Read Mongondow YEREMIA 49 Bible Online

YEREMIA 49 - Mongondow bible

YEREMIA 49

¹Naa inta pinoguman i TUHAN soaḷ Amon, “Nongonu sin butá in suku Gad in inagowbí bo iḻitúan in intau mita inta nosumba kon i Dewa Milkom? Eta degá diádon in intau in Israel inta mokoḷukad kon butá tatua?

²Táe moiangoibí in wakutunea baḻíon-Ku in intau inta nogutun kon Raba, ki iná in kotá in Amon tatua, mokodongog kon kokow in parang. Kotá tatua in mobaḻídon rumbunnea bo ḻipú mita kon diugnea in modait mopokak. Bo Israel in mogamá bui kon butánea nongkon intau mita inta dungkuḷmai nogagow.

³Ei intau in Hesybon, pongombaḷdon sin kotá in Ai in norimumudon! Ei bobay mita in kotá in Raba, pogamuidon! Pogidaingdon in daing karong tomponuot kon morobonoḷ in gina. Poribatukdon magí mako sin motoboḻingo. Milkom dewamu in akutonbí pobayá in poḷumbúan moyotakin in imang mita bo pojabat mita in pomarentanea!

⁴Ei moiko inta diá motoḷutui! Nongonu sin moiko in mopoyunggagabí in ḷopámu mita inta moḷumbá? Nongonu sin moiko in mopongatabí in kaoyúonanmu? Naondabí sin moiko in mosingogbí kon diábí in tobatúmai in intau in mokobaḻí monubu kon inimu?

⁵Moiko in kotugatanbí in aid moḻingá inta popoangoi-Ku nongkon bayongan in intau. Moḷaguibí in moiko, kon batúannea in moposaḷamatbí in kobiagannea tontaní, bo diá bidon in mosipun bui kon i monimu.

⁶Táe kon singgai moiduduimai, kaadaan in bangusa in Amon tompiaan-Kubí bui. Akuoi, ki TUHAN, ain nosingog.”

⁷Naa in pinoguman i TUHAN Inta Totok in mokawasa soaḷ Edom, “Eta degá intau in Edom diá motaau morai mokopobijaksana? Eta mononongginanea diádon degá nononggina kon i monia? Noinggamádon degá in kobobijaksana monia!

⁸Ei intau inta nogutun kon Dedan, pomurowdon bo poḷagui! Bayádon pogadop. Akuoi in morimumudbí kon buí i Esau, sin wakutuneadon Akuoi mohukum kon i monia.

⁹Aka intau mosipú kon bungai in anggur, tantúbí oyúon in tonggagatannea, bo aka mononakow mamangoi doḷom, tongábí onu in koibognea tua in gamáannea.

¹⁰Táe, Akuoi[28] monimpat mokopodait kon buí i Esau bo momukat kon onu in noibuni kon tampat pogogadopan monia; mosia in diá bidon mokopogadop. Intau in Edom takin ki utatnea mita bo topodiug mita monia, komintan bidon iyopú, diá bidon tobatúmai in taḻiban.

¹¹Ei Edom! Taḷaaidon kon i-Nakó in ki adímu mita uno-unon, biagon-Kubí in mosia. Biódon mako bá intau boba-bobaymu mita in umandoḷdon kon i-Nakó.

¹²Intaupa inta diá patus hukumon, in kinotugatan doman in hukuman, yo umpaka dá moiko in diá? Notantú bidon kon moiko in mustibí hukumon!

¹³Akuoi in mongibot podoyon kon tangoi-Ku tontaní kon kotá in Bozra in mobaḻíbí tampat inta mokokoningkim inta taḷaan in intau. Kosinganbí in intau bo tangoi monia in pakéon monia pongutuk. Bayongan in ḻipú kon diugnea in mobaḻídon dongka rumbunnea modapot in mononoi. Akuoi, ki TUHAN, ain nosingog.”

¹⁴Akuoi, ki Yeremia, noguman, “Ei Edom, akuoi in notarimadon kon habar tobatú nongkon i TUHAN. Sia in nopotabádon kon totabá minayá in bangusa mita sin mopotabá kon i monia mosipun kon tontara bo mosadia monubu kon inimu.

¹⁵Poyangkóonbí i TUHAN in iko bo singkuḻeon in intau.

¹⁶Iko in koakaḷanbí in aidmu inta mododia. Diábí in moondok kon inimu ná kainimu. Iko in mogutunbí kon sigad mita in batu, kon tudu in buḷud. Táe, umpaka inaidanmu in baḷoimu kon tampat inta moḷantud totok, ná koḷantud in pugad in ḷagapan boniá, yo poponagonbí doman i TUHAN in iko nongkon tua. Ki TUHANbí in noguman kon tua komintan.”

¹⁷Ki TUHAN in noguman, “Bodito inta moiantug kon Edom in totokbí in motoyang modapot in bayongan in intau inta moitaḻib kon tua in moitaḻikokogbí bo moondok.

¹⁸Naonda bo Sodom bo Gomora iyompat takin ḻipú mita kon diugneamai, natua doman in Edom. Diá bidon tobatúmai in intau in mogutunpa kon tua, Akuoi, ki TUHAN, ain nosingog.

¹⁹Naonda bo singa inta noitukat magí nongkon kayuon moromon kon diug in Ongkag in Yordan bo namangoi in rawang pinopokaanan kon domba, natuata in Akuoi mamangoi bo baḻíon-Ku in intau in Edom baḷú moḷagui nongkon butá monia. Bo piḻíon-Ku in itoi tobatú sin momarenta kon bangusa tatua. Ki ine degá in motaau potongkaion kon i-Nakó? Ki ine in mokobaḻí mopelekara takin-Ku? Degá oyúon in itoi in motaau moḷawang kon i-Nakó?

²⁰Tuamai, indongogaidon onu inta ain sinomayá-Ku kon intau in Edom, bo onu in aidan-Ku kon intau inta nogutun kon kotá in Téman. Ki adípa mita monia in diaanbí doman mayá, bo bayongan in intau in angoianbí in ondok.

²¹Aka Edom bo moḷabú, yo kodongoganbí in kodowawáan inta motoyang modapot in sinangkub in dunia moḷundan; karak mita in intaunea mita in kodongogan modapot in Dagat Gelagah.

²²Naonda bo ḷagapan boniá nondagit takin nosongká kon koḻikipnea, natuata in koangoi in musung bo mondagit kon Bozra. Kon singgai tatua tontara in Edom angoian in ondok naonda bo bobay inta mononggadí.”

²³Naa in pinoguman i TUHAN soaḷ Damsyik. “Intau inta nogutun kon kotá in Hamat bo Arpad in mogagawang bo moḻia-ḻiaw in gina popisí in nokodongog kon habar diá mopia. Gina monia in moondok bo moitoḻimayang mako naonda bo bokoḷ in dagat.

²⁴Intau in Damsyik nobaḻí noyangkó, bo noḷagui sin ondok. Mosia in nokorasa kon nonakit bo nororiga naonda bo bobay inta mononggadí.

²⁵Kotá inta ponango-nangoian bo umuran mosanang tua tanaa in noingongowdon diádon in nogutun.

²⁶Kon singgai tatua tayowmobiagnea mita in matoidon kon daḷan mita in kotánea, bo bayongan in tontaranea rimumudon.

²⁷Dinding mita in Damsyik in turubon-Kubí, bo komaḻig mita in Datu Benhadad in pokakon-Kubí. Akuoi, ki TUHAN Inta Totok in mokawasa, ain nosingog.”

²⁸Naa in pinoguman i TUHAN soaḷ suku in Kedar bo butá mita inta kinawasa i Hazor, inta ain inagow i Nebukadnezar datu in Babel, “Ei Nebukadnezar, tubudon in suku in Kedar bo yopúdon in intau mita kon dotá in pomukaan!

²⁹Agowdon in bobiagon domba, unta, takin ḷoḷaigan monia bo bayongan in tombonunea, bo pomaḷúdon kon i monia, ‘Indoyó moiangoidon kon i monimu komintan!’

³⁰Ei moiko intau in Hazor! Akuoi, ki TUHAN, ain noguman: Koḻikatdon poḷagui, bo pogadop. Ki Nebukadnezar in nonomayádon kon monubu kon i monimu. Sia in noguman,

³¹‘Igai mayá! Tubuon naton in intau mita inta mokorasa kon moaman bo mobiag motomoman tua. Kotá monia in diábí kinoḷukadan sin diá in bonawang bo diá doman in bonoboinea.’ ”

³²Ki TUHAN in noguman bui kon i Nebukadnezar, “Agowdon in unta mita bo bayongan in bobiagon monia! Intau mita inta buoknea ginonsingan nopoḷok tua in porariton-Ku magí mako. Popoangoi-Kubí in bodito kon i monia nongkon bayongan in tampat.

³³Hazor in tantú bidon moitosimayá mako modapot in mononoi bo mobaḻídon pogogadopan in ungkú in kayuon. Diá bidon tobatúmai in intau in mogutunpa kon tua. Akuoi, ki TUHAN, ain nosingog.”

³⁴Diá noonggot naonda in ki Zedekia nomarenta nobaḻí datu in Yohuda, ki TUHAN Inta Totok in mokawasa in noguman kon inakó soaḷ butá in Elam.

³⁵Ki TUHAN in noguman, “Akuoi in moḻimodbí kon bayongan in intau inta mongotoyang momiot inta nokoropot totok kon Elam.

³⁶Akuoi in mopoirupbí in tompot pobayá ná Elam nongkon bayongan in tampat, bo moporarit kon intaunea mita kon bayongan in tampat modapot in diábí tobatúmai in butá in diá koangoian in moḷoḷagui mita nongkon Elam tua.

³⁷Poondokon-Kubí in intau in Elam moondok kon musung inta moibog moḻimod kon i monia. Akuoi in totokbí in sinumorú kon i monia bo morimumud kon i monia. Potabá-Kubí mangoi in tontara inta momarang kon i monia modapot in mokopodait kon i monia komintan.

³⁸Datu mita bo pojabat monia in rimumudon-Kubí, bo kon butá monia posindogon-Kubí in bobangkaḷon-Ku.

³⁹Táe kon singgai moiduduimai, kaadaan in Elam in tompiaan-Kubí bui. Akuoi, ki TUHAN, ain nosingog.”