Read Mongondow YEREMIA 8 Bible Online

YEREMIA 8 - Mongondow bible

YEREMIA 8

¹Kon dodai intua tuḷan in datu mita bo pojabat mita in pomarenta kon Yohuda, tuḷan doman in imang mita, in nabi, bo intau mita in Yerusalem ibanea in batunon nongkon pinoḷobongan kon i monia,

²deemanbí sipunon bo ḷobongon bui, táe pomayádon mako kon butá nobaḻí apat. Tuḷan in intau mita tatua in moiraritdon kon sindar in mata in singgai, in buḷan bo in tundi mita inta binaḻí monia dewa, inta kinotabi, inundoi, sinumba bo poiguman kon topotundú.

³Dá intau mita inta nobiagpa nongkon bangusa inta moraat tanaa inta ain pinorarit-Ku kon bayongan tampat in moibo-ibogdon matoi dika in mobiag. Akuoi, ki TUHAN Inta Totok in mokawasa, ain nosingog.”

⁴Ki TUHAN in nopotabá kon inakó nokipoyaput in nanaa kon umat-Nea, “Aka intau moḷabú, notantú bidon kon mobangonbí bui in sia, bo aka intau moiḷaḻe kon daḷan, notantú bidon kon mobuibí in sia.

⁵Táe nongonu sin moiko, umat-Ku in umuranbí monoḻikud bo monaḷámai kon i-Nakó? Moiko in rimigonbí in kumadai kon berhalamu, bo doí mobui mangoi kon i-Nakó!

⁶Inindongogan-Kudon kinopia, táe moiko in diábí nosingog noitutui. Diábí tobatúmai in kon sigad monimu in nomanasaḷ sin nogaidon kon inta moraat. Diábí in moguman, ‘Onu in taḷáku?’ Moiko komintan in dinumudui kon daḷanmu tontaní naonda bo kabaḷo nonubu kon pinoparangan.

⁷Ḷagapanpa bangow in kotaauanneabí in wakutunea mobui; tarangkuku, ḷagapan tansibí bo murai in monotaau doman kon wakutunea momamping kon tampat. Táe moiko, umat-Ku, in diábí nonotaau in hukum mita inta inogoi-Ku kon inimu.

⁸Mokobaḻíbí totok in moiko in moguman kon moiko in mobijaksana, bo monotaau in hukum-Ku mita! Indoiaika naonda in hukum-Ku mita tatua binaḷuian in intau mita inta nonotaau totok in agama táe motombogá!

⁹Intau mita mongopandoi kon yua-yuakmu in pokopooyáanbímai. Mosia in koinggamáan bidon in akaḷ bo moibaaḷ. Mosia in doíbí mokidongog kon tonggina-Ku; tanaa, kobobijak onupa inta oyúonpa kon i monia?

¹⁰Tuamai Akuoi in mobogoidon in gobá monia kon i togi butá ibanea, bo ki buḷoi monia kon intau ibanea. Mosia komintan, moḷoben andeka mointok, motayak kon kauntungan pongin aid inta diá motuḻid. Nodapot in nabi bo imang in monguboḷ doman kon intau.

¹¹Kekeb mita in umat-Ku inanggap monia tongábí kekeb mointok. ‘Ah, diábí nongonu,’ guman monia, ‘komintanbí mopia bo moaman.’ Bokaka totokbí in diá.

¹²Ei umat-Ku, sabanarnea in mustibí in moiko mooyá sin nogaidon kon bayongan inta mokooyá tua! Táe moiko in mobunod in pogot bo diá kooyá. Tuamai in moḷabúbí in moiko ná intau ibanea inta ain noḷabú; mopopatdon in ouman kinobiaganmu aka hukumon-Kudon in moiko.

¹³Moibog totok in Akuoi mosipun kon umat-Ku naonda bo intau mosipun kon bungai in boyónea. Táe, umat-Ku in naonda bo pangkoi in anggur bo pangkoi in ara inta diá nomungai, nodapot in daunnea mita in noḷaot domandon. Tuamai Akuoi in nobogoidon kon intau ango-angoi in namangoi bo nongawasa kon butá monia. Akuoi, ki TUHAN, ain nosingog.”

¹⁴“Nongonu sin kita in diábí nogaid kon onu bo onu?” guman in umat i Allah. “Igai in kita moyotakin moḷagui mayá in kotá mita inta dininding, umpaka in kita matoi kon tua. Ki TUHAN Allah naton ain nonantú kon kita in mustibí moputú. Sia in nobogoidon kon i naton rasum sin inumon sin kita in binaradosa kon i-Nia.

¹⁵Diá in mangaḻenea in kita mogoḷat mako kon dodamean bo wakutu ponompiaan, sin inta oyúon in tongábí aid inta motogat.

¹⁶Musung in kon kotádon in Dan; kurik in kabaḷo in kodongogandon, bo sinangkub in butá noondokdon. Musung in namangoi sin morimumud kon sinangkub in butá naton, bo kotá doman naton bo bayongan in intau inta nogutun kon tua.”

¹⁷“Tondudutka!” guman i TUHAN. “Tanaa Akuoi in nopotabádon in uḷag mita namangoi kon yua-yuakmu sin monobak kon i monimu, uḷag mobisa inta diábí kotugatan in totaau.”

¹⁸Ginaku monakit bo mopomporí, amuiku diá koundaman.

¹⁹Indongogai! Kon sinangkub in butá kodongogan totok karak in ombaḷ in bangusaku inta moḻibó, “Diádon degá in ki TUHAN kon Sion? Kon onda in datunea in tanaa?” Tubag i TUHAN, datu monia, “Nongonu sin iko in tumungkudbí mosumba kon dewa mita inta beresibí diá in mangaḻenea? Nongonu sin pinonakitmubí in gina-Ku pinongin nosumba kon berhala mita?”

²⁰Umat in Israel in nokuani, “sempo in ponoḻisían bo sempo in poninggai tanaa in noitaḻibdon, táe kita in diápa doman nosaḷamat.”

²¹Ginaku in norimumud popisí in bangusaku notakit moyoyiga; akuoi in nonogumatoi bo mogagawang.

²²Onu degá in nokopopisí nodapot in bangusaku nodapot in tanaa mako diápa doman nopia? Degá kon sinangkub in Gilead, [4] Diá in dokter andeka undam?