Read Mongondow YEREMIA 5 Bible Online

YEREMIA 5 - Mongondow bible

YEREMIA 5

¹Ei intau in Yerusalem, tutuiaidon in daḷan mita kon kotamu mita! Tayakdon kon bayongan tampat, bo sakusiaidon tontaní. Pirikisadon kon rawang mita in kotá mongo oyúonpa in intau motuḻid inta moḷongasi mokopotoindudui kon i Allah. Aka oyúon, dá ki TUHAN in mongampungbí kon Yerusalem.

²Moiko in moguman kon moiko in mosumba kon TUHAN, bokaka deemanbí natua in makusud monimu.

³Inta sinuntut i TUHAN in kososatiabí. Ki TUHAN in noḷubok kon i monimu, táe diá in pandung monimu. Sia in nomutuk kon i monimu, táe moiko in doí sambokon. Moiko in pamandot, bo doí mogogai in mogaid kon dosamu mita.

⁴Akuoi in norai, “Ah, mosia in tongábí rayat biasa inta diá nonotaau in onu bo onu. Mosia in nogaid kon inta bodok, popisí in diá nonotaau mongo onu in kinoibog bo inta sinuntut i TUHAN Allah kon i monia.

⁵Biódon Akuoi in mayá kon intau mita moḷoben, bo moyosingog monia. Notantúbí kon kinotaauan monia onu inta kinoibog bo inta sinuntut i TUHAN Allah kon i monia.” Táe, mosia komintan doí parentaan i TUHAN, mosia in doí motoindudui kon i-Nia.

⁶Tuamai mosia in ḻimodon in singa nongkon kayuon, bo bera-berakon in serigala nongkon padang gurun. Macan tutul in maya-mayábí mako motayak kon kaanonnea kon diug in kotá mita monia, bo pomuḷoi in intau inta ḷumuai in domokonbí. Tua komintan in mobaḻí popisí in mosia umurandon mogaid kon dosa, bo mopobui-buimaidon in monoḻikud kon i Allah.

⁷Ki TUHAN in noguman, “Nongonu sin Akuoi in mustibí mongampung kon dosa mita in umat-Ku? Mosia in nonaḷámaidon kon i-Nakó bo nosumba kon inta deeman Allah. Akuoi in nobogoi in kaanon kon i monia nodapot in mosia nobotug, táe mosia in nonuaḻingbí, bo mokakit in mayá mokipodungkuḷ kon sundaḷ mita.

⁸Mosia in naonda bo kabaḷo koḷakian inta noḷongó bo ḷanuandon in ibog; kon batúannea mongibog kon buḷoi in yobayatnea.

⁹Degá diá patus in Akuoi in mohukum kon bangusa inta natua bo motuḻí kon onu inta ain pinomia monia?

¹⁰Akuoi in mopotabábí kon musung sin momoguyaat kon gobá in anggur monia, táe deemanbí makusud moyopú. Akuoi in mopotabábí kon musung tatua momongkó kon tanga mita in pangkoi mita in anggur monia, sin tanganea mita tatua in deemanbí Akuoi in kitogi.

¹¹Umat in Israel bo Yohuda in totu-totuudon ain nomaḻidawan kon i-Nakó. Akuoi, ki TUHAN, ain nosingog.”

¹²Umat i TUHAN in noguman kon inta diá totuu soaḷ ki TUHAN. Mosia in noguman, “Ah, Sia in diábí momia kon onu bo onu. Kita in diábí kotugatan in bodito bo diábí doman koumaan in parang andeka gogoyon.

¹³Anggapdon tompot in nabi mita tatua sin koyow i TUHAN in diábí in kon i monia.”

¹⁴Bo ki TUHAN inta Totok in mokawasa in noguman kon inakó, “Yeremia, popisí in intau mita tatua nosingog natua, dá mosia in kotugatanbí in bodito inta podudui in singog monia in diábí mobaḻí. Akuoi in mopototuubí kon tosingogon-Ku naonda bo tuḷú kon bonu in bibigmu. Bangusa tanaa in naondadon bo kayu pondungú, bo tuḷú tatua in momokak kon i monia modapot in mopayong.”

¹⁵Ei umat in Israel, ki TUHAN in tayo-tayowdon in mopoangoi in bangusa tobatú nongkon ḻipú moyayú sin monubu kon i monimu. Bangusa tatua in oyúondon nongkon dungkuḷpabímai, singognea in diábí komangaḻean monimu. Mosia in moropot totok,

¹⁶bo momomiot mita monia in mongobarani; mosia in moḻimod takin diábí in tabi.

¹⁷Mosia in mokopodaitbí kon bungai in boyó bo kaanonmu poḷat moḻimod kon i adímu mita. Biag sapi bo dombamu in ratáanbi monia, bo gobá mita in anggur takin pangkoi mita in aramu in tokoyompatonbí monia. Kotá mita inta dininding inta pongata monimu in rimumudonbí monia.

¹⁸Ki TUHAN in noguman, “Umpaka natua, kon dodai intua umat-Ku in diábí yopúon-Ku.

¹⁹Táe aka mosia in moḻibó mongo nongonu sin Akuoi in nopoaidbí intua komintan kon i monia yo pogumandon ei Yeremia kon ná doman mosia in nonaḷá kon i-Nakó kon butá monia tontaní sin mogundoi kon dewa mita in bangusa ibanea, yo natua doman mosia in mobaḻí ata in intau ango-angoi kon butá ibanea.”

²⁰Ki TUHAN in nopotabá kon inakó nopotaau in koyow-Nea tanaa kon buí i Yakub inta nogutun kon Yohuda,

²¹“Indongogai, ei moiko intau bodok bo dondunguḷ! Moiko in komata táe diá moindoi, kobongoḷan táe diá mokidongog!

²²Akuoibí in ki TUHAN; nongonu sin diábí in moiko moondok kon i-Nakó? Mustibí in moiko mourot kon tayowon-Ku! Akuoibí inta ain nomia kon bingkí in dagat nobaḻí tonsigad in dagat inta diábí koḻimpatannea modapot in mononoi. Dagat in monomburábí bo bokoḷ in mondangatbí táe diábí mokoḻimpat kon tonsigad tatua.

²³Táe moiko in pamandot bo moibog moḷawang, moiko in nomaḻidawandon bo nonaḷámaidon kon i-Nakó.

²⁴Diábí kon dodai in onda in kinotoropan monimu in mohoromat kon i-Nakó, bokaka Akuoibí in inta nopoangoi in uyan, Akuoi doman in nobogoi kon inimu in sempo in posipunan kon boyó muḷoi in taong.

²⁵Táe dosamu mita tatuata inta noḷamboi kon bayongan inta mopia tatua dá moiko in diá noikaan kon tua.

²⁶Ei umat-Ku, kon sigad monimu oyúon in intau mita moraat. Naonda bo intau mogangat kon poyogaḷap inta sinaannea podomok kon ḷagapan, natuata in mosia notaan kon poyogaḷap sin podomok kon intau.

²⁷Naonda bo moḷoḷutam kon ḷagapan in mobonu kon ḷagapan kon kobangnea, natua doman in mosia momonu kon baḷoi monia in pakakat mita inta nouḻí monia pinodoyon kon uboḷ. Natuata mosia in nobaḻí nongawasa bo nooyúon

²⁸bo moḷongó bo mobiag motompia. Aid monia moraat diá in imbuitnea. Mosia in diábí moadil kon pelekara in adí mita uno-unon, bo diá moduḷu kon hak in intau mita inta dinorot.

²⁹Táe, Akuoi, ki TUHAN in mohukumbí kon i monia popisí intua komintan; Akuoi in motuḻíbí kon aid mita in bangusa mita tanaa.

³⁰Inta motoyang bo mokokoningkim in nobaḻídon kon butá tanaa:

³¹nabi mita in monguboḷ, imang mita mogundoi podudui in ibognea tontaní bo moiko umat-Ku in moibog doman kon natua. Táe onu in aidan monimu aka moiangoidon in singgai imbuitnea?”