Read Mongondow YEREMIA 47 Bible Online

YEREMIA 47 - Mongondow bible

YEREMIA 47

¹Kon dodai in datu in Mesir diápa nonubu kon Gaza, ki TUHAN in nogumandon kon inakó soaḷ butá in Pilistin.

²Ki TUHAN in noguman, “Indoiai, tubig in moiḻig nongkon utuan bo moiḻebet naonda bo ongkag inta koyogot in modunuk nondangat kon butá bo tombonunea, kotá mita takin intau inta nogutun kon bonunea. Intau in momaḷúbí mokituḷung bo bayongan in rayat mogayow.

³Mosia in mokodongogbí kon goḷopak in sioḷ in kabaḷo, koḷangká in bayáan in kereta, bo goḷotak mako in bolanea. Guyanga in mobaḻíbí moḷungkoyó bo diá bidon morai kon i adínea.

⁴Noiangoidon in wakutunea intau in Pilistin yopúon komintan, dá Tirus bo Sidon in diádon mokouḻí kon totuḷung. Akuoi, ki TUHAN, in moḻimod kon bayongan in intau in Pilistin inta kinotaḷáan nongkon Kreta.

⁵Intau in Gaza kinoantugan in robonoḷ in gina moḷoben; intau inta kon Askelon in kibio-biómaidon. Modapot in toonu intau in Pilistin inta oyúonpa umuran mononogumatoi?

⁶Moiko in momaḷú, ‘Modapot in toonu iko in monubu, ei pitow i TUHAN? Tungkogdon kon gumámu bo kibio-biómaidon kon tua kaasí!’

⁷Táe motaau degá in sia kibio-biómai, aka Akuoi momarenta kon inia monubu kon Askelon bo intau inta nogutun kon bingkí in pintad?”