Read Mongondow OMBAḶ 1 Bible Online

OMBAḶ 1 - Mongondow bible

OMBAḶ 1

¹Totuubí kaasí kon moingongow in Yerusalem in tanaa mako, kotá inta dungkuḷmai totok in morame. Dungkuḷmai in noiḷontú kon sigad in bangusa mita, tanaa in nobaḻídon naonda bo boba-bobay. Dungkuḷmai in kotá inta totok in dinuí-duímai, tanaa in nobaḻídon ata.

²Kinoouput in doḷom sia in mongombaḷ moajar in gina, ḷuánea in motutug kon putongi. Diá tobatúmai in kon sigad in yobayatnea mita in moibog moḻipoi kon inia. Sia in Pinomaḻidawan in yobayatnea mita inta ain nonoḻikud bo nobaḻídon musung.

³Intau mita in Yohuda in nonaḷámaidon kon butánea, popisí in sinonggata bo totokdon in mororiga. Tanaa in mosia in nogutundon kon yua-yuak in bangusa mita takin diá in tampat inta mobogoi in kobiagan motompia. Musung mongopung kon i monia kon dodai in mosia nororiga.

⁴Kon singgai mita moḷoben diá in tobatúmai in intau in mamangoi kon Baḷoi i Allah. Mongodeaga mita inta mododondong kon tua mororiga, bo imang mita in morongombaḷ. Diábí in intau kon bonawang mita, Kotá in Sion kinawasa in robonoḷ in gina.

⁵Musungnea mita in yumunggagá popisí in nokokawasa kon inia. Binaḻí i TUHAN in sia nororiga, popisí in mobayong totok in dosanea. Intaunea mita in sinokodakopdon, bo inakut pinobayá in pinoḷumbúan.

⁶Kinoḷoḷoben in Yerusalem in dongkadon nobaḻí ouman. Itoinea mita in nobaḻídon noyangkó naonda bo rusa inta totok in ginogoi. Mosia in diádon mokopongonu kon musung inta nondudur.

⁷Naonda in norumbun bo nororiga, Yerusalem in nokotorop kon singgainea dungkuḷmai, kon dodai in nobarongpa in kapunyaan; bo naonda in kinoḷoḷabú in intaunea kon bonu in kawasa in musung, bo diá tobatúmai in intau in namangoi notuḷung. Saturunea mita in tongábí kinumosing in nokoontong kon kinorumbunannea.

⁸Yerusalem in nopokotordon in awaknea tontaní pinongin nogaid kon nobayong in dosa mokorongó. Bayongan inta dungkuḷmai in nohoromat kon inia, tanaa in noningkuḻedon kon inia popisí in nokoontong kon kinopilangannea. Sia in nongombaḷ, popisí in kinobuḻiandon in pogot.

⁹Kinononajisnea in noniatadon táe diábí pinandungneamai in onu inta ain nobaḻí kon inia. Motoyang totok in kinoumpagannea, táe diábí tobatúmai in nopoḻipoi kon inia. Dá nopoigum in sia kon totabi i TUHAN, popisí in musungnea mita in nountungdon.

¹⁰Bayongan in kapunyaannea ain inagow in musungnea mita. Nodapot in sia in nokoontongbí tontaní in sinuotan monia kon bonu in Baḷoi i Allah, aid tobatú inta kinodoí i TUHAN aidan in intau inta deeman umat-Nea.

¹¹Takin ombaḷ intaunea mita notayak kon pakéon kobiagan; pakakat mita inta koboḻi pinonoḻiu monia kon roti, tongá popisí in bá umuranpa in mosia mobiag bo diápa matoi. Yerusalem in nokuani, “O TUHAN, indoiaipa kaasí in akuoi, indoiaipa kaasí in bayongan in rorigaku.”

¹²“Ei intau mita inta tumaḻib kon daḷan, indoiai bo taridiai![1] Oyúon degá in roriga inta ná kobogat in rorigaku tanaa, sikisa inta pinopoantug i TUHAN kon inakó, popisí in torú-Nea inta moḷoben totok tua?

¹³Nongkon ḷangit pinoonag-Nea in tuḷú inta nomokak nodapot kon bonu in ginaku. Sinaannea in potait kon tayowonku inta nokopopisí kon inakó noḷabú. Bodongka pinomayá-Neadon mako in aku-akuoi mita in kinoantugan in roriga kinoouput in singgai.

¹⁴Ginamá-Nea in bayongan in dosaku, bo binogotnea sinobatú, bo pinopoboboḷnea kon sigogowku, dá kobogatnea in nokoḷungkoyó kon inakó. Akuoi in inogoi i TUHAN kon saturuku; diá mokopongonu in akuoi kon i monia tua.

¹⁵Inanggap i TUHAN diá in mangaḻe in bayongan in intauku inta mongotorindog. Inampoi-Nea in bayongan tontara sinbá bayongan in intau tayowmobiagku in moyopú. Iritakan-Nea in bangusaku nodapot in norimumud, ná intau inta nomugut kon bungai in anggur.

¹⁶Tuamai in noḷabú in ḷuáku, diá in moginrigon kon gina bo moḻipoi. Bangusaku in kinobuḻiandon in bayongan in yagi-yagi, popisí in kawasa in musung in moḷobe-ḷoben.

¹⁷Akuoi in notonggó kon ḻima sin mokituḷung, táe diábí in noḻipoi. Nongkon bayongan in tampat, ki TUHAN nopotabá mangoi in musung; mosia in namangoi sin momarang kon inakó. Akuoi in pinomia naonda bo yoyatan, pakakat inta mokorongó kon yua-yuak monia.

¹⁸Táe ki TUHANbí in totuu, popisí in parenta-Nea ain iḻimpatanku. Indongogaipa in akuoi, ei bangusa mita, indoiaika in akuoi kon bonu in roriga. Intau mita tayowmobiag bo mongodeagaku in dinakop, bo inakut pinobayá in pinoḷumbúan.

¹⁹Akuoi in nogoiní kon yobayatku mita inta mongodagin táe nomaḻidawan in mosia kon inakó. Imang mita bo itoi in bangusa komintandon minatoi kon daḷan mita in kotá. Kon tungkuḷ in notayak kon kaanon sinbá mobiagpa.

²⁰O, TUHAN! Indoiaipa kaasí in akuoi, moḻia-ḻiaw in ginaku bo moondok, nogoguyaat popisí in aidku moraat dungkuḷmai. Kon daḷan mita oyúon in poḻimodan, kon bonu in baḷoi oyúon in matoi.

²¹O, TUHAN! Indongogaipa kaasí in ombaḷku, diábí in moḻipoi kon inakó. Mopia in gina in musungku mita sin pinopobodito-Mu in akuoi. Angoidon in singgai inta pinodandi-Mu tua; baḻídon in mosia mororiga ná akuoi.

²²Taridiaidon in bayongan in aid moraat monia tua, bo aidaimaidon in mosia ná pinogogaid-Mu kon inakó, popisí in bayongan in dosa inta ain inaidanku kon ini-Mu. Mogongot in akuoi kon bonu in roriga, moajar in ginaku bo diá kotaauan mongo mayá in onda.”