Read Mongondow OMBAḶ 2 Bible Online

OMBAḶ 2 - Mongondow bible

OMBAḶ 2

¹Ki TUHAN in nogaid kon bonu in torú, Sion in inangkuban-Nea in sindip. Kamuliaan in Israel inta ná koḷantud in ḷangit, ain pinogonag-Nea kon butá. Kon dodai in ki TUHAN sinumorú, baḷoi-Nea kon Sion diá bidon pinandung-Neamai.

²Bayongan in rawang in bonok kon butá in Yohuda, irimumud-Nea takin diá in tabi. Kon bonu in torú-Nea dinangatan-Nea nodapot in noumpag in dinding mita inta nogoḻingoi kon butá tatua. Dodatuan tatua takin itoinea mita iḷabú-Nea nodapot in mokooyádon.

³Kon bonu in torúnea inta tumaga-tagab, ropot in Israel pinutoḷ-Nea. Kon wakutu in kita sinubu in ḷawang, mobogat in gina-Nea in motuḷung. Naonda bo tuḷú moborambang momokak kon bayongan in yagi-yaginea, natuata in ki TUHAN sinumorú kon i naton komintan.

⁴Naonda bo musung, Sia in nomadang kon puḷu in piot-Nea bo pinopotayow-Nea kon i naton in piot-Nea. Bayongan in intau inta nokosanang kon gina naton, nodait iḻimod-Nea. Sia in noporoput in torú-Nea naonda bo tuḷú kon bonu in kotá in Yerusalem tanaa.

⁵Ki TUHAN nobaḻí naonda bo musung; binoutnea in Israel nodapot in norumbun. Irimumud-Nea in dinding mita takin komaḻig, bo nodugang kon ajar in gina kon intau in Yohuda.

⁶Sia in norimumud kon baḷoi-Nea tampat pososipunan in umat-Nea sin mosumba kon i-Nia. Binaḻí-Nea in intau mokoḻiong kon singgai in Sabat bo singgai mita moḷoben ibanea. Popisí in ki TUHAN totok in sinumorú, imang bo datu in kinodoí-Neadon.

⁷Ki TUHAN in doídon in mezbah-Nea inta motusi, bo nonaḷámaidon kon Baḷoi-Nea tontaní; pinomayá-Neadon mako in musung nogumpag kon dindingnea mita. Kon tampat pinoibadaan bo pinoramean naton koḻipod, musung in monggoḷokap popisí in nountung.

⁸Ki TUHAN ain nonantú kon dinding mita in Sion mustibí umpagon. Dinding mita tatua in inukur-Neadon, sinbá komintan korimumudan-Nea. Dinding mita bo ḷangkeang mita, tanaa in nobaḻídon apug komintan.

⁹Bonawangnea mita in kinobumbunandon in butá, bayongan in bonoboinea mita noputoḷ; datu bo pojabat in pomarenta dinia kon pinoḷumbúan. Hukum i TUHAN in diádon bui sinundú; nabi in diádon notarima kon tongkoyow nongkon i TUHAN.

¹⁰Guhanga mita in kotá iḻimitú kon butá bo kibio-biómai; mosia in nopoinggú in ḷobud kon uḷu, bo nomaké in kaeng karong nobaḻí tomponuot kon pinonogumatoian. Mongodeaga mita in kinumuyung nodapot in butá.

¹¹Mataku in nobobagá popisí in nongombaḷ diá nodona-doná, dimukudku in moondok diá in batainea. Ginaku in norumbun nokoontong kon kinorumbunan in bangusa; nokoontong kon mongoadí mita bo adí mointok sinogopuḷong kon daḷan mita in kotá.

¹²Noḷopídon in mosia in nongombaḷ noigum kon kaanon bo inumon kon i inánea. Naonda bo intau kinekeban, mosia in noumpag kon daḷan mita bo minatoi kokoyo-koyot i inánea.

¹³O Yerusalem, Kotá in Sion inta kinotabi totok, kinorumbunanmu in nádon koḷoben in baḷangon. Onu degá in motaauku singogon sin mopoḻipoi? Sin, diábí kon dodai in onda in nokouḻí kon roriga ná iko. Totuu kon diábí in mokopobui kon kaadaanmu.

¹⁴Inta pinotaau in nabi mita kon inimu, tongábí tompobaḻik bo uboḷ komintan. Mosia in diábí kon dodai in onda in nobuká kon dosamu, manangka intua iko in diábí notobat. Noyotoḻikud kon tua yo mosia in tongábí mopotaau kon inimu in tosingogon mita uboḷ inta mokosanang.

¹⁵Bayongan in intau inta moitaḻib, morebeg kon inimu, sin norimumudon komintan in iko. Momombiḻing in mosia bo poḷat moguman, “Tuata degá in kotá inta totok in mogaga, kotá inta inyunggagá in dunia?”

¹⁶Bayongan in musungmu moindoi kon pogotmu takin rongut, kosingan monia in iko bo monginggoi. Mosia in moguman, “Kotá tatua in iyompatdon nami! Imbuitnea noidapot domandon in wakutu inta inoḷa-oḷat mako nami!”

¹⁷Ki TUHAN in nogaidon kon onu inta pinogogondoknea inta koḻipod in sinomayá bo pinotoingat-Nea kon inaton. Kita in irimumud takin diábí in tabi, musung in pinountung-Nea binaḻí-Nea noḷunganga in gina monia in nokoontong kon kinoḷabúan naton.

¹⁸Ei dinding mita in Yerusalem, pokuanidon kon i TUHAN! Potutugdon in ḷuámu naonda bo tubig in ongkag inta moiḻig singgai doḷom. Tantúbí pongombaḷ, dika modoná modapot in awakmu moḷopí!

¹⁹Pobui-buidon pobangon in tonggobii tua sin momaḷú moguman kon onu in kon bonu in dodobmu kon i TUHAN. Poigumdon sinbá angoian in tabi in Sia kon i adímu mita inta gogoyon bo inta sinogopuḷong kon bayongan in pobeukan in daḷan.

²⁰Kaasí TUHAN, indoiai bo taridiaipa in mosia inta iroriga-Mu tatua! Degá oyúon in nokoimontan-Mu pinomia natua? Ki iná nokaan kon i adínea inoyod inta kinotabi totok, imang bo nabi in iḻimod kon bonu in Baḷoi-Mu inta motusi.

²¹Moguyang bo moguod minatoi noitongkob kon daḷan, tayowmobiag bo mongodeaga minatoi sinotad. Kon singgai Iko sinumorú, iratá-Mu in mosia takin diá in tabi.

²²Inoiní-Mu in musung mita inta kinoondok nami sin momia kon rame aid moḻingá kon ḻibumai nami. Mosia in noḻimod kon bayongan inta biniag bo inta kinotabi nami. Kon singgai in torú-Mu, diábí tobatúmai in intau in mokoḷagui.