Read Mongondow YEREMIA 9 Bible Online

YEREMIA 9 - Mongondow bible

YEREMIA 9

¹Totuu mopia aka uḷuku bo naonda bo parigí inta nopuḻing in tubig, bo mataku in pansurang inta umuran mopotampurang in tubig! Dá akuoi in mokopongombaḷdon singgai bo doḷom, mogamui kon intau mita tongobangusaku inta iḻimod in musung.

²Aka kuma bo kon padang gurun bo kouḻíanku kon tampat pogogaian in intau inta kon binayáan! Dá taḷaankubí in bangusaku, bo moḷagui mayá intua sin yumayú kon i monia. Mosia in momomaḻidaw komintan pinosipunan in intau inta diá mosatia,

³bo umuran mosadia monguboḷ. Kon sinangkub in butá, inta mobanar diádon nongawasa, nodapot in aid diá mojujur noibaya-bayádon mako. Ki TUHAN in noguman, “Umat-Ku in nogaidon kon inta moraat diádon mogoga-gogai, diádon ináku monia in Akuoi nobaḻí Allah monia.”

⁴Umpaka kon yobayat, yo kon batúan in intau musti mokopoingat bo utat inoyod yo diá doman motaau pirisayaan. Sin, ná ki Yakub yo natua doman in mosia, kon batúannea monguboḷ kon i utatnea. Batúan in intau maya-mayá mako sin moponapud in diá totuu bo uboḷ.

⁵Mosia komintan mosi uboḷan, diá in mosingog kon inta totuu. Bibignea in nobiasadon monguboḷ mosia in diá mokosanggup in monaḷámai kon dosanea. Aid inta moraat kodugang-kodugang aid uboḷ kodugang-kodugang doman tua in umuran aidan monia, mosia in totokbí in mondoí kon i TUHAN.

⁷Tuamai in ki TUHAN Inta Totok in mokawasa in noguman, “Naonda bo logam, umat-Ku in tungkuḷan-Ku sinbá mosia in mobaḻí momurni. Onupa in motaau-Ku aidan kon umat-Ku inta ain nogaid kon inta moraat?

⁸Singog mita totok in mokoanib, mokopatoi naonda bo piot mobisa. Tosingogon mita monia uboḷ komintan. Singog mita monia mopia in kodongogan, táe sabanarnea mosia in motaanbí kon poyogaḷap.

⁹Umpaka dá kon bangusa ná tanaa yo diá popoḷabúan-Ku in hukuman inta patus? Tuḻían-Kubí in aid monia, Akuoi, ki TUHAN, ain nosingog!”

¹⁰Akuoi, ki Yeremia, noguman, “Akuoi in mongombaḷ bo mononogumatoi sin rawang in bonok kon ḷopá bo kon buḷud mita inta ain noingkag totok bo diádon sinaḻiban in intau. Singog in bobiagon diádon kodongogan, manuk bo mahaḷuk mita ibanea noḷaguidon bo nobuḻi.”

¹¹Ki TUHAN in noguman, “Yerusalem in baḻíon-Ku apug tampat pogogadopan in ungkú in kayuon. Kotá mita in Yohuda in moingongowdon, tampat inta diádon pinogutunan.”

¹²Akuoi in noḻibó, “TUHAN, nongonu sin butá tanaa in pinomayábí mako in noḷogat bo noingkag naonda bo padang gurun nodapot in diádon in tumaḻib? Oyúon degá in mopandoi totok sinbá momangaḻe kon naa komintan? Ki ine in pinoginsilangan-Mu sinbá sia in mokopoyaput kon intau ibanea?”

¹³Ki TUHAN in notubag, “Tua in nobaḻí popisí in umat-Ku in diádon noindoimai kon totundú mita inta inogoi-Ku kon i monia. Mosia in diá motoindudui kon i-Nakó, bo doí dumudui kon parenta-Ku.

¹⁴Mosia in pamandot bo mosumba kon berhala mita in Baal ná inta sinundú in mogoguyang monia.

¹⁵Tuamai, indongogaidon onu in aidan-Ku, TUHAN Inta Totok in mokawasa, Allah in Israel: umat-Ku in ogoian-Ku pinomuḷa mopait sin kaanon bo rasum sin inumon.

¹⁶Mosia in porariton-Ku kon sigad in bangusa mita inta diá kinotaauan monia andeka in mogoguyang monia. Akuoi in umuranbí mopotabá in tontara inta monubu kon i monia modapot in Akuoi momutú kon i monia komintan.”

¹⁷Ki TUHAN Inta Totok in mokawasa noguman kon umat-Nea, “Tondudutka onu inta koyogot in nobaḻí kon dunia naa, bo ḷagidon oiní in intau mita mogogamui. Potabádon in mosia mamangoi bo mopodondong in dondong ponogumatoian.”

¹⁸Intau in Yohuda noguman, “Ḷagidon pokidondongai in mosia in dondong ponogumatoian kon inaton komintan, sinbá motutug in ḷuá momuntad kon putongi naton.”

¹⁹Kon Sion kinodongogan in ombaḷ, “Moputú in kita bo totok in pinokopo oyámai. Butá naton musti taḷaan naton, baḷoi mita naton norimumud posirarit.”

²⁰Akuoi in noguman, “Indongogaipa in tosingogon mita i TUHAN, ei bayongan in bobay! Tundú kon i adímu mita bobay in dondong oamui, kon yobayatmu mita in dondong ponogumatoian.

²¹Popatoi in sinumuotdon nongin jandela, sinumuotdon kon bonu in komaḻig; sia in nodomok kon mongoadí mita kon daḷan bo tayow mobiag kon rawang.

²²Mayat in noiukatdon magí-mako naonda bo apat kon tudu in butá; naonda bo gandum inta ain iratab bodongka sinaḷáan bo diádon sinipun bui. Tuata in koyow i TUHAN inta musti potaauku.”

²³Ki TUHAN in noguman, “Intau mobijaksana in diábí motaau in moyunggagá popisí in kobobijaksananea, intau moropot popisí in ropotnea, bo intau nooyúon popisí in kaoyúonannea.

²⁴Ki ine in moibog mopoyunggaga in onuka, yo mustibí moyunggagá sin sia in nonotaaudon bo nomangaḻedon kon i-Nakó; bo kinotaauanneadon kon tabi-Ku modapot in mononoi bo Akuoi in moposindogbí in hukum bo inta moadil kon dunia. Tua komintan in mokosanangbí kon gina-Ku. Akuoi, ki TUHAN, inta ain noguman kon tua.”

²⁵Ki TUHAN in noguman, “Moiangoibí in wakutunea Akuoi mohukum kon intau in Mesir, Yohuda, Edom, Amon, Moab, bo intau inta nogutun kon padang gurun inta nonggonsing in buoknea kinopoḷok. [5] Mosia komintan in sinoit ná intau in Israel, táe pinomayá mosia andeka bangusa in Israel in nomia naonda bo intau mita inta diá sinoit, popisí in mosia diá motoindudui kon dodandian inta sinomponuotan in toit tua.”