Read Mongondow YEREMIA 48 Bible Online

YEREMIA 48 - Mongondow bible

YEREMIA 48

¹Naa inta pinoguman i TUHAN Inta Totok in mokawasa, Allah in Israel soaḷ Moab, “Moboditodon intau in kotá in Nebo, kotánea in noumpagdon! Kiryataim inagow, bo dindingnea inta morigon in irimumud, dá intau inta nogutun kon tua nooyádon;

²noinggamádon inta nokoyunggagá kon Moab. Musung in nogagowdon kon Hesybon bo kon tua mosia in nonomayá kon monginggamá kon sinangkub in bangusa in Moab. Singog mita kon kotá in Madmen in pogogaiondon, sin kotá tatua in tubuondon in tontara.

³Indongogai! Intau in Horonaim in kumarak, ‘Koyopúan! Korimumudan!’

⁴Moab in noinggamádon! Karak in mongoadínea mita in kinodongogan nodapot in Zoar.

⁵Indongogai in singog in ombaḷ kon daḷan motakod kon Luhit, bo singog amui kon daḷan mosiḻig kon Horonaim.

⁶Guman monia, ‘Koḷamemet! Posaḷamatdon in nyawamu! Poḷaguidon ná keledai kaḻig kon gurun!’

⁷Moab! Iko in mopongata in kodoḻikot bo kaoyúonanmu. Táe tanaa iko tontaní in taḷowonbí. Kamos, dewamu, takin imang mita bo pojabatnea mita in akutonbí pobayá in poḷumbúan.

⁸Bayongan in kotá in morimumudbí, diábí tobatúmai in kotaḻiban. Ḷopá bo oyuknea komintanbí yompaton. Akuoi, ki TUHAN, ain nosingog.

⁹Posindogdon in batu nisan kon i Moab, sin diádon moonggot bo butá tatua in yompatondon komintan. Kotánea mita in moumpagdon bo diádon tobatúmai in intau in mogutun kon tua.”

¹⁰Kinutukdon in intau inta diá totu-totuu nopobayá in oaidan nongkon i TUHAN. Kinutukdon in sia inta diá norabut kon pitow bo noḻimod.

¹¹Ki TUHAN in noguman, “Nongkon koḻipodpabímai Moab in nobiag noaman. Diápabí kon dodai in onda in sia inakut pinobayá in pinoḷumbúan. Sia in naonda bo tubig in anggur inta pinomayá mako in sinumonop bo diá dodai in onda in binonu kon tampat in anggur ibanea. Anggurnea in norongingipa bo mopia.

¹²Táe, oyúonbí in wakutunea potabá-Ku sinbá Moab in butakon naonda bo anggur, bo tampatnea mita in kosongan bo botakon.

¹³Moab in mokudaibí kon Kamos, dewa monia, naonda bo intau in Israel nokudai in gina monia kon Betel inta pinongata monia tua.

¹⁴Naondabí in ḷoḷaki mita in Moab mokobaḻí in moguman, ‘Kami in pahlawan, tontara motorindog inta ain inuji kon parang?’

¹⁵Moab bo kotánea mita in irimumudon, bo intau mita moguodnea inta mongopia ain iḻimod. Akuoi in nosingogdon. Akuoi in datu, TUHAN Inta Totok in mokawasa.

¹⁶Bodito kon Moab in kon tayowondon in ngara, diádon moonggot bo morimumud in sia.

¹⁷Ei moiko negara mita kon diug in Moab inta nonotaau kon kinotonsimboróannea, ponogumatoidon kon inia! Singogdon, ‘Moab in diá bidon mongawasa, koḷoḷoben bo koropotnea in noinggamádon!’

¹⁸Ei intau in Dibon, poponagdon nongkon tampatmu inta ihoromat; ḻitúdon kon butá bo kon tudu in ḷobud. Sin ki inta momoguyaat kon butámu in noiyaputdon, bo morimumud kon bayongan in dindingmu.

¹⁹Moiko inta nogutun kon Aroër, sindogdon kon bingkí in daḷan bo tondudutka! Ḻibódon kon i monia inta noḷagui, bo inta nosaḷamat, ‘Onu degá in nobaḻí?’

²⁰Mosia in motubagbí, ‘Moab ain noḷabú bo mokooyádon, tuamai in ombaḷaidon in sia. Potaaudon kon kinoouput in Ongkag in Arnon kon Moab in norimumudon.’ ”

²¹“Hukuman in pinopoḷabúdon kon kotá mita kon rawang moḷantud: kon Holon, kon Yahas, kon Mepaat,

²²kon Dibon, kon Nebo, kon Bet-Diblataim,

²³kon Kiryataim, kon Bet-Gamul, kon Bet-Meon,

²⁴kon Keriot, bo kon Bozra. Komintan kotá in Moab, noyayú bo nodiug, ihukum-Kudon.

²⁵Ropot in Moab ain pinutoḷ, bo kawasanea in irimumudon. Akuoi, ki TUHAN, ain nosingog.”

²⁶Ki TUHAN in noguman, “Popoḷoḷangudon in Moab, sin dinumodia in sia kon i-Nakó. Sia in monangkuḻitodbí kon totukanea, bo kinosingan in intau.

²⁷Sin intau in Israel koḻipod in kinosingan in Moab bo inouman magí mako naonda bo mosia in kinotambakandon noyotakin in mononakow mita?

²⁸Moiko intau in Moab, taḷaaidon in kotámu mita bo pogutundon kon tombuḷud in batu ná ḷagapan paḷoma nogaid kon pugadnea kon bingkí in irang.

²⁹Mododia totok in moiko! Dinongog-Kudon kon totuu moḷoḷatú, motosiḷantud, mokaḷakuang, bo moambungangaḷ in moiko!

³⁰Akuoi, ki TUHAN, nonotaau kon kododiamu. Tosingogonmu diá in bonunea, bo aidmu diá in mangaḻenea.

³¹Tuamai Akuoi in mongombaḷ totok sin moiko komintan bo popisí in intau mita kon Kir-Heres, ki iná in kotámu.

³²Totokbí in ombaḷan-Ku in intau in Sibma nongkon intau in Yaezer. Kotá in Sibma naonda bo pinomuḷa anggur inta tanganea mita kinumapot nodapot kon ḷoḷan in Laut Mati nodapot in Yaezer. Táe tanaa bungainea mita sempo in poninggai bo bungai in anggurnea ain iropú.

³³Rogiow in pia in gina noinggamádon nongkon butá in Moab inta moḷumbá. Baḻíon-Ku in tubig in anggur mogogaidon in moiḻig nongkon pakakat pomomugut kon anggur; diádon in intau in momia kon anggur bo morogiow pia in gina.

³⁴Intau kon Hesybon bo kon Eleale in mongombaḷ bo ombaḷnea in kodongogan modapot kon Yahas, bo kinodongogan doman in intau mita nongkon Zoar nodapot kon Horonaim bo Eglat-Selisia. Mosia in nongombaḷ sin tubig kon Tapá in Nimrim in noingkag domandon.

³⁵Pogogaion-Ku intau in Moab in motubá kon kuruban kon tampat mita pososumbaan monia bo mogogai in moposumba in kuruban kon dewa mita monia. Akuoi, ki TUHAN, ain nosingog.

³⁶Komintan kaoyúonan Kir-Heres bo sinangkub in Moab noinggamádon. Morobonoḷ in gina-Ku in mokoontong kon kaadaan monia, Akuoi in nádon onda bo intau inta nogirup kon dondong popatoi kon bansí.

³⁷Mosia komintan in nongarugdon kon buok kon uḷu bo tampeng, nonongkekeb kon kokaḷ, bo nogidaingdon in karong nobaḻí tomponuot kon norobonoḷ in gina.

³⁸Kon tudu mita in atop in baḷoi bo kon rawang mita tongádon kodongogan in ombaḷ. Sin Moab ain iḷosi-Ku naonda bo tampayang inta kinodoí.

³⁹Moab in norimumudon totok. Totok in nooyá in Moab! Nongombaḷ in sia sin siningkuḻedon bo nobaḻí kokosingan in bangusa mita kon ḻibuneamai. Akuoi, ki TUHAN, ain nosingog.”

⁴⁰Ki TUHAN in noguman, “naonda bo ḷagapan boniá nondagit takin koḻikip nosongká, natuata in bangusa tobatú in mamangoi bo mondagit kon Moab.

⁴¹Kotá mita bo bentengnea mita in agowon bo tontaranea in angoiandon in ondok naonda bo bobay inta mononggadídon.

⁴²Moab in morimumudbí bo diádon naonda bo bangusa tobatú, sin mosia in dinumodia kon i-Nakó.

⁴³Mosia in pinopotayow kon gogondok, bubú bo poyogaḷap.

⁴⁴Intau inta moḷagui nongkon gogondok in moḷabúbí kon bonu in bubú, bo inta ḷumuai nongkon bubú tatua in kodomokanbí in poyogaḷap. Tua mita in mobaḻíbí kon wakutu inta ain sinantú-Ku kon morimumud kon Moab.

⁴⁵Inanakan in moḷoḷagui inta kinodaitan in daya in minayá nogadop kon Hesybon, táe kotá tatua in koyogotdon in mopokak bo komaḻig i Datu i Sihon in kaanon domanmai in tuḷú. Tuḷú in nomokakdon kon butá pinosigadan bo buḷud in Moab, butá in intau mita inta moibog moparang.

⁴⁶Moboditodon in Moab! Intaunea mita inta mosumbamai kon i dewa Kamos in iyopúdon, bo ki adí mita monia ain dinia nobaḻí dinakop.

⁴⁷Táe kon singgai moiduduimai pobuíon-Kubí in kaadaan in butá in Moab. Akuoi, ki TUHAN, ain nosingog!” Tuata in aidan i TUHAN kon Moab.