Read Mongondow YEREMIA 52 Bible Online

YEREMIA 52 - Mongondow bible

YEREMIA 52

¹Ki Zedekia in umur doyowa nopuḷú bo mita notaong kon dodai in sia nobaḻí datu in Yohuda. Sia in nomarenta kon Yerusalem mopuḷú bo mita notaong in koonggotnea. Ki inánea in ki Hamutal, ki adí i Yeremia nongkon kotá in Libna.

²Ná ki Datu Yoyakim, ki Datu Zedekia in binaradosa doman kon i TUHAN.

³Ki TUHAN in sinumorú totok kon intau inta nogutun kon Yerusalem bo intau in Yohuda, dá inuntun-Nea in mosia bo diádon noḷukad kon i monia. Ki Zedekia in nomarontak kon i Nebukadnezar datu in Babel,

⁴Tuamai ki Nebukadnezar takin bayongan in tontaranea namangoi bo nonubu kon Yerusalem kon singgai impuḷúnea buḷan noginpuḷú kon taong in siownea kon pinomarentaan in Zedekia. Mosia in noposindog in markas kon ḷuai in kotá, noposindog in dinding pongopungan

⁵bo umuran nongopung kon kotá tatua dapot in taong impuḷú bo mitánea kon pinomarentaan i Zedekia.

⁶Kon singgai in siownea buḷan inggopatnea kon taong doman tatua, kon dodai in malarat in gogoy motoyangdon totok nodapot in rayat in kinodaitandon totok in kaanon,

⁷dinding in kotá dinangatan in musung. Doḷom tua, umpaka intau in Babel koyogot in mongopung kon kotá tatua, bayongan in tontara in Yohuda noḷagui mopobayá in Ḷopá in Yordan. Mosia in nongin taman in komaḻig, bo iḻumuai nongin bonawang inta nopoyoguput in dinding doyowa kon tampat tatua.

⁸Táe tontara in Babel nondudur kon i Zedekia, bo nodomok kon inia kon ḷopá in Yerikho. Bayongan in intaunea noḷagui nonaḷámai kon inia.

⁹Onda intua ki Datu Zedekia dinia kon i Datu Nebukadnezar kon kotá in Ribla kon daerah in Hamat, bo iḷabúan in hukuman minatoi.

¹⁰Kon kotá doman tatua ki adínea mita in iḻimod doman kon tayowonnea, bo bayongan in pojabat pomarenta in Yohuda in iḻimod doman.

¹¹Nopaḷut mako kon tua ki Zedekia iḷontok kon mata, bo sinokig bo dinia kon Babel. Kon tua pinobonu in sia kon ponjara, bo diádon nokoimontanmai in iḻumuai kon tua nodapot in sia minatoi.

¹²Kon singgai impuḷúnea buḷan iḻimanea kon taong impuḷú bosiow kon pinomarentaan i Nebukadnezar datu in Babel, namangoidon in Yerusalem intau tobatú inta tangoinea in ki Nebuzaradan. Sia in monononggina bo tongguḷu in moḷoḷukad i Nebukadnezar.

¹³Ki Nebuzaradan in nonurub kon Baḷoi TUHAN, komaḻig in datu, bo baḷoi in bayongan intau inta tongganut mita kon Yerusalem.

¹⁴Bo bayongan in intaunea norumbun kon dinding mita in kotá tatua.

¹⁵Onda intua rayat inta kon kotápa tatua, inta intau mita mopia mogaid inta ki agatnea, intau mita nobogá, bo intau mita inta ain noḷagui dinumotá kon intau in Babel, komintan inakut i Nebuzaradan pinobayá in Babel.

¹⁶Táe tongosilai nongkon rayat inta totok in nobogá bo diá koonu bo onu, in sinaḷáannea kon Yohuda, bo mosia komintan in nonompia kon gobá in anggur bo gobá mita in tudunea.

¹⁷Oigi mita porunggu bo kereta mita kon Baḷoi TUHAN takin kuyon porunggu iḷosi in intau in Babel, bo komintan porunggu tatua inakut pinobayá in butá monia.

¹⁸Mosia in nogakut doman kon pakakat mita tanaa: kokaui mita, tampat in ḷobud in mezbah, pakakat mita in togá, palo mita inta pakéonmai posipunan kon dugú in mahaḷuk inta iratá inogoi pokuruban, palo mita inta potubaan kon dupa, bo bayongan in pakakat porunggu ibanea inta pakéonmai kon pooibadaan.

¹⁹Pakakat mita buḷawan bo saḷaka, noitakin doman palo mita nointok bo tampat in baga, palo mita inta pototagúan kon dugú in mahaḷuk inta iratá sin pokuruban, tampat in ḷobud, sioḷ in togá, palo mita pototubáan kon dupa, bo palo mita pobonuan kon sosumba tubig in anggur, komintan ginamá tontaní i Nebuzaradan.

²⁰Pakakat mita porunggu inta pinomia i Datu Salomo sin pakéon kon Baḷoi TUHAN, inta oigi doyowa, kereta mita, kuyon bo sapi mopuḷú bodoyowá inta noguntu kon kuyon tatua, komintan mobogat totok, nodapot in diádon kosimbangan.

²¹Oigi porunggu doyowa tatua in notongkaibí: kon batúannea koḷantudnea in waḷu nometer, koḷobennea in ḻima nometer bo toḷu nopuḷú nosenti bo kon bonunea in nobongat. Kobunod in porunggunea in pitu nopuḷú boḻima nomili meter. Kon tudu in batúan in oigi tatua oyúon in uḷu in oigi koḷantudnea in doyowa nometer bo doyowa nopuḷú nosenti. Kon ḻibu in uḷu mita in oigi tatua oyúon in sinoḷatak takin iḷambáan in bungai in delima, komintan pinomia nongkon porunggu.

²³Bungai in delima kon sinoḷatak kon batúan in uḷu in oigi tatua tumogogatut, táe tongábí siow nopuḷú bo onom in koontongan nongkon ḻimonag.

²⁴Koḻikud intua, ki Nebuzaradan in nodomok kon i Imang Moḷoben ki Seraya, ki Zepanya oḻitnea, toḷu in intau moḷoḷukad kon Baḷoi TUHAN,

²⁵pitu in monononggina kon i datu inta kon kotápa, tongguḷu totok in tontara bo oḻitnea inta nonoinut kon administrasi in tontara, bo onom nopuḷú in intau moḷoben ibanea.

²⁶Intau mita tatua in dinianea kon i Datu Nebukadnezar kon kotá in Ribla,

²⁷Kon wilayah in Hamat. Kon tua iroriga in mosia bodongka iḻimod. Natuata in intau mita in Yohuda inakut nongkon butá monia bo pinobayá in tampat pinoḷumbúan;

²⁸Kobayong monia komintan in 4.600 in intau. Ki Nebukadnezar nogakut kon i monia noyodudui nanaa: 3.023 in intau kon taong impitunea kon pinomarentaannea, 832 in intau nongkon Yerusalem kon taong impuḷú bo waḷu kon pinomarentaannea, bo 745 in intau in inakut i Nebuzaradan kon taong in doyowa nopuḷú bo toḷu kon pinomarentaan i Nebukadnezar.

³¹Kon singgai indoyowa nopuḷú boḻima kon buḷan impuḷú bo doyowánea kon taong intoḷu nopuḷú bo pitu naonda in ki Yoyakhin inakut kon pinoḷumbúan, ki Ewil-Merodakh in nobaḻí datu in Babel. Kon taong doman tatua sia in nopoontong in totabinea kon i Yoyakhin, bo nomuḻi kon inia nongkon ponjara,

³²bo nopoaid kon inia in inta mopia. Ki Yoyakhin in inogoiannea in ḷoḻitúan inta moḷantu-ḷantud nongkon datu mita ibanea inta iḷumbú doman kon Babel.

³³Sia in inogoi nomaḷui kon ḷambung in ponjaranea bo nodapot kon singgai noiduduimai kon bonu in sia nobiagpa motaaubí in sia mongaan kon komaḻig, bo pomuḷoi in singgai inogoian in doit pakéonnea kon kobiagan.