaau in moguman, Akuoi in mongibot podoyon kon tangoi i Allah inta nobiag!

²⁷Ḷongasion-Kubí sinbá mobodito in moiko bo diá mosanang, modapot in moiko matoi komintan, pinomayá matoi in parang andeka popisí in yampoi in takit.

²⁸Tongábí tongonumai in intau in mosaḷamat bo mobui kon Yohuda nongkon Mesir. Dá bayongan in intau in Yohuda kon Mesir in mokoontongbí mongo tosingogon monia andeka tosingogon-Ku in mobaḻí.

²⁹Akuoi in mopoangoibí in bodito kon inimu kon tampat tanaa sin moponiata kon inimu kon hukuman inta sinomayá-Ku kon i monimu, in totu-totuubí kon mobaḻí.

³⁰Ki Hopra datu in Mesir in ogoi-Kubí kon musung mita inta moibog moḻimod kon inia, ná Akuoi ain nobogoi kon i Zedekia datu in Yohuda kon i Nebukadnezar datu in Babel, musungnea inta moibog moḻimod kon inia tua.”